زبانحال امام حسین (ع) در شهادت علی اصغر (ع)
.
#زبدةالاشعار
.
: @nohe_torki
.
مرحوم معزی اردبیلی
.
شاه عطشان اصغرین تپراقیده پنهان ایدوب
زینبه اخیامیده گویا بیله اعلان ایدوب
.
گلمیشم گل منده زینب دیده گریانه باخ
چکمیشم اوخ حلق اصغردن الیمده قانه باخ
.
فاطمه مهریّه سیندن ذرّه احسان اولمادی
ئولدی ششماهم لب عطشان فرقهی عدوانه باخ
.
من دیدیم سعد اوغلونا زهرای اطهر اوغلیام
جدّیم احمددور گرامی دوت منی قرآنه باخ
.
باخمادی گفتاریمه ناقص قالوبدور موعظم
اوغلوما وردیردی پیکان خصمیده وجدانه باخ
.
هیچ گوروبسن گلستاندا گل سناندا شاخه دن
عالم فکرونده زینب غنچه خندانه باخ
.
بیر گل آویز تک آسلاندی باشی جسمیده
یانمیشام احوالینه میدانیده بحرانه باخ
.
باش گیدوب دال سمته گویا شکر ایدوب اللّهنه
رمزه باخ عشق عالمینده شکر بی پایانه باخ
.
هانسی گوهر هاشمیدور ارزشی سنماقدادور
گوهر علایه باخ عشّاقه باخ جانانه باخ
.
شاهرگ فوّاره تک قان آتدی دوتدوم اوجما
قانینی سپدیم سمایه قیمت قربانه باخ
.
گوزلرین یوممشدی پیکان دگدی آچدی گوزلرین
کربلاده احترام اصغر عطشانه باخ
.
گوردی زهرانی قباقینده دیور گل سینمه
قلب پر مهرینده رحم مفخر نسوانه باخ
.
ال ایاقین چالدی گویا عرض ایدوب گلدیم ننه
یاره لی سینونده پیکاندان یورولمش جانه باخ
.
سینووه آهسته گللم اینجمز پهلولرون
پنجه منحوس اعدادن سنان مرجانه باخ
.
زینبیم هیچ کیم قوجاقیمدن بالامی آل مادی
سن آدامسیز قارداشوندا درد بی درمانه باخ
.
سسلدیم عباسی سمت نهر علقمدن گله
گل دیدیم ای دادرس یالقوز قالان سلطانه باخ
.
ناگهان بیر سس گلوب قاز قبرینی قربانوین
من خلیله خالقیندن گلدیگی فرمانه باخ
.
اللّریم گلموردی قوملاردا جمالین گیزلدم
تز دیدی عشقیم شروط لوحه باخ پیمانه باخ
.
ویر خبر گلسون رقیه اصغره لای لای دیسون
آل کنارین خیمه سینده بلبل خوشخوانه باخ
.
قان دولان قونداقینی آچسون گوزل قارداشینون
خرداجا گهواریه سالسون سن ای فرزانه باخ
.
زینبیم بیر قاره معجر سال ربابون باشینه
اصغریم گلمز خیامه آز دینن میدانه باخ
.
سوندی شمعی ویر خبر پروانه شمعین گزمه سون
تئز یخار فرقت ربابی آتش هجرانه باخ
.
سسلنوب اوچ گون بالا یوخدور سویوم یوخدور صودوم
تیر عشقونلن عزیزیم یار دل شان شانه باخ
.
قانلی قنداقدان بیلر دلبندی نه حاله دوشوب
بیچدی خنجر تک بوغازین زهریلی پیکانه باخ
.
صود بیلوب قانین دولاندیردی دوداقینده دلین
اوخ اموب پستان یرینده قانه باخ پستانه باخ
.
یا حسین لطف ائت ، «معزّی» هر زمان پر شور اولا
گل ئولن گون قبرینه قوی قبریده پر نور اولا
#اصغریه_شهادت
#شاه_عطشان_اصغرین_تپراقیده_پنهان_ایدوب
#ترکی
.
#زبدةالاشعار
.
: @nohe_torki
نظر دهید