سالوب تحیّره عقلی جلالتون آناجان #فاطمیه_حزین_خسروشاهی

حضرت زهرا سلام الله علیها
.
زبدة الاشعار
.
: @nohe_torki
.
مرحوم حزین خسوشاهی
.
سالوب تحیّره عقلی جلالتون آناجان
ویروب جلالته عزّت اصالتون آناجان
.
سن اول نظیره سی یوخ عُنصر بهشتی سن
که لطف باغ جناندور لطافتون آنا جان
.
اگر چه صورتاً انسیّه سن، ولی خالق
ائدوبدی فوق ملک حُسن سیرتون آناجان
.
هانی ملک ده او شأن و شرافت و اوجلال
که فرض اولا اونا شأن وجلالتون آناجان
.
سنی خدا یارادوب مظهر اوز کرامتنه
ورای فکر و تصّور فضیلتون آنا جان
.
نه واردی عفّت و عصمتده مثل و مانندون
که فوق عفّت و عصمتدی ، عصمتون آن جان
.
اوزی سنیله مشرّفدی واژه ی تقوی
وئروب نجابته زینت نجابتون آنا جان
.
ائدر عبادتوه غبطه قدسیان یکسر
ائدوب شرایعی تحکیم طاعتون آنا جان
.
سنون وجودووله فخر ائدردی فخر رسل
ائدردی خاطرینی شاد ، رویتون آنا جان
.
الون اوپردی دِیَردی آتان سنه قربان
شرفده بسدی همین بو مزیّتون آنا جان
.
خطاب امّ ابیها و بَضعَه مِنّی
دِیَر نه پایه ده دی شأن وشو کتون آنا جان
.
اولار جهاندا فداها خطابی جدّوندن
مقام و منزلتونده کفایتون آنا جان
.
بویوردی قهر خداوندور سنون قهرون
رضای خالق منّان، رضایتون آنا جان
.
سن اول عطای خداوند سن غریب آتاما
که هیچ عطییّه یوخدور شباهتون آنا جان
.
هانی جهاندا سنون تک شریک غم باباما
تمام غملرینه واردی شرکتون آنا جان
.
همیشه لیق قالاجاقدور حماسه ی تاریخ
ولایت اوسته آتامدان حمایتون آنا جان
.
نقدر دور ائده دور زمان ،گرک اولسون
ولایت اهلینه الگو ولایتون آنا جان
.
نه چکمیسن بیراوزون بیرده خلقتون بولوری
یاناندا ظلم اودونا باب رحمتون آنا جان
.
گیچور او واقعه دن گرچه بیر زمان امّا
هنوز وار بدنونده جراحتون آنا جان
.
سن ای ریاض رسالت طراوتی، آیا
نه باعث اولدی که گئتدی طراوتون آنا جان
.
نه باعث اولدی جوانلیقدا عمردن دویدون
که یوخدی قالماقا دنیاده رغبتون آنا جان
.
ندن دعالروه وئرموسن بئله تغییر
وصال بزمینه وار یوخسا دعوتون آنا جان
.
دعالرونده ندن ایستوسن ئولوم ئوزوه
حیاتوه داهی یوخدور عنایتون آنا جان
.
هنوز غنچه لرون آچمیوبله گل، ای گل
سنه نه گلدی بئله گئتدی نزهتون آنا جان
.
چتیندی آیریلیقون ای محبتّه معنا
بیزه تسلّی دلدور محبّتون آنا جان
.
دوشنده یادیمه ،دشمن تهاجمی هر دم
اولور گوزومده مجسّم اوحالتون آناجان
.
ائله فشاره سنی سالدی رحمسیز امّت
او استقامتیله گیتدی طاقتون آنا جان
.
اوزون یارالی ییخیلدون بالان شهیداولدی
گواهی فضه تَعالی عبارتون آنا جان
.
بو حالتون ائدور اعلان یتیم اولماقیمی
سالور نهادیمه اود درد فرقتون آنا جان
.
ولی اوزون منه سرمشق وئرموسن دوزومی
عیاردور منه صبر و متانتون آنا جان
.
بلالره دوزرم منده سن کیمی چون اولوب
دوزوم بلالره هر دم وصیِتون آنا جان
.
سالار شرر آناسیزلیق غمی اگر چه دله
اولار منه غم عُظمی مصیبتون آنا جان
.
ولی گرک دایانام حق رضاسنه خاطر
که حقّه خاطر اولوبدور شهادتون آنا جان
.
امیدوار کرمدور “حزین” بو درگهدن
نولور اونا یته فیض شفاعتون آنا جان
.
و بیرده لطف ائده سن آشنالریله اولا
مدینه ده اونا قسمت زیارتون آنا جان
.
.
#فاطمیه_شهادت
#سالوب_تحیره_عقلی_جلالتون_آناجان
#حزین_خسروشاهی
#ترکی
.
#زبدةالاشعار
.
: @nohe_torki