زبانحال حضرت علی اصغر(ع)
..
..
مرحوم نخستین اردبیلی
..
..
سنگر عشقیده سربازی اوتاندیرما بابا
حمل إئله قتلگه عشقه یوباندیرما بابا
..
..
قوی دئسونلر او شهون هم دل و هم رازی گلوب
نخل دین اوسته قونا مرغ خوش آوازی گلوب
آخرین جبهه ده آخرده کی سربازی گلوب
آهی اوخ قدّی کمان سنگری شاهون قوجاقی
حیف اولا بیر بئله سربازه یانور دل دوداقی
..
..
بابا قربان اولوم أول قانیله دولمیش گوزوه
منى آغوشووه آل جلب إئله شیرین سؤزوه
جسموره یاره دگئده سپر ایله ئوزوه
سنه اوخ آتسالا دگسون صودامر اصغرووه
یاره لی بلبلووى آل بابا زیر پرووه
..
..
باباجان قویما منى ورطۀ خجلتده قالام
ایچرم قانیمی سو تک دئمه عطشاندى بالام
ایستورم قتله یتم من شهدا فیضین آلام
غسلیم ئوز قانیم اولا قونداقیم ای شه کفنیم
سینمون اوستی مزاریم اولا بو یر وطنیم
..
..
من نه سوفکری نه صود فکر و خیالین إئده رم
سن منی جنگه آپار تک گئده بیلسم گئده رم
نیلورم من آنا پستانینی پیکان اَمه رم
تیتریور قوش کیمی قلبیم منى ترک إئتمه بابا
کمگون یوخدی آپار اصغرى، تک گئتمه بابا
..
..
دینون اوستونده گئدوب جنگ إئلین پرهنرى
قویار آغلار آناسین ترک إئلین خیمه لرى
گورمیوب دور زمان من کیمی بیر صود امری
بیلمدوم کیم منی گهواریه سالمیشدی بابا
گؤزلریم یولدا الیم سینه ده قالمیشدی بابا
..
..
منتظر قویما قالام بو هیجان اوسته منی
گوزلیور حرمله نون تیری کمان اوسته منی
ویر نشان یاره لی جانانووه جان اوسته منی
سن کمک ایسته دون آتدیم بشیگیمدن ئوزومی
دیلیم اولمادی دییم دردیمی یومدوم گوزومی
..
..
ایستورم من آدیما صود امر عاشق دیه لر
دین حق اوسته ئولم پر هنر عاشق دیه لر
آچوب عشق اوسته عجب بال و پر عاشق دیه لر
عاشقم من ره جاناندا وئرم جان باخاجاق
بوغازیمدان اوخی ردّ ایلمه جانان باخاجاق
..
..
آنا پستانین آتوب باغلامیشام جنگه کمر
کیم گوروب جنگیده بیر قولّاری باغلی صودامر
نازک حلقین إئده اوچ شعبه لی پیکانه سپر
دگر اوچ شعبه لی اوخ حلقیمه فاتح چیخارام
اوجالار پرچم دین پرچم کفری یخارام
..
..
آنانون مهری اضافه اولى خوردا بالیا
راضی اولماز دگه پیکان آخا باشی دالیا
اودی قالدی بابا بو خوردا مجاهد دالیا
بیلورم دفتر عشّاقیده ثبت اولمیش آدیم
اودی ناخونیملن زلف سیاهیم دارادیم
..
..
ای اولان قانیله آلوده مبارک بدنی
لطف إئله مجلس شورایه چاقور انجمنی
سن وداع ایله سوسوز قیزلاروی منده سنی
بیز گئدک قتلگهه عمّه مه تاپشور آنامی
گئتمیه خیمه گهه باغلاماسونلار یارامی
..
..
من بساط چمن عشقیده یاهو دیه رم
آناما آغلاسا ای شه ملر آهو دیه رم
ایچرم قانیمی نهر اوسته، سرین سو دیه رم
سو آدین دوتسام اگر عشقیده عاشق دگولم
من بو قربانگهه قربانلیقا لایق دگولم
..
..
باشدا تاجون باباجان قاندی زرافشان یرینه
قوزی قربانی آپار بذل إئله قربان یرینه
نولی شهزاده نی ئولدورسه له سلطان یرینه
بالاجا قیزلارا خاطر سنی ئولدورمیه لر
بو آدامسیزلارا خاطر سنی ئولدورمیه لر
..
..
دینه قربان إئله دون قاسمووی اکبرووی
نیه تأخیره سالوبسان صود امر اصغرووی
قانیمیلن گرک امضاء إئلیم دفترووى
قورخورام آه چکم چرخ روشدن دایانا
گاهواره دوتوب اود آتش آهیمله یانا
..
..
سنه قربان اولوم ای پادشه عرش وقار
بدنون یاره لنوب جسمون اولوب نقش و نگار
منی گهواره ده قویما بابا یانونجه آپار
شه گئدن وقته شکاره أله شهبازین آلور
منى آلسون ألوون اوستونه باشیم اوجالور
..
..
باخما پژمرده اولان حالیمه افسوس إئلمه
درگهوندن صود أمر عاشقى مأیوس إئلمه
اینجیسه قانلو دوداقون دوداقیم بوس إئلمه
صبر إئله قانلو یوزون قویما سارالمیش یوزومه
دوداقون قانلیدی قاندان لکه سالمیش یوزومه
..
..
نه دور علت باشیم اوستونده منیم آغلار آنام
یاندیران ناله سی ایله ئوره گیم داغلار آنام
گئدورم جنگه گلنده یارامی باغلار آنام
صبر إئدوب آغلاماسون من هله جنگ اتمه میشم
گاهوارم منه سنگردی چخوب گئتمه میشم
..
..
طور سینادی بو یر جلوه ویرور قان شفقی
داغیلوب صحنۀ قرآنیده قرآن ورقی
ئولن ئولدى قالانیندا چکیلوبدور رمقی
او که سن سن کسیلوب طاقت و تابون گوردوم
پارچالانمیش باشووی قانلو نقابون گوردوم
..
..
بابا سندن نیه عبّاس عمومون یوخ خبری
دوتماز هچ کیمسنه سو آدینی یانسا جگری
سنى تک قویدى نیه ترک ائلدى خیمه لرى
هارا گئتدی او شجاعتلی سخاوتلی عموم
گوره بیلمزدی سنی یاره لی غیرتلی عموم
..
..
بابا فکر إئتمه علمدارون ئولوب یوخ کمگون
آغلاما محرم اسرارون ئولوب یوخ کمگون
بیلورم غم گونی غمخوارون ئولوب یوخ کمگون
ایستورم من سنون اللهه گوره یارون اولام
ایستورم پرچم آلام خوردا علمدارون اولام
..
..
یا که اغفال إئلیوبلر عَمومی خامه ایلن
اونی سندن آیروبلار بیر امان نامه ایلن
گئدورم نهر فراته عربی جامه ایلن
بالاجا بیر قیز اوشاقی منه همدم وئره سن
ألیمه قانه بویانمیش قره پرچم وئره سن
..
..
من او ماهین دوتولان خورداجا سیّاره سیم
سن اونون شمعی بابا من او مهون پاره سیم
چاره سیز پادشهین بیکس و بی چاره سیم
کاش ئولیدیم سنی من یاره لی گورجک باباجان
منی آغوشووه آل باشیمه ال چک باباجان
..
..
طایر روحیمی گهوارده سیخدون یارالی
اصغرین خیمه سی گهواره دی یخدون یارالی
شهدادن منی یانه نیه چیخدون یارالی
بودور عهدیم یره قانیم سوزولنده دوتاسان
بدنیمدن باشیم ای شه اوزولنده دوتاسان
..
..
آلتی آیلیق بالاسین گوردی بیر حالنده امام
سعى إئدور قتله یته کسب إئلیه عالى مقام
پاک خالق دن او شهزاده ائده اخذ مرام
باتماسا قانینه نازک بوغازی قان وئره جک
اودا گهواره ده لبّیک دیوب جان وئره جک
..
..
سنى ویرّم قسم عبّاس هنر پرورووه
یاره لی جسمی عباده قییدن اکبرووه
سر سپاه إیله منى قاره لچک لشگرووه
خورداجا مشگی سالوب چگنیمه دریایه گئدیم
گلسون آردیمجا سپاهیم بابا دعوایه گئدیم
..
..
ای «نخستین» آتا دردین چکه بیلمز بالاسی
ئوره گی یاره لنر یاره لی اولسا آتاسی
اصغرین دردینی آرتیردی حسینون یاراسی
یاره لیدی ئوره گی اصغرینون دگمه مش اوخ
قدین أکمیشدی بشیکده او یارا أگمه مش اوخ
..
..
..
#اصغریه #نخستین #اصغریه_شهادت #ترکی #زبدةالاشعار
نظر دهید