شهادت حضرت موسی ابن جعفر (ع)
.
.
.
مرحوم خوندل تبریزی
.
سند الیندن گلمیشم جانه آنا یافاطمه
سنده گل بغداده زندانه آنا یافاطمه
.
.
کاش اولیدی ای آنا آزاده لردن بیر نفر
شعلۀ آهیله قلبیم تک یانیدی مختصر
بیر دییدی رحمسیز هارونه ای بیدادگر
سیلی ورمازلا مسلمانه آنا یافاطمه
.
.
من بو خلوتگاهیده جانانیله همرازیدیم
محو وصل یاریدیم عشاقدن ممتازیدیم
حلقۀ زنجیریمیله روز و شب دمسازیدم
شکر ایدردیم حىّ سبحانه آنا یافاطمه
.
.
قویمادی افسوس اولا دشمن منی اؤز حالیمه
یاد یاریله یتم قلبیمده کی آمالیمه
حالیمی احساس ایدر هر کیم باخار احوالیمه
گوز یاشیم آخدوقجا دامانه آنا یافاطمه
.
.
بیر گجه مندن اولور زنداندا زجریله سحر
قاتلیمده بیر گجه تخت زر اوسته صبح ایدر
وای او گوندن موج ایدر دریای قهر دادگر
غرق اولار ظالم او طوفانه آنا یافاطمه
.
.
ایتمدی رفتار دشمن منله بیر انسان کیمی
قلبیمی یاندیردی زهری آتش سوزان کیمی
قطره قطره قان دوداقیمده دوروب مرجان کیمی
لاله تک باغریم دونوب قانه آنا یافاطمه
.
.
نه عزیزیم وار آنا گورسون ملال فاشیمی
قلبی یانسون حالیمه سیلسون منیم گوز یاشیمی
نه قیزیم معصومه وار آلسون دیز اوسته باشیمی
همدم اولسون بو پریشانه آنا یافاطمه
.
.
واردی نه بیر اهل دل احوالیمی بیلسین منیم
گوگلومی آلسین ملالیم بلکه اسکیلسین منیم
نه گلور اوغلوم رضا گوز یاشیمی سیلسین منیم
بیر سو سپسون سوز پنهانه آنا یافاطمه
.
.
ایمدی جان ویرسم بو حالیله اگر زنداندا من
نه ایلیم وار نه قبیلم نه گلن وار نه گیدن
کیم مزاره تاپشورار کیم بس منه ایلر کفن
کیم گلر شام غریبانه آنا یافاطمه
.
.
چون ایدوب مشمول رحمت خالقیم اوز بنده سین
گون کیمی گورّم ایشیق تاریخمین آینده سین
مرگ باغلار هر گجه محکوم اولا پرونده سین
آشنا یا اولسا بیگانه آنا یافاطمه
.
.
سندی گورسم رنگ رخساریم دیمه قاچماز منیم
طایر روحیم بو خاکی دامدن اوچماز منیم
دشمن بی عاطفه زنجیریمی آچماز منیم
جان ویرم آسوده جانانه آنا یافاطمه
.
.
من آنا باشه یتوردوم باشدا کی تقدیریمی
اهل دل باخسا وجودیمدن گورر تصویریمی
قاتلیم ئولسمده آچماز جسمدن زنجیریمی
ظلم ایدر بیروح انسانه آنا یافاطمه
.
.
جان ویرنده دفنه راجع بیر وصیت ایلرم
بو مقیّد جسمیله محشرده شرکت ایلرم
منتقم اللّهه دشمندن شکایت ایلرم
انتظارم من او دیوانه آنا یافاطمه
.
.
نوکرون «خوندل» بو درگاهه قویوب چوخدان یوزون
وار سنه آرتوق ارادت اوندا آگهسن اوزون
قویما قالسون ننگدور بیگانه اللرده گوزون
تا قوتارسین عمری شاهانه آنا یافاطمه
.
.
#کاظمیه_خوندل_تبریزی
#کاظمیه_شهادت
#سند_الیندن_گلمیشم_جانه_آنا_یافاطمه
#ترکی
.
.
نظر دهید