زبدةالاشعار

شب فراقده دوشدی خیاله صبح وصال #حسینیه_سعدی_زمان

اتمام حجة حضرت حسین (ع)
174 بیت در حالات شهادت و اصابت کردن تیر به قلب حضرت ، از اسب افتادن حضرت ، کشمکش حضرت زینب با شمر ملعون – غارت خیام
.
.
.
مرحوم سعدی زمان
.
.
شب فراقده دوشدی خیاله صبح وصال
عذاریمه جریان ایتدی گوزدن اشک زلال
.
خیالی مون قوشی چیخدی باشیمدان اولدی کنار
دولاندی ایلدی میدان کربلایه گذار
.
باخاندا رزم گه پر بلایه طایر دل
نگوردی نوره اولوب کفر ظلمتی حایل
.
اویاندا دسته بسته دوروب اهالی شام
بویاندا اللری قوینوندا تک قالوبدی امام
.
اویان طرفده رعیت فرحله طبل چالور
بویاندا هر باخانون شه قرارین الدن آلور
.
دوتوب یوزین قوشونا پادشاه بی لشگر
یانقلی دللریله سسلنور او بی یاور
.
کومکلریم قریلوب یالقوزام بو صحراده
من غریبه یتن یوخدی بر نفر داده
.
او پادشاهم الیمدن گیدوب جلال و سپاه
آلوب سپاه کیمی دوره می فغانیله آه
.
او پادشاهم ئولوب یاور و هواداریم
یاتوب علم بویانوب قانینه علمداریم
.
دلیمده ناله ایکی گوزلریمده قانیاش وار
منه جواب وئره ،نه اوغول نه قارداش وار
.
امان نه سوز جگر نه سرشک ناب ویرور
اوغول دینده منه اوخ قلج جواب ویرور
.
خیال ایلمیون فکر ملک و مال ایدرم
سیزه ئولنلریمون قانینی حلال ایدرم
.
بشرط یول ویره سوز ترک جاه و عزت ایدم
عیالیمی گوتوروب یوز قویوب فرنگه گیدم
.
گلون ترحّم ایدون دلده چوخ ملالیم وار
صفوف دشمن آرا بی بؤلؤک عیالیم وار
.
امامم عالم احکام نص قرآنم
امام بلمسوز آخر که بیر مسلمانم
.
ندن روا گوروسوز بر بیله منه ذلت
مگر شریعت اسلامه قویموشام بدعت
.
سیزون حراموزی آیا حلال ایلمشم
و یا حقوقوزی من پایمال ایلمشم
.
یارالیم یارالار سلب صبر و تاب ایدوری
عطش جگرلریمی یاندورور کباب ایدوری
.
یهود و گبر و نصارایه اولمیوب سوحرام
گلون ویرون بر ایچیم سو اماموزام سوسوزام
.
عطش اودی بو یانان قلبیمی آلشدیروری
دیمون که عجز ایدورم غم منی دانشدیروری
.
تمام ظلموزه بوگون تحمل ایلمشم
دیون گوروم سیزه ای شامین اهلی نیلمشم
.
ایدنده دشمنه اتمام حجت اول سرور
قشوندان آیرلوب اول دمده بر ستم پرور
.
گوتوردی یردن الینه او سنگدل بیر داش
توکوب بهشتده زهرا عذارینه قانیاش
.
او داش بهشتده پیغمبرین بئلین اگدی
گلوب امام حسین سجده گاهینه دگدی
.
یاریلدی سجدہ گهی چکدی شاه دلدن آه
آخوبدى قان بویانوب قانیله جمال الله
.
یغوبدی دامن پیراهنین سیله قانی
بیر آیری ظلم اودی یاندوردی قلب زهرانی
.
#اصابت_کردن_تیر_بقلب_قلب_عالم
.
اسوب سموم ستم گلستان دین سولدى
دل امام زمان گون تک آشکار اولدی
.
اوتوزدی حرمله نرد ریاسته اوزینی
قشوندان آیریلوب اولدم ووروب یره دیزینی
.
اولوبدی پیل هوا اسب عقلینه غالب
رخ امامه اولوب عاقّ شهرته طالب
.
هوا پرستلقین جامی ایلدی مدهوش
خیال ایدوب ایده نور امامتی خاموش
.
بو بی حیالیقی گورجک او بی مروّتده
قالوب او چولده سواره پیاده حیرتده
.
نشان ایدوب او شهی بیر کمان اله آلدى
تمام عالم امکانه ولوله سالدى
.
کمانه قویدی بیر اوچ شعبه زهرلی پیکان
قالوبدی خانۀ حیرتده مات امام زمان
.
اولاندا رد کماندان او تیر زهر آلود
نگار محفلینه شاه دین اولوب موعود
.
هواده اوخ پر آچوب متصل دیوب قان قان
دل امامی یاروب چخدی پرلری دالیدان
.
امام گوردی که قان موجی داشدی سدّ اولماز
قاباق دان اوخ نقدر زور وورسا ردّ اولماز
.
دالی طرفدن اوخی چکدی شاه عرش جلال
گوروب که پیک اجل گلدی ایتدی استقبال
.
بلا و غم قد سروین هلال تک اگدی
دوباره گلدی بیر اوخ ناف پاکینه دگدی
.
او اوخ همینکه دگوب تاب و طاقتین آلدى
همان او اوخ آقامی ذوالجناحدن سالدى
.
#از_اسب_افتادن_امام_مظلوم
.
ایدوبدی خم بیلینی ذوالجناح خوش فطرت
یخلدى صاحبی بلکه اولا بیر آز راحت
.
کمیت عشق امام زمان اولوب سرکش
ایدوبدی قبرینون اوستنده نچه ساعت غش
.
کسلدی نطق قشوندان جهان اولوب مبهوت
امامه اولدی عزا خانه عالم لاهوت
.
گلنده هوشه دوباره امام عرش مقام
بویوردی یاندیم عطشدن ایا گروه لئام
.
عطش شراره سالوب قلب مضطریم یاندى
گلون ویرون بر ایچیم سو جگرلریم یاندی
.
قشون هجوم ایلیوب آلدی دوره سین یکسر
قالوبدی لشگر الینده او شاه بی لشگر
.
قلج ووران اوخ آتان اول قدر یارا ووردی
فرات تک قان آخوب قتلگاهی دولدوردی
.
گوگ اهلینه وروب اود یاندوروبدی تشنه لیقی
یارالی جسمینی اورتوبدی اوخ قلج سینقی
.
آخوب باشی دالیا نحر پاکی اولدی عیان
سِنان النده گوزین قان دوتوب یتشدی سَنان
.
وروبدی زوریله نیزه بوغازینی بیچدی
بیچوب بوغازینی نوک سنان یاروب گیچدی
.
اوجی بوغازدا بوروب نیزه سین او کفر انجام
نه عرض ایدوم که نحاله دوشوب یارالی امام
.
عزا بساطی خداوند لامکان قوردی
او قدر یاره او مظلومه هر گلن ووردی
.
#آمدن_شمر_ملعون_به_قتلگاه
.
یارا ووران یورولوب دور و بردن اولدی کنار
قالوبدی قتلگه ایچره شه فلک دربار
.
قشوندان آیریلوب اول دمده شمر بی پروا
باشین آچوبدی ایدوب ناله حضرت زهرا
.
قالاندا یتماقا شاه شهیده یدّی قدم
دایاندی گردش افلاک تیتردی عالم
.
ازل قدم گوتورن وقتیده او نسل زنا
ملک لر آغلادى قان چکدی بانگ واویلا
.
ایکمجی دفعه قدم گوتدی چون او شوم پلید
گوروب او حالی دوشوب اضطرابه عرض مجید
.
گوتوردی تا قدم ثالثین او کین گستر
بهشت دن او چوله باش آچوخ گلوب حیدر
.
چهارمین قدمینده چکیلدی عرشه قرا
پیمبر آچدی باشین توکدی گوز یاشین زهرا
.
تزلزل ایتدی بشیمجی قدمده کون و مکان
دیسم اگر یری وار آغلادی خدای جهان
.
الینده خنجر آتان وقته ششمین قدمین
گوتوردی تاجینی گلدی نوایه روح الامین
.
گوتوردی تا او ستم پیشه یدّیمنجی قدم
داغتدى ساچلارینی یوزلرینه اهل حرم
.
همان او حالده تا یتدی شمر دون دوردی
پیمبر اوغلونا ازّلده بر تپوک ووردی
.
باخوب نگوردی ایدوب یاره جسمنی گل گل
دوروبدی سینه ده اوخ دسته دسته چون سنبل
.
ایاقینی گوتوروب زینبون ایوین یخدی
غلطدی سینه دئسم اوخلار اوستنه چخدی
.
او وضع حالی گتور مز یقیندی کیمسه دله
دلیمده یوخدی توانا اوزون تصور ایله
.
بو سهلدور یارالار شاه دینی یورموشدی
خدنگ لر پر آچوب سینه سینده دورموشدی
.
ایاق قویاندا او اوخلار دوباره دن گیچدی
قاریشدی بیر بیرینه یاره یاره دن گیچدی
.
امین وحی آچوب باشه هواده چکدی صلوه
دیدی نمازه گلون جان وئرور ولی الله
.
#آمدن_حضرت_زینب_به_قتلگاه
#کشمکش_حضرت_زینب_با_شمر
.
حریم عصمته کشف اولدى اول زمان مطلب
ایاق یالین باش آچوخ چخدی خیمه دن زینب
.
یتشدی قتلگهه تا او زار و دلخسته
نه گوردی شمر اوتوروب سینۀ امام اوسته
.
گورنده قاتل الینده یارالی قارداشینی
گوزینده خون دلیله قاتوبدی گوز یاشینی
.
سرشک چشمیله سوندوردی سوزش دلینی
یوگوردی آتدى الین دوتدی قاتلین الینی
.
بویوردی کسمه اماندور دایان ندور بوعناد
پیمبر اوغلونی ئولدورمه ای ایوی برباد
.
دایان آماندی دایان باغلیوم ایکی گوزینی
ویرنده جان چوووروم باری قبلیه یوزینی
.
دایان اماندی دایان آرزوسنه یتوروم
گیدوم بالالارینی باشی اوستنه گتوروم
.
دایان اماندی دایان قویما سوزغمله یانوم
او قدر کسمه گلیم بیرده باشینه دولانوم
.
ایاقون آتدا گورورسن نفس شماره دوشوب
اجل تری گتوروب حال احتضاره دوشوب
.
دایان اماندی دایان آنّینون سیلم ترینی
آلوم کناریمه جان اوسته قانلو پیکرینی
.
دایان آماندی دایان آزعنادیوی بُلدور
سوسوزدی ئولدوروسن ایمدیکه سو ویر ئولدور
.
بو قیل و قالده گوز آچدی سید الشهدا
گلوب تکلمه فرمایش ایتدی یا اختا
.
شرار آهویله وورما اود یانان دلیمه
آماندی صبر ایله یالوارما باجی قاتلیمه
.
قایت خیامه یغ اهل و عیالیمی باشوا
سسون اوجاتما یواش اوخشا آغلا قارداشوا
.
حریم عصمته بو چولده یار وغم خوار اول
یتیم قیزلاریما هر زمان پرستار اول
.
حیالی قیزلاریمی قویما اشقیا یورسون
آلاندا معجرینی قمچی شمر دون وورسون
.
منیم که امریمی ویردی تمام قوم شریر
ایده لّه ظلمیله اولاد مصطفانی اسیر
.
چکلّه شاهم طرف دست بسته دلخسته
وورا وورا سپه شام ناقه لر اوسته
.
خرابه مسجدی آلُ اللهه ویره لّه مکان
آتالّا مسجده چون چخسا جلددن قرآن
.
همان خرابه ده هرغم یتوشسه ایتمه گله
یتیمه قیزلاریما من کیمی نوازش ایله
.
منیم بوخواهشیمی گوزدن ایباجی آتما
بالام رقیّه نی یوخلاتمیونجا سن یاتما
.
امام امرینه علیا جناب اطاعت ایدوب
یانایانا قیدوب سمت خیمه گاهه گیدوب
.
#مکالمه_امام_مظلوم_با_شمر_ملعون
.
گل امامته آز قالدى باد ظلم اسسون
دوشوبدی شمر بوفکره حسین باشین کسسون
.
صاق الده خنجری اودلاندی کین اودی داده
صول الده دوتدی امامین محاسنین الده
.
نقدر جهد ایلیوب زور وئردی خنجرینه
او خنجر ایتمدى تأثیر امام حنجرینه
.
همان بوغازدان اوپردی همیشه پیغمبر
او دور سبب که حیا ایتدی کسمدی خنجر
.
اگر چه کثرت زخم ایلمشدی چوخ بیحال
ولی دوباره گوز آچدی امام عرش جلال
.
بویوردی شمره که ای ظالم ستم پیشه
ندور بو ظلم قیامتدن ایله اندیشه
.
اولوبدی تار ایشق گون بو چشم پرنمده
ندن نشیمن ایدوبسن یارالی سینمده
.
منی که ئولدوروسن ای لعین کین گستر
کناره چک گیومون سینه وی منه گوستر
.
آچوبدی سینه سینی شمر شوم بی پروا
امام باخدی بویوردی صدقت یا جدّا
.
سئوال ایتدى اودم اول لعین بدفرجام
که ای بوگون یر اوزینده جهانیانه امام
.
بویور گوروم نه دیوبدور رسول عالمیان
بو سرّی کشف ایله قویما منی قالوم نگران
.
جواب ویردی که ظالم منه بویوردی رسول
حسینیم ایلیه جاق بیر نفر سنی مقتول
.
ملک لر آغلیاجاق اول ستمگرین ایشینه
دیشندہ چوخدی شباهت اونون دوغوز دیشنه
.
دیدی بر آیری علامت منه دیوبدی گینه
دیدی که اَمجَگون اوخشار دیوب ایت اَمجَگینه
.
دیدی ایته – دوغوزا – ایلوسن شبیه منی
بیر ایله وضعیله ئولدورّم ایمدی منده سنی
.
بابان پیمبرین اود وورام اودلانان دلینه
گلر بو چولده آلار آق محاسنین الینه
.
یارالی پیکروی سالّام ایله بیرحاله
آنان بتول آچار باشینی ایدر ناله
.
حیالی عترتوون باشلارینا کول توکرم
آتان ولی خدانون بو گون بیلین بو کرم
.
دیوب بو سوزلری زهرانی ایتدی دلخسته
دوروب امامی چووردی سالوب یوزی اوسته
.
تزلزل ایلدی گوگلر دایاندی چرخ فلک
قرا یل اسدی دوشوب اضطرابه خیل ملک
.
گیچنده خنجر قاتل ورید عظمادن
معاینه یره قان یاغدى عرش اعلادن
.
غبار غم اوجالوبدور دوتولدی روی هوا
یریله گوی آراسندا دوروبدى ابر بالا
.
هواده ابر بلا باخدی زینبون یوزینه
اونون گوزیندن آلوب قانی دولدوروب گوزینه
.
پیمبر عترتی باش آچدی ساچلارین یولدى
سرشگ خونیله ابر بلا گوزی دولدی
.
ویروب تسلی دل رعد و برقیله اوزینه
گلوب تلاطمه قان یاغدوروبدی یر یوزینه
.
غروب ایلدى قان ایچره مهر چرخ افروز
بسان شب گورونوبدور سپهرده اولدوز
.
دوتولدی گون یر اوزی ایله تیره تار اولدی
قیام حشر همان چولده آشکار اولدی
.
او رحم سیزلره رحم ایتدی معدن رحمت
رضاسی اولمادی دولدورسون عالمی ظلمت
.
اوجالدی گون کیمی باشی جدا باشندا دوروب
دوباره دن او بیاباندا شور حشر قوروب
.
جدا باشندا سالوب گون کیمی جهانه ضیا
طلوع ایلدى مهر منیر آچلدی هوا
.
گلوب تکلّمه محبوب خالق اکبر
دیلینده ایلدی الله اکبری ازبر
.
خیال ایلمیوبلر او اشقیای جهول
که ایلیوبدیله الله اکبری مقتول
.
نه حقّیدن نه پیمبردن ایلیوبله حیا
اولوبلا کلمۀ تکبیره سر بسر گویا
.
#غارت_خیام
.
چالوردی طبل فرح کوفیان بی ایمان
ویروبدی غارته سعد اوغلی لشگره فرمان
.
او حکمی تا ایشیدوب اشقیای کوفه و شام
پیاده آتلو هجوم ایتدی خیمه گاهه تمام
.
دیمه که کینه دن اول قوم کینه جو دویدی
او بیحیالر حیالی خانملاری سویدی
.
گیرنده خیمه گهه ازدحامیله کفار
نه عرض ایدوم که نه احواله قالدیلار بالالار
.
بیری تاپولمادی حالین حرملرین بلسون
کیچیک اوشاقلار ایاق آتدا آز قالوب ئولسون
.
بیر اوزگه حکم ایدوب اول دمده ابن سعد لعین
دیدی که یاندورون آل اللهین بو خیمه لرین
.
چادرلارا ورولوب اود حرملر اودلاندی
حرم تالاندى حرم خانه اود دوتوب یاندی
.
سالوبدی اهل حرم آهی عالمینه شرار
حضور حضرت سجّاده گلدی زینب زار
.
ایدوبدی عرض که ای پیشوای کل امم
او قدر قالمادی یانسون ا د ایچره اهل حرم
.
اشاره ایله بویوردی یوخ ایمدیکه غمخوار
خبر ویر عمه داغلسونلا چوللره بالالار
.
گوروبله چکموری ظلمندن ال او قوم نفاق
چخوب قاچوب چوله سرپا برهنه عورت اوشاق
.
کبوتران حرم چوللره داغلدی تمام
یانار اود ایچره قالوبدور ولی علیل امام
.
روایت ایلوری راوی یاناندا خیمۀ شاه
دوروب کناردن ایلوردوم اهل بیته نگاه
.
داغلدی چوللره یکسر حرایم عصمت
نگوردوم اوندا اوجا بویلی بیر خانم عورت
.
بسان سیل ویروبدور اجازه گوز یاشنا
یانا یانا دولانور بیر یانان چادر باشنا
.
دگن زمان او حیالی خانم منیم گوزیمه
گوروب او حالتی ایتدیم خیال اوز اوزیمه
.
بوعورتین گیدوب الدن تمام دادرسی
نقدر واردی بونون مال و دولته هوسی
.
نگی قالوب گوره سن اوردا مال دنیادن
که ال چکنموری اوندان او مبتلای زمن
.
ایدوب منی متحیّر او پراسف احوال
باخوب اوعورته ایلوردوم اوز اوزیمه خیال
.
نه گوردوم ایتدی او عورت او دمده بیر شیون
الین قویوب باشنا یاحسین دیدی بردن
.
اوزین وروبدی اودا صبر خیمه سین یخدی
او قدر گیچمدی گوردوم او خیمه دن چخدی
.
گوزینده سیل کیمی گوز یاشی گلوب جوشه
باخاندا گوردوم آلوب بیرعلیلی آغوشه
.
سرشک چشمی دیر سن بیر ابر باراندی
دیور ترحّم ایدون قوم دون بالام یاندی
.
باخور او ناخوشا آغلور یانور ایدورافغان
یانا یانا دیور اولسون بی بون سنه قربان
.
یتوب او وقتیده شمر جفا و کین آئین
الین آتوبدی امامین دوتوب گریبانین
.
ز بسکه دوتموشیدی گوزلرینی ناحق قان
دیدی که زنده بونی قویمارام قالا بیر آن
.
یزیده خدمتیمی من بو چولده بُلدوردوم
بونون آتاسینی عطشان بوچولده ئولدوردوم
.
گوزیندن ایمدی بونون قانلو گوز یاشین کسرم
آتاسی تک بو علیلونده من باشین کسرم
.
دوباره زینبی یاندوردی اول ستم پرور
امامی یخدی یره قویدی حلقینه خنجر
.
گوروب بوحالی دوشوبلر هراسه آل الله
آپاردیلار هاموسی ابن سعد دونه پناه
.
چکوبله صف او لعینون برابرینده تمام
گوروب بوحالی سئوال ایلدی او بد فرجام
.
دیدی چوخ آغلامیون آزمنی فکار ایلیون
ندور مرام دلوز ایمدی آشکار ایلیون
.
دیدیله شمر لعین آرتوروب ملالیمزی
علیلى ئولدوره ایستور پوزوبدی حالیمزی
.
شقاوتین بو بیاباندا قویما بُلدورسون
آماندی قویما بو ناخوش جوانی ئولدورسون
.
ایدوبدی امر عمر سعد بیجیا و لعین
گوتوردی شمر جفاجو همان او ایشدن الین
.
مخدّراته ایدوب ابن سعد بیرده نظر
گوروب قایتموری اهل حرم دوروب یکسر
.
دیدی گینه نه دیورسوز ندن قایتمورسوز
دایانماقوزدا ندور مقصدوز که گتمورسوز
.
جواب ویردی او کین گستره مخدره لر
نه ایتمشوق سیزه بیز اهلبیت پیغمبر
.
تمام دور بری دولدورو بدی نامحرم
روادی باشی آچوخ قالسون اهلبیت حرم
.
دیمه سپاهوه زیورلریمزی ویرسون
ولیک امر ایله معجرلریمزی ویرسون
.
قبول ایتمدی بو خواهشی او بی ایمان
قایتدی یاسیله آل رسول عالمیان
.
او گون حریم حقه کیمسه دادرس یوخیدی
حرملرین الم و محنت وغمی چرخیدی
.
یانوب تالانمشیدی گرچه یکسر آل رسول
ولیک هیچ بیری زینب کیمی دگلدی ملول
.
سبب اودور ایتورن وقت اهلبیت اوزینی
دیردی زینب کبرایه هر بیری سوزینی
.
ولیک زینبون احوالینی بولن یوخیدی
او چولده بیرجه نفر دادینه یتن یوخیدی
.
نه تک منی شرر محنتی اونون داغلار
صباح وشام امام زماندا قان آغلار
.
«حسینی» زینبون احوالی ثبت او لونسا اگر
الونده نوک قلم اود توکر یانار دفتر
.
اگر چه ایلمیسن چوخ گناه و امر شنیع
ولیک زینبی درگاه حقّه ایله شفیع
.
بیر اربعین سنه شامل ایده کرامتنی
نصیب ایده او یانان خیمه گه زیارتینی
.
گر ایسته سن ایکی دنیاده عز وجاه و جلال
اوزون همیشه خانم زینبون کمندینه سال

متن پیشنهادی:  قلبیم گینه دولدی غمیلن #ورود_محرم_معروف_اهری

.
.
#حسینیه_سعدی_زمان
#حسینیه_شهادت
#غارت_خیام #قتلگاه #دایان_آماندی_دایان
#شب_فراقده_دوشدی_خیاله_صبح_وصال
#ترکی
#کنزالحسینی2 ص 104
#زبدةالاشعار

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی