حالات حضرت علی اصغر (ع)
.
.
.
مرحوم حاج صدیف بختیاری اردبیلی
.
.
سروش عالم غیبی ایدوب الهام روحانی
مخاطب قیلدی روحی سویلدی ای جسمه زندانی
نه قدری بستر غفلتده ایتدون خواب طولانی
اویان آچ گوزلرون یاتما چخوب سیر ایت بو دنیانی
مجازون کورپوسیندن گئچ دایان اخذ ایله معنانی
.
.
منی بیر هاتف غیبی اویاتدی خواب غفلتدن
دیدیم ای طوطی طبعیم الون چک استراحتدن
هما تک سایه سال سن فکریمه اوج سعادتدن
نه گورسون ثبت و ضبط ایله وقایعدن مصیبتدن
منی آگاه ایله تا ایلیوم بو شعرین عنوانی
.
.
چیخوب زندان تندن مرغ طبعیم ایلیوب پرواز
گزوب آفاق و انفسده اولوب هر سمته چشم انداز
گتوردی پرده تاریخ زماندان ایلیوب ابراز
قلم اول رازی ابراز ایتمگه فوراً ایدوب آغاز
گوروب بیر دشت پهناور کویر لخت و عریانی
.
.
حرارتدن او چولده یوخدی بیر مور و ملخ حتى
پرنده یا چرنده ایتمیور جلب نظر اوردا
عناصردن فقط اوددور یاغار گویدن شررآسا
ایدیبدور زندگینی ساکنینه سخت جانفرسا
اولوبدور خاکی خاکستر یِلی اود، آب بارانی
.
.
گوزون باخدوقجا قوملوقدور تیکانلیقدور قرا تپراق
ایلان تک قوؤرلوب یاتمش تیکانلار باشلاری تپراق
او وحشت زا بیابانی ایدوب اعرابیلر اوتراق
یغوب بیر چادره اهل و عیالین آج سوسوز چیلاق
کچوردور بینهایت ذلّتیله عمر زیبانی
.
.
خبر آلسون بولار بس هاردان امرار معاش ایلر
بو اسراری قلم اشعاریله السّاعه فاش ایلر
بولار جنگ و جدال و غارته دائم تلاش ایلر
نه فکر جامۀ دیبا و نه فکر قماش ایلر
حق و ناحقّیله یوخ ایشلری اود دوتسا دنیانی
.
.
بو شرح و حالیله اعرابلر چوللرده سرگردان
هامی فرصت گزر تا جنگ اولا غارت ایده اوردان
قوی اقوامه تابع ظالیمه ظلمینده پشتیبان
همیشه فکری غارت شغلی سرقت آدلاری انسان
بو انسانلار ایدیب ننگین الحق نام انسانی
.
.
سعید آدلی بیر اعرابی او چولده زار و دلخسته
عیال اطفالینون عشق و علاقه قیدینه بسته
دومان تک غم باسوب قلبین چکور هی آهی آه اوسته
بو اثناده گوروب اعرابیدن سرعتله بیر دسته
گیدولّر چوخ شتابیلن دایانماقه یوخ امکانی
.
.
خبر آلدى نه وار آیا؟ دیدیلر جنگ باشلاندی
هامی اعرابلر یکسر پیاده آتلی آتلاندى
یوبانما سنده تز گل کربلا دشتینده طوفاندی
دیدی آیا کیمین کیملن بو اود هاردان آلولاندی
دیدیلر بیر نفر تهدید ایتمیش آل سفیانی
.
.
سعید قیسده چوخدان گزوردی بیر بیله فرصت
گوتوردی نیزه سین میندی آتین فی الفور اول ساعت
وداع ایتسین عیالین گلدی اعرابیّ با همّت
قوجاقینده اوشاق عورت، دیدی ای مرد باغیرت
اله غارت گله بیر کوینگ ایت بو طفله ارزانی
.
.
سعید آیریلدی چادردن آتا هی ویردی شدّتلن
سمند بادپا دوردوم چاپاردی خیلی سرعتلن
آتی گه چارنال چاپدی گھی یورقا بو نیّتلن
یته تا کاروانه کشف ایده آیا بو خدمتلن
کیمون نفعینه جنگ ایلور کیمه بذل ایلیور جانی
.
.
آتی هی سوردی سرعتلن تعاتب ایتدی اعرابی
گیجه گوندوز گیدیب چوخ چکدی بیخوابی و بی آبی
نه قدری کوشش ایتدی تاپمادی آخرده احبابی
الین اوزدی حیاتیندن ایدوب هر لحظه بیتابی
اوتوردی دوردی سوردی عاقبت سست اولدی بنیانی
.
.
بیر آز دینجلدی ذکر ایتدی نه پهناور بیاباندی
باخورسان هر طرف قومدی تیکاندی کولدى القاندی
الین قویدى قاشی اوسته رکابون اوسته قوزاندی
اوزاقدان بیر قرالتی گوردی فکر ایتدی نیستاندی
دیدی من بوردا جنگل گورممیشدیم یا نیستانی
.
.
بیر آز گیتدی تعجّبلن غریبه منظره گوردی
دونوب اول دشت پهناور کانّه محشره گوردی
کیچوب میل و دبیلقه نوک نیزه بیربیره گوردی
دانشور بیر نفر بیکس اوتوز مین لشکره گوردی
او وعظ ایلور چکور لشکر عموماً شور و عرّانی
.
.
آتین سوردی قباقه تا گوره آیا نه غوغا دور؟
نه وار؟ نه ایستیور بو بیر نفر؟ آیا نه دعوا دور؟
گوروب بیرشخص شایسته جمالی چوخ دل آرادور
قوجاقینده سوسوز بیر طفلی وار وصفی هویدادور
گلوب سو ایستیور سیراب ایده طفل لب عطشانی
.
.
اوشاق چون اشک پروانه تمیز و طیّب و طاهر
یاشیل قنداقی وار آغ دوشلوگی پیرایه سی فاخر
عطش امّا سالوب دیلدن دگول گوز آچماقا قادر
آخیب باشی دالی سمته بوغاز آی قرصی تک ظاهر
گورنده وضع حالین ایلیور مبهوت انسانی
.
.
سعیده روشن اولدی مطلبون آغاز و پایانی
عربده رسم دور تسلیم ایدللر سویلان اعدانی
ولی بو طفل عطشانین نه تقصیری نه عصیانی
اورکده لعن ایدوب نسل زنای آل سفیانی
دیدی من سو آپارّام بو غریبه اولسا امکانی
.
.
قیدی سو گوتوردی نهردن اول مرد باهمت
بو امر خیرده چوخ ایلیردی سعی و جدّیّت
گتوردی سرعتیلن سو ولی افسوس اول ساعت
گیدوب میدانیدن گوردی او سرور اولدی ناراحت
خبر آلدى هارا گیتدی نه اولدی مرد روحانی
.
.
دیدیلر حرمله سیراب قیلدی زهردار اوخلان
وروبدور گود حلقیندن اوخی، دالدان چیخوب پیکان
اوخیلان کسدی باشین اول لعین شوم و بی ایمان
الینده چیخدی جانی اولمادی تصمیمه بیر امکان
دوروبدور تلّین اوستونده الینده طفل بی جانی
.
.
بیزیمده قلبیمز یاندی او شخصه کی دوروب تنها
الیندن یوخدی بیر شخصی آلا اول طفلی میداندا
بیر آز گیتدی دایاندی بیلمه دی بس نیله سون آیا
آپارسون خیمه گاهه یا کی دفن ایتسون اونی هاردا
مصمّم اولدی ویرسون مادرینه تشنه قربانی
.
.
سعید الده سو جامی گلدی تلّون اوسته آهسته
سلام عرض ایلیوب اوّل دیدی ای مرد دلخسته
باغیشلا گئج گتیردیم سو گل آل توک نعشینون اوسته
منی بو غم یقیناً یاندیرار دنیاده پیوسته
آقا عفو ایله الآن گلمیشم بیلمم قضایانی
.
.
بویوردی قیسون اوغلی تئز گلوبسن اولما ناراحت
سنه چوخ سعد ساعتدور منیمچون چوخ چتین ساعت
بو امر خیرووه ویرّم سنه پاداش بیر خلعت
علینون کوینگین آل اوغلوا ویر ایلسین کسوت
تاپوبسان هم ئوزون اوغلون عیالون فیض عظمانی
.
.
سعید عرض ایلدی مولا ضمیریمدن خبر ویردون
آتامون آدینی سرّ نهانی سربه سر ویردون
اویاندیم خواب غفلتدن منه روشن بصر ویردون
من بی چیزه اعجازیله سن درّ و گهر ویردون
منه اسم شریفون بذل قیل ای عبد روحانی
.
.
بویوردی من حسینم سبط پیغمبر آتام حیدر
امام المتّقینم من گوگه زینت یره لنگر
دیوبدور لحمک لحمی منیم حقّیمده پیغمبر
نجاتون کشتی سی نور هدایت عالمه رهبر
واریم قدرت بوگون قبض ایلیم ارواح انسانی
.
.
ولی روز السته خالقیمله ایتمیشم پیمان
سوسوز کرب و بلانون قوملاری اوستونده ویرم جان
کسلّر باشیمی دالدان قویالّار جسمیمی عریان
سویالّار، یاندیرالّار خیمه می بو فرقۀ عدوان
رضای حقّیدن اوتری قبول ایتدیم بو سودانی
.
.
اجازه ویر دیدی منده ایدیم ئوز جانیمی قربان
گوزومدن دوشدى الساعه منیم دنیای دون هرآن
داخی یوخ زندگینون لذتی ای شاه مظلومان
عیال و عترتیمده قالسا گر چوللرده سرگردان
اولاردان خالق رحمان ایدر عالی نگهبانی
.
.
بویوردی سن سعید اولدون سعیدا سعد ساعتده
گوتور بو کوینگی گیت قالما بو صحرای وحشتده
عیالون منتظردور قویما یانسون نار فرقتده
بیزه اون گون عزادار اول هر ایل ایام محنتده
نه قدری اولسا امکانون ایله زواره احسانی
.
.
تمام ایت «بختیاری» یازما بو محنتلی اشعاری
قراگی ایلده اون گون اول شه عطشان عزاداری
باخار قانلی گوزیلن کربلانین تشنه سرداری
اولارسان اول عطیرلی قبرینون جمعیله زواری
نهانی دردووه اوردان آلارسان فوری درمانی
.
.
#اصغریه_صدیف_بختیاری
#اصغریه_شهادت
#سروش_عالم_غیبی_ایدوب_الهام_روحانی
#ترکی
.
.
نظر دهید