شب عاشورا-شب عاشقان
گریز به زبانحال حضرت رباب در شب عاشورا
.
.
مرحوم انور اردبیلی
.
.
شب عاشور حسین لیلۀ قدر شهدا
شب عشق و شب وصل و شب مردان خدا
شب پر شور همایون محبّان بلا
نور یکتا و جگر بند رسول الثقلین
قیلدی ابلاغ باشیندا گلن اشخاصه حسین
.
.
اولون آگه منه میقات شهادتدی بو یر
مرکز دایرۀ ظلم و جنایتدی بو یر
صحنۀ قتلدی هم صحنۀ غارتدی بو یر
ایندیدن ناظرم ئوز مقتلیمه مدفنیمه
الیمون پنجه سی محکم یاپوشوب دامنیمه
.
.
من بو صحرای غمه شهرتیچون گلممیشم
سلطنت حُبّی یوخوم شوکتیچون گلممیشم
کسب اموال و یا ثروتیچون گلممیشم
واهمم یو خدی قوی اولسا نقدری طرفیم
فقط احیای شریعتدی مرام و هدفیم
.
.
سوزی بی پرده دیدوم یول آچوق اولسون گیدنه
آرادان قیدی گوتوردوم هامی گیتسون وطنه
دگل اجبار حمایت ایلسون کیمسه منه
سیز گیدون فاطمه اوغلى وطن ایلر بو چولی
سولمیان گللری آچسا چمن ایلر بو چولی
.
.
باشدان اولادینون عشقین آتا بیلمز هر آتا
قالسا هر کیم منیله لازمه دور قانه باتا
باش و جان فکرینی بالمرّه گرک باشدان آتا
عشق سوداسی نه هرمست و خمارون ایشی دور
عاشق جان بکف و کامل عیارون ایشی دور
.
.
صورا فرمایش ایدوب اکبره ای مونس جان
سوندورون مشعلی خیمه اولا ظلمتده نهان
گیده گیزلینجه قرانلوقدا حسیندن اوتانان
خیمه اطرافی ایشیق اولسا اوز اوزدن اوتانار
نگران اولما بیزی ایستین عاشق دایانار
.
.
عمل اولدی او گئجه امر همایون امام
طمع ماله گلنلر هاموسی گتدی تمام
قالدی بیر عدّۀ انگشت نما پاک مرام
فوج آزاده و مردان برازنده سرشت
حسرتیدی اولارون وصلینه حوران بهشت
.
.
گیتدی اغیار، حسین باشه یغوب یارلرین
منظره ایتدی او مدهوش هوادارلرین
یوزلریندن اوخودی نیّت و افکارلرین
تک به تک هربیریسین اهل وفا گوردی حسین
اهل صدق و شرف و اهل صفا گوردی حسین
.
.
ویردی تشکیل حسین انجمن روحانی
قیلدی توجیه اولارا ایلدیگی پیمانی
بو گئجه آخر عمرومدی بلون عنوانی
صبح شاهد اولاجاق ضایعۀ پر اسفه
ظلمت شبده چخاردون ئوزوزی بیر طرفه
.
.
ای گرامی عموم اوغلانلاری مردان رشید
مسلمون غصّه لی قارداشلاری احرار سعید
باوفا قارداشوزی کوفه لیلر ایتدی شهید
یثربه عزم ایلیون موقع فرصتدی سیزه
محترم قارداشوزون داغی کفایتدی سیزه
.
.
دیدیلر مسلم ئولوب قانه دونوب گوز یاشیمیز
محضرونده سنون اما اوجالوبدور باشیمیز
مقدم پاکوه قربان ئوزومز قارداشیمیز
هانسی عاشق قیدوب کوی بلادن الى بوش
حقّیمیزده آتالیق ائت بیزیده مسلمه قوش
.
.
صورا یوز دوتدی ابوالفضلنه شاه شهدا
جمع ایله باشیوه قارداشلارون ای کان وفا
منی محصور ایلیوبدور بیلوسن فوج بلا
منتظردور سیزه یثربده آنوز امّ بنین
قوی حسینه ایلسون دشمن الیندن گلنین
.
.
قلب عبّاسه امامون سوزی چوخ ایتدی اثر
نوکرونده نه گوروبسن دیدی ای شاه مگر
آستانونده غلامم منی سن قوؤسون اگر
گئتمرم یثربه یا اینکه بیر آیری طرفه
الى قوینوندا بو چولدن گیدرم من نجفه
.
.
آند اولا اکبریوون جانینه ای میر حرم
گوزلریمدن اونی آرتوق بیلوسن ایستیورم
پیشگامونده اگر مین یول ئولم من دیریلم
نه ارادمده اولور نقص نه قلبیم چوبالار
شرف مقدموه عشق و علاقم چوخالار
.
.
.
شیر همت منه اوّلده ویروب صود ویره نیم
پرورش سیزله تاپوبدور آقا روح و بدنیم
سنه جانیم متعلقدی نئیم واردی منیم
عشقدن بی خبرم ای شه شایسته نظر
باشیمى قوللاریمی من ئوزومون بیلسم اگر
.
.
عشق عباسی حسین ایلدی جداً تحسین
گوردی شهزاده علی اکبری مبهوت متین
قیلدی فرمایش او والا گھره سرور دین
گورو سن کرب و بلا منزل آخردی منه
سنده لیلانون الیندن یاپوشوب گیت وطنه
.
.
دیدی قربان اولا جانیم باباجان گوزلریوه
گور بو هنگامه نه تکلیف ایدوسن اکبریوه
کرم ایت سفرۀ جودونده نمک پروریوه
گورورم دوره لیوب خیموی افواج ظلم
حق شناسم بابا جان من گرک اوّلده ئولم
.
.
آتالوق حرمتی قالسون هله دین صحبتی وار
ساخلیاق قانیله قرآنی ضروریتی وار
بو جهادون بابا والله منه چوخ لذتی وار
سالک صادق اولان دوز یولا هر یاندا گیدر
ولی عاشق ده یوز ایلّیک یولی بیر آندا گیدر
.
.
امتحان ایتدی حسین اؤز نفراتین او گئجه
جنّتین وئردی شهیدانه براتین او گئجه
خضرلر نوش ایلدی آب حیاتی او گئجه
وئردی دستور گیدون خیمه ده قرآن اوخیون
سورۀ یاسین ایله سورۀ رحمان اوخیون
.
.
هره ئوز خیمه سینی عزّتیله قیلدی مقام
ذکر و تسبیح و نماز ایتدی او مردان کرام
قلب آچوق گوزلر آچوق روح سبک نفس خرام
تلسوردی هاموسی مجلس وصلت آچلا
گئجه فوراً قوتارا صبح شهادت آچلا
.
.
دوشدی بو فکره حسین باش چکه بیر خیمه لره
تشنه لیکدن گوره تا کیمدی دوشوبدور خطره
گزدی آخرده سرا پرده نی آلدى نظره
او چادردا او توران عترت پیغمبردی
صدر مجلسده ربابیله علی اصغردی
.
.
سوسوزوندان صورا اول خیمه ده بیر سوز یوخودی
سارالان برگ گله بنزمین یوز یوخودی
اصغرون لبلرینه آغلامیان گوز یوخودی
سانا گلموردی او دیلسیز بالانون جان دیینی
بشیگین ترپدنی جانیوه قربان دیینی
.
.
دوره ورموشدیلا گهواره سینی دایره تک
آنا سسلردی الهی بالاما ایله کمک
بحر غمدن بو قرا بختی ئوزون ساحله چک
صودسوزم هم سوسوزام قلبیده دردیم چوخدی
ئولسه بوندانصورا دنیاده بیر اوغلوم یوخدی
.
.
آلتی آیدور بو سولان غنچه نی تر ساخلامشام
برج عصمتده گوزل قرص قمر ساخلامشام
صود ویروب سینمون اوسته صودامر ساخلامشام
نیلرم دست خزان دگسه بو افسرده گله
ایندی ایندی بالام ایستوردی باخان وقته گله
.
.
بشیگیندہ چوبالور ایستورم آغوشه آلام
آلورام یوخلامور اما بشیگه بیرده سالام
شرم قویمور گیدوب عبّاسه دیم ئولدی بالام
گاه امورصاق دوشومی گاهی امور صول دوشومی
یوخدی بیر قطرہ صودیم گر امه مین یول دوشومی
.
.
کهربا رنگینه بنزتمش عطشلیک یوزونی
قنادی باغلى کبوتر تک ایتورموش ئوزونی
دولودور آغزی سوزیله دیه بیلمور سوزونی
دام صیاده دوشن آهویه بنزر باخشی
قلبیمی پارچالیور باخدوقیجا هر باخشی
.
.
چاره سیز قالماسون عالمده منیم تک هیچ آنا
بو اوشاقی گیجه وقتی آپاروم من هایانا
بو حزین سس بو سیزلتی اورک ایستور دایانا
صودیله ساکت اولار صود امه نون آغلیانی
نا امید ایله الهی سو یولون باغلیانی
.
.
چوخ عزیزیدی ربابون یره دوشمزدی سوزی
راحتیدوم نجه خیممدہ گجیله گونوزی
هامودان بختوریدوم فلکون دگدی گوزی
وای منه هانسی امیدیله ایدوم قلبیمی رام
گوز قباقینده نجه اوغلوم ئولور من باخورام
.
.
اجلون سایه سی گهواره سینه سایه سالوب
ایستیدن گوز آچا بلمور ئورگین ایستی آلوب
او زموشم من الیمى قالماقی اقباله قالوب
نذر شرعی ایدورم ای حق ذوالفضل حکم
وطنه گئتسه سلامت نچه قربان کسرم
.
.
.
#شب_عاشورا #انور_اردبیلی #اصغریه_انور_اردبیلی #اصغریه #ترکی #زبدةالاشعار #یادگار_انور
نظر دهید