شب عاشورا
.
#زبدةالاشعار
.
: @nohe_torki
.
مرحوم وافی
.
شمردن مهلت آلوب رکن هدایت بو گجه
ایده معبودینه کامینجه عبادت بو گجه
.
بو گجه آل علی صبحه کیمی راحتیدی
واریدی چون هله انصار امامت بو گجه
.
خیمه لر دوره سین عبّاس علی اکبریله
قلج الده گزوب ایلردی حراست بو گجه
.
گه گیدردی علی اکبر گهی قاسم گهی عون
ایتمگه عابد سجّاده عیادت بو گجه
.
خیمه گاه ایچره یاناردی بو گجه شمع و چراغ
واریدی عترت طاها ده فراغت بو گجه
.
باخوب عبّاسینه کلثوم دیردی نه روا
صبح اولاندا باتا القانه بو قامت بو گجه
.
اوخلانا مشگی یاتا بیدقی قولّاری گیده
اولا باشدان باشا گل جسمی جراحت بو گجه
.
امّ لیلا دولانوردی علی اکبر باشنا
چکوب آغوشینه ایلردی زیارت بو گجه
.
گه دیردی آنان ئولسون بالا سنسیز آناوون
قولّارین باغلیاجاق قوم ضلالت بو گجه
.
که اؤپوب اصغر آناسی علی اصغر بوغازین
یات دیردی سینم اوسته بالا راحت بو گجه
.
قوی باشون سینه مه یات سنده یاتوب حرمله ده
صبح اولونجا هله فرصتدی بو ساعت بو گجه
.
گه سریه دوتوب اوز قاسمه سویلردی اوغول
طوی اطاقون اولاجاق ظلمیله غارت بو گجه
.
بو گجه سنده عروسونده گیدون راحت اولون
گله جاق باشوزه صبح اولسا چوخ آفت بو گجه
.
قطعه قطعه سنی ظلمیله عدو دوغریاجاق
نو عروسون اولاجاق بند اسارت بو گجه
.
وافیا یاز ولی یازدوقجا احبّانی بو سوز
یاندوروب ایلدی آماج ملالت بو گجه
.
.
.
#شب_عاشورا_وافی_تبریزی
#شمردن_مهلت_آلوب_رکن_هدایت_بو_گجه
#ترکی
.
#زبدةالاشعار
.
: @nohe_torki
نظر دهید