سلام ای مظهر ذات خدا یابن رسول الله #رضویه_صحاف_تبریزی

در مدح و شهادت امام رضا (ع)
گریز به شهادت امام حسین (ع)
.
#زبدةالاشعار
.
: @nohe_torki
.
مرحوم صحاف تبریزی
.
سلام ای مظهر ذات خدا یابن رسول الله
اولا بو قبریوه روحیم فدا یابن رسول الله
.
دیسم بو روضۀ عرش آستانه روضۀ رضوان
غلط سوزدور گیدوب فکریم خطا یابن رسول الله
.
گورن بو روضه نی دوشمز خیال جنّته بیرده
بهشت عدنده یوخ بو صفا یابن رسول الله
.
چکه لّر حسرتین حوریّه لر جنّتده بو قبرین
غبارین ایلسونلر توتیا یابن رسول الله
.
اوجالدوب قبّۀ افلاکه باش فرط جلالتدن
بو گلدسته بو ایوان طلا یابن رسول الله
.
گیجه گوندوز ملایک بو مقدّس آستانوندن
ایده لّر اخذ عزّت برملا یابن رسول الله
.
بیله شأن و شرافت بیر بیله عالی مقام اولماز
ایدر غبطه جلالون انبیا یابن رسول الله
.
چخاندا گون دوشر هر گون اؤپر بو آستانوندن
آلور رخصت ایدر کسب ضیا یابن رسول الله
.
اگر ای نور وحدت آلماسا گون نورینی سندن
ویرنمز شرق و غربه انجلا یابن رسول الله
.
زیارت ایلیه هر غملی بیر کیمسه سنی مطلق
اولور درد و مصیبتدن رها یابن رسول الله
.
همیشه وقفه دی زوّاره قبرون تخت قبّه ده
اولور هر مطلبی دلدن روا یابن رسول الله
.
امام ثامن و ضامن غریب طوس نور حق
هدایت بُرجنه شمس الضّحا یابن رسول الله
.
قوناقدور هر شب جمعه سنه اون بیر امام ایلر
بو یرده صُبحه تک شور و نوا یابن رسول الله
.
آنان زهرا توکر آق ساچلارین بو قبرون اوستنده
گلور درده ایدر داد و بکا یابن رسول الله
.
آچان بالای سرده باشنی موسی بن جعفر دور
اولور زهرایه بوردا همصدا یابن رسول الله
.
یانان دلدن اوغول وای ناله سی اوج ایلر افلاکه
گلوللر شیونه اهل سما یابن رسول الله
.
بو غمده حقّی وار زهرا آنان حشره کیمی قیلسا
ریاض جنّتی ماتم سرا یابن رسول الله
.
یوزون توپراقدا غربتده گوزی یولّاردا جانوردون
غمونده یاسه باتدی ماسوا یابن رسول الله
.
او حالون یاد ایدوب گلّم فغان و داد و فریاده
ئولنجه آغلارام صبح و مسا یابن رسول الله
.
آقاوای ناله سیله عالم امکانی دولدورّام
اگر مین ایل ایده عُمریم وفا یابن رسول الله
.
سنی مکریله مأمون گتدی یثربدن خراسانه
ایدوب اهل و عیالوندان جدا یابن رسول الله
.
بو فکره دوشدی پیغمبر چراغین ایلسون خاموش
حضوره ایستدی اول بی حیا یابن رسول الله
.
سنه بیر ظلم ایدوب آچدی باشین جنّتده پیغمبر
اوغول وای سسلدی خیرالنّسا یابن رسول الله
.
جگرلر زهریله دوغراندی گل تک لبلرون یاندی
اوجالدی شیونون افلاکه یابن رسول الله
.
او پوزقون حالتیله مجلس مأموندن دوردون
اورکده اللرون باشدا عبا یابن رسول الله
.
چکردون هر قدمده داغلی دلدن آهی آه اوسته
دیلونده کلمۀ واغربتا یابن رسول الله
.
او وضعیله گلوب تا وارد دولت سرا اولدون
گوزونده تیره تار اولدی فضا یابن رسول الله
.
کنار ایتدون فراشی فرشی بیحد اضطرابیله
سالور اود دللره بو ماجرا یابن رسول الله
.
یوزون جدّون کیمی توپراقه قویدون درد غربتدن
ایدردون نی کیمی دلدن نوا یابن رسول الله
.
دونردون گه ساقا گاهی صولا از بسکه آلمشدی
قرار و طاقتون زهر جفا یابن رسول الله
.
یانوندا نه عیالون نه قیزون غربت ولایتده
نه بیر یار و حبیب و آشنا یابن رسول الله
.
وطندن ایلدن آیری اللرون قلبونده جان ویردون
ندندی اولمادی عالم فنا یابن رسول الله
.
باجون معصومه گرچه اولمادی سن جان ویرن وقته
گوزیوی باغلاسون اول بینوا یابن رسول الله
.
گینه گلدی جوان اوغلون باشون آلدی دیزی اوسته
توکوب رخساره اشگ پربها یابن رسول الله
.
بیله جان ویرماقا شاها نه وار اوغلون باشون اوسته
عمامه الده دلده وا ابا یابن رسول الله
.
اولیدون کربلاده کاش جدّون جان ویرن ساعت
نه ظلم ایلر گوریدون اشقیا یابن رسول الله
.
الینه داش گلن نیزه گلن آلمشدی اطرافین
خفادیدی او خورشید هدا یابن رسول الله
.
سوسوز یالقوز یارالی گون قباقنده قوری یرده
چالوردى قان ایچینده دست و پا یابن رسول الله
.
سه شعبه اوخ اورکده داش یاراسی سجده گاهنده
دولوب زخمیله تن باشدان باشا یابن رسول الله
.
دوشر من اولمورم نه حالته بیر نازنین پیکر
اولا بیر سینه ده دورت مین یارا یابن رسول الله
.
نفس چکدوقجه داش نیزه قلج خنجر یاراسندان
اولوردی سو کیمی جاری دِما یابن رسول الله
.
یارالاردان علاوه طاقت و آرامین آلمشدی
سوسوزلوق آتشی ایسّی هوا یابن رسول الله
.
گلنده هر طرفدن اوخ باساردی باغرینا جان تک
ایدردی سینه سینده جابجا یابن رسول الله
.
او قدری رحمسیزلر وردی داش نیزه قلج خنجر
دوشوب دلدن شه گلگون قبا یابن رسول الله
.
کمال ضعفله قان ایچره قویدی سجدیه باشین
تاپوب یول وحدته کثرت آرا یابن رسول الله
.
دولانمور گوردی آغزیندا دلی سوز حرارتدن
وجودین محو ایدوب شوق لقا یابن رسول الله
.
او خشکیده زبانیله زبان بی زبان حق
ایدوب معبوده بیر حمد و ثنا یابن رسول الله
.
ثبوت عشق ایدوب معشوق عشقه قالدی حیرتده
او حاله انبیا و اوصیا یابن رسول الله
.
سن آگهسن گوتوردی سجدہ دن کیم جدّیوون باشین
دیلیم دوتمور ایدم شرحین ادا یابن رسول الله
.
او وقته خیمه لردن چخدی عمّه ن بینوا زینب
الى باشندا دلده وا اخا یابن رسول الله
.
یتیشدی شمر شومی گوردی قارداش سینه سی اوسته
پوزولدی دلدن اول کان حیا یابن رسول الله
.
ال آتدی دوتدی شمرین خنجریندن توکدی گوز یاشین
او یرده بنت شاه لافتا یابن رسول الله
.
ترحّم ایتمدی اول بینوایه شمر بی پروا
نقدری عمّه ن ایتدی التجا یابن رسول الله
.
حسیندن ال گوتوردی زینبین دوتدی گریبانین
بویاندی قانه ناموس خدا یابن رسول الله
.
ایشیتدی زینبون افغاننی شه گوزلرین آچدی
او حاله اولمادی جدّون رضا یابن رسول الله
.
دیدی یالوارما شمره گیت خیامه ای آنام باجی
قیتدی زینب بی اقربا یابن رسول الله
.
قالوب شمریله جدّون قتلگهده بزم وحدتده
حسین ایتدی عجب بیع و شرا یابن رسول الله
.
ویروب کالای هستی شاه دین اخذ مرام ایتدی
اولوب ظلمیله مذبوح القفا یابن رسول الله
.
دوتولدی گون یوزی بیر تیتردی اسدی قرا یللر
جهانی چولقادی گرد بلا یابن رسول الله
.
گیچوب زهرا چراغی دوندی ظلمت کون و امکانی
قورولدی عرشده بزم عزا یابن رسول الله
.
بُراقیله پیمبر گیتدی معراجه ولی جدّون
بُراقی اولدی بیر نوک جدا یابن رسول الله
.
او باشکه بسلمشدی سینه سینده فاطمه اولدی
او باشین منزلی مطبخ سرا یابن رسول الله
.
سنی زهرا آنان جدّون حسین عمّه ن خانم زینب
باجون معصومۀ غم آشنا یابن رسول الله
.
امیدیله دوتوب بو دامنون صحّافه لطف ایله
که سن سن معدن جود و سخا یابن رسول الله
.
یته فیض عالمه سندن قالام بی فیض من آیا
روادور یا علی موسی الرضا یابن رسول الله
.
شهِ عرش آستان کان کرم دریای رحمت سن
منم عبد ذلیل و بینوا یابن رسول الله
.
قویوب یوز اولمشام بیر آستانه من پناهنده
الا ای ملجاء شاه و گدا یابن رسول الله
.
الى بوش سائلون ردّ ایلمه ای منبع احسان
کرم قیل ویر صِله ایله عطا یابن رسول الله
.
امیدیم ملجأئیم سن سن اگر سن ایتمه سن چاره
ایدر بو دردیمه بس کیم دوا یابن رسول الله
.
شهاچوخداندی گوگلوم ایستوری جدّون حسین قبرین
اوزون ویر بیر برات کربلا یابن رسول الله
.
.
#رضویه_صحاف_تبریزی
#رضویه_مدح #رضویه_شهادت
#سلام_ای_مظهر_ذات_خدا_یابن_رسول_الله
#ترکی
.
#زبدةالاشعار
.
: @nohe_torki