در جلالت اباعبدالله
.
کریلایی رحیم شایان ارومیه
.
شهنشاه قدر قدرت حسیندور
جهاندار قوی شوکت حسیندور
وئروبدور عالمه درس شرافت
بلی عزت حسین غیرت حسیندور
.
.
حسیندور رونق دین الهی
حسیندور عرش حقون شاهراهی
او اندازه گوزلدور بارگاهی
خجالتده قویوبدور مهر و ماهی
.
.
حسین عاشقلره نعمت باغیشلار
حسین عالملره رحمت باغیشلار
چکر عاشقلرین گرداب غمدن
کرامتدن آقا جنت باغیشلار
.
.
حسین سرمست دادار یگانه
حسیندور رحمت حقه بهانه
چاغور آدون اورکدن عاشقانه
آپارسون عرشه قاتسون عرشیانه
.
.
حسیندور مالک دنیا و عقبا
اودور دردانه ام ابیها
آتا حیدر عزیز حی یکتا
آناسی خیر نسوان دخت طاها
.
.
حسینیله عجین اولموش سرشتیم
اونون مجلسلری اولدی بهشتیم
چاغوردوقجا آدون مست اولموشام من
حسینه باغلانوبدی سرنوشتیم
.
.
جلالتده یقین همتاسی اولماز
سپاه کفریدن پرواسی اولماز
جهانی دولدورا سردار و سرهنگ
اونون خاک ره عباسی اولماز
.
.
حسیندور مغز دین روح عبادات
اونیلاندی قبول و رد طاعات
ازلدن حشره جک اولماز نظیری
حسینین ائتدیقی آخر مناجات
.
.
حسینلن زنده قالدی شرع اقدس
دینده هل معین یر گوی ویریب سس
اونون باشون کسنده شمر ارذل
قالایدی گردشوندن چرخ اطلس
.
.
#گریز #حسینیه_شهادت
.
یاغیش مثلی یاغیبدی اوخ او شاهه
توجه ائتمدی سایسیز سپاهه
کسیلمزدی سوسوز لبلردن الله
نظر قیلدی فقط وجه الهه
.
.
آچوبدی نیزه لر جسمینده دخمه
ولی چوندرمدی لبخندین اخمه
او قدری دگدی خنجر نیزه شمشیر
دونوب پیکر نمایشگاه زخمه
.
.
بویوردی ای حبیب چاره سازیم
بو من بو قان ایچینده دستمازیم
حسین ایلیر سنیلن عشقبازی
منیم جبریلیوه یوخدور نیازیم
.
.
عطش گر چه یاغور قانلی لبیمدن
اگرچه ناگرانم زینبیمدن
ولی غرقم تجلای حضوره
اودور ال چکمرم من (یاربیمدن)
.
.
عجب عالمدی یارب عالم عشق
یوخومدی آیری غم الا غم عشق
دگور هر قدر یاره جسم زاره
آچور بو بنده وه پیچ و خم عشق
.
.
سیزیلدیر یاره لردن گر وجودیم
سنی سسلور الهی تار و پودیم
دگیشمم کائناتیله بو حالی
که قان ایچره اولور آخر سجودیم
.
.
الهی ایتدقون احسانه مین شکر
خدایا لطف بی پایانه مین شکر
حسینی ایلدون شاه شهیدان
مقام و منصب شایانه مین شکر
.
.
نظر دهید