سال یوز قرخ سکّز هجرتده ذات لایزال #رضویه_انور_اردبیلی

در ولادت حضرت امام رضا علیه السلام
#گریز به #غارت_خیام
.
.
.
مرحوم انور اردبیلی
.
.
سال یوز قرخ سکّز هجرتده ذات لایزال
کائناتون صاحبی جان آفرین بی مثال
.
لطف ایدوبدور موسی جعفر امام هفتمه
بیر اوغول ایتدی عطا نیکو سیر نیکو جمال
.
نور پاک حجت هشتم طلوع صبحده
بطن مادردن فنا دنیایه تاپدی انتقال
.
نام نامیسین آتاسی ایتدی همنام علی
بوالحسن نیت ایدوبدور اوغلون اول زیبا خصال
.
مرکز زهد و فضیلتده تاپوبدور پرورش
چشمه علم امامتدن ایچوب آب زلال
.
کچدی عمریندن اوتوز بش نو بهار پر شکوه
ظلم هارون حالینی پوزدی ایدوب افسرده حال
.
زهر ویردی سند بی ایمان ابا ابراهیمه
محبس مرطوب و مهلکده تاپوبدور ارتحال
.
کاظمینده دفن اولوبدور کاظم آلعبا
ویردی زینت تپراقا گنجینه علم و کمال
.
ثامن الحجّت اولوبدور کاظم آلعبا
محضریندن فیض تحصیل ایتدی اشراف و رجال
.
منطقیندن صاحب منطقلر اولدب کامیاب
امرینه قیلدی اعاظیم و اکابر امتثال
.
حقّینی غصب ایلدی افسوس هارون الرشید
روحینی آزرده ایتدی حضرتون اول بدسگال
.
مکتب هارونیده تصدیق آلا شاگرده باخ
مادیات اوسته ایدوبدور معنویتله جلال
.
پنج روزه لذته ساتدی بقا اجلالینی
ایله فکر ایلوردی یوخدور عمرینه اصلا زوال
.
ایستدی شیری کمند حیله سینده رام ایده
مغز مکارینده نقشه طرح ایدوب مثل شغال
.
رسمیدور بو هر زمان دنیا پرستان زمان
قدرت عقلی قویوبدور نفسه ایلر اتّکال
.
بی حیا مامون امامی مروه دعوت ایلدی
قائل اولدی ظاهر صورتده چوخ شان و جلال
.
مکریله افکار خلقی ایستدی جلب ایلسون
مقتضی موقعده امام حقی ایتسون پایمال
.
ضامن آهویه تکلیف خلاقت ایلدی
قیلدی فرمایش رضا بو امردور امر محال
.
صادق آل محمددن خبر واردور منه
ئولمگیم زهریله حتمی دور نه اینکه احتمال
.
عمریم آزدور ال گتور مندن فشاره سالما چوخ
یوخدی قلبیمده منیم بیر ذره عشق ملک و مال
.
درک ایدوب بو سوزلری مامون ولی ال چکمدی
تاپّادی روحی عداوت جنبه سیندن انفصال
.
برگ گل باد صبادن جان آلوب بیدار اولار
کسب فیض ایتمز نسیم صبحدن سنگ سفال
.
جبریله آخر شه دینی ولیعهد ایلدی
بلمدی مجرم چتین معصومه اولسون اتصال
.
بو علمدن دل غمین اولدی گیجه گوندوز امام
آشکار اولدی یوزوندن غصه و حزن و ملال
.
جمعه لر هر هفته ده جمعه نمازیندن صورا
منزله ایلردی رجعت اول شه فرخنده فال
.
درگه حقه اوجالدوب ال ایدردی درد دل
ئولمگمده گر فرج وار ای خدای لایزال
.
لطف ایله مامون الیندن بو رضانی تز قوتار
سینه آرامگاهی ایت منه بزن وصال
.
من هارا مامونیله بیر یرده اگلشمک هارا
تنگ اولوب دنیا گچور هر گوندوزوم مانند سال
.
یالواروب معبودینه اولدی دعاسی مستجاب
آسمان مرگیده مستور اولوب مثل هلال
.
زهردار انگوریله جام شهادت نوش ایدوب
دوشدی نه حاله منی معذور دوت ایتمه سوال
.
بوقدر واردور وجودینده تعادل قالمادی
سمّ مهلک قویمادی قلبینده حد اعتدال
.
ترک ایدنده مجلس مامونی تتروردی بدن
تند طوفاندا نجیکه گورمسوز تتر نهال
.
الّی یول اگلشدی دوردی یولدا گلدی منزله
اولمادی طاقت ابا صلتیله تا ایتسون مقال
.
قویدی یوز منزلده تپراق اوسته جان ویردی امام
شاخه طوبایه مرغ روحی آچدی پرّ و بال
.
منتهی الآمالیده درج ایلیوبدور بو سوزی
مخبر صدژیق شیخ عباس قمی خوش مآل
.
هرثمه آدلو حوار ثامن الحجت دیور
حاضر اولدی غسلینه مامور او سرخیل ظلال
.
چون وصیت ایتمشیدی مانع اولدوم قویمادوم
ترک ایدوب ناچار او جسم اطیبی آشفته حال
.
ناگهان گوردوم جنازه اوسته دست غیبیله
ابیضی بیر خیمه گه اولدی اقامه بی مثال
.
سو سسین درک ایلدوم بلدوم ویرولر غسلینی
انتظاریدوم کچوب بو ماجردان آز مجال
.
خیمه گه بیردن یوخ اولدی گوردوم آیری منظره
اول وجود اطهره تامین اولوبدور ایده آل
.
زهریله بی روح اولان پیکر کفن پیچیده دور
آخرت رختین گیوبدور چوخ نفسین و عال العال
.
عقلوی صراف ایدوب قیل ارزیابی مطلبی
سال خیاله کربلا سلطانین ای نازک خیال
.
یاخشی فکر ایله حسینیله رضاده فرقه باخ
طوسیدن کچ قتلگاه کربلانی یاده سال
.
غسل اولان وقته رضایه خیمه قوردی دست غیب
وردی اما اود حسین خرگاهینه اشرار ضال
.
عصر وقتیدی حسین سر نیزه نی قیلدی مقام
ظلم شمر بی حیادن تتردی محکم جبال
.
قان توکنلر تندرو مرکبلره ویردی جلو
فکر غارتله گلوبدور خیمیه اهل قتال
.
آهوان اهل بیته ال تاپوب صیادلر
زینبون آلدی کنارین بیر سوری یورقون غزال
.
خیمه لر نظم و نظامین ویردی لشگر بیر بیره
بعضی سی ترمه آپاردی بعضی سی بیز طاقه شال
.
غارت اوسته اهل کوفه ئولدوروردی قزلاری
لشکره قان تو کمگی سعد اوغلی ایتمشدی حلال
.
آت قباقینده قاچاندا قورخدان هر خوردا قز
گوشوارین ویرمسیدی تز گوروردی گوشمال
.
یالواروردی هر بیری بیر رحمسیز غارتگره
شامون اهلیندن یوخیدی حیف حال انفعال
.
دشمنه هر خوردا قز اما دیوردی بو سوزی
وور منی قمچیله ئولدور معجریمی اوندان آل
.
نوبت غارت قوتاردی گلدی یانماق نوبه سی
شعله آغوشینده قالدی دختران خردسال
.
خیمه لر یاندی آلو دوتدی خیامون قبّه سین
باش گتوردی قاچدی صحرایه بیر عده اهل عیال
.
«انورا» لطف حسین ایتمیش سنی شیرین سخن
مرغ طبعون او سببدندور اولوب شیرین مقال

.
#رضویه_میلادیه #رضویه_شهادت
#سال_یوز_قرخ_سکز_هجرتده_ذات_لایزال
#انور_اردبیلی
#مردان_جاوید_انور
#ترکی
#زبدةالاشعار