زبدةالاشعار

شورش که سالار عالمه شوریده سر عاشق #حسینیه_سعدی_زمان

شرط عشق چیست ؟ و عاشق کیست ؟
مناسک حج حسینی
.
.
.
مرحوم #سعدی_زمان
.
.
شورش که سالار عالمه شوریده سر عاشق
معشوق پرست ایستر اولا هر بشر عاشق
.
مالک اولا هر مامَلَکِ عالمِ عشقه
عالمده هامی مامَلَکندن گیچر عاشق
.
ترکِ وطن ایلر گوتورَر اهل و عیالین
خائِف یَتَرَقَّب گیجه باشلار سفر عاشق
.
بیر مرغِ قطا تک بالالار زیرِ پرینده
صیّادین اَلیندن وورار آهسته پر عاشق
.
یوز کعبۀ مقصوده طرف کعبیه مُحرِم
یولّاردا دِیَر غملره لبّیک لر عاشق
.
تا مأمنِ عالم ایدر اول مأمنی مسکن
احساس ایدر اوز عشقینه خوف و خطر عاشق
.
هولیله گینه دالدالانار حولِ حرمده
وقفه یتوشر فرصتی ویرمز هَدَر عاشق
.
باشلار قوتارار عُمره طوافیله نمازین
سعیِنده گورَر دوره ده بیر شور و شَر عاشق
.
ناچار قویار حَجّنون اعمالینی ناقص
تکمیلین ایدر عشقیله مدِّ نظر عاشق
.
تقصیرین ایدرکوفه دیارینده همان گون
اَل نایبِ خاصّندان او یردن اوزَر عاشق
.
تقصیرده معلوم اولونار سیرتِ حجّی
تحلیقه گوراخ نیلیه نیکو سِیَر عاشق
.
باغلار حرمِ کعبه دن احرامِ محبّت
اوز حجّنه لایق عرفاته کوچَر عاشق
.
عشقیله گیجه گوندوز ایدر طیِّ منازل
چوخ آز او اوزاق یولّاری منزل کَسَر عاشق
.
همره لَرینی یولدا چه مُسلِم چه نصارا
بیراهه گیدنلر آراسندان سِچَر عاشق
.
ذیحجّ قوتارار شهرِ محرّم ایکیسنده
مقصودی اولان مقصدِ عشقه یِتَر عاشق
.
مجبور اولی صحرایِ بلایاده وقوفه
رسمِ عرفاتیله او چولده دوشر عاشق
.
قرآن اوخویانلاردان آلار بیر گیجه مهلت
قرآنه اوزی باشدان اَیاقه سُوَر عاشق (1)
.
تسخیر قیلار باختری خسروِ خاور
اُردوی همایونه اولار رَه سِپَر عاشق
.
مغربده جماعتله قیلار شام نمازین
ایلر شبِ عاشورینی مَشعر خبر عاشق
.
بیر شورشِ محشر قوپار اوندا بو خبردن
محشر چولینه مشعرینی دوندَرَر عاشق
.
خالی ایدر اغیاردن اَحبابِ حریمین
نامحرمی جانان حرمینده نیدر عاشق؟
.
ایستر که قالانلار هامی بی غلّ و غش اولسون
غربالِ ثِباتِ قدمیله اَلَر عاشق
.
بیر جمع قدیم عهدینه پابسته قالاندان
پیمانِ اَلَستی او گیجه تازه لر عاشق
.
بیر مجمعِ پروانه قورالّار دلِ شبده
شمعِ رُخِ زیباسین ایدر شعله ور عاشق
.
قرآن و مناجات ونماز اوسته دعادن
آخر گیجه سین عاقبت ایلَر سحر عاشق
.
صبحین دمی ایلر گیجه نی چاک گریبان
چاک ایتماقا هر سینه نی باغلار کمر عاشق
.
قرمز شفق آفاق سپهره سَپولَنده
قانلار سَپولر گوگلره حتمی بولَر عاشق
.
خورشیدِ شفقدن که وورار باش دِیه سن بس
اوز قتلگهندن چوله ایلر نظر عاشق
.
تعجیلیله عشق اهلنه مخصوصِ منایه
قربان گَتورَر قوچ قوزی یتمش نفر عاشق
.
تأخیره سالار قسمتِ رمیِ جمراتین
جایز بولَر اجراسینی طرزِ دگر عاشق
.
ساخلار صورا دشمنلر آتار اوستونه داشلار
رَمیِ بو طریقیله بولَر معتبر عاشق
.
اِعزایله یوزمین نفر اَشرارین اَلیله
ظهره کیمی قربانلاری بیر بیر کَسَر عاشق
.
قربانلارینون بعضینه بازارِ وفاده
جانیم سنه قربان اولا قیمت ویرَر عاشق
.
هر فِدیه سینین باشین آلار قانلی دیز اوسته
مخصوص عنایتله ایدر مفتخر عاشق
.
لطفیله قویار یوز یوزه هر قانلی یوزیله
قویماز قالا بیر دلده غبار و کَدَر عاشق
.
لب تشنه گورَر سو یرینه گوستری گوزده
اشکِ تر و خونابِ دلِ پر شَرَر عاشق
.
بی آب و علف وادیِ سوزانه سو اوسته
زمزم کیمی جاری ایدر اشکِ بصر عاشق
.
قربانلیقین آئینیجه آئینه یرینده
آئینۀ رُخسارین ایدر جلوه گر عاشق
.
جان اوسته او آئینیه هر کیم باخا سویلَر
جانانه قسم جوهرِ جانه دَگَر عاشق
.
نمرودِ زمان حقّه آتان وقتده پیکان
ماهی یرینه اَلده دوتار سوداَمَر عاشق
.
آق اونّوگی آق سینه ده آی پارچاسی طفلین
حلقندن آخان قانیله قرمز سُوَر عاشق
.
گورسه بو قان ایستَر یره قان یاغدورا گویدن
اوندا گویه یردن بیر اووچ قان سَپَر عاشق
.
گلزارینه سولموش سارالان غنچه سین آخر
قرمز گُل آچان غنچه کیمی قِیتَرَر عاشق
.
قربانلارینون ذبحنی باشه یتورنده
تحلیق ایلماق فکرینه فوراً دوشر عاشق
.
امّا نجه تحلیق که مثلین گورَن اولماز
عالمده ولو عالم اولا سر بسر عاشق
.
باش پارچالانار یاره لَنر پیکر آخار قان
قاندان دیه سن قرمزی مخمل گِیَر عاشق
.
اثباتینه حقّیّتنون گوستری باشدا
ناحقلره بیر معجزِ شقّ القمر عاشق
.
هر یاره گوزل بیر گُل آچار سینه سی اوسته
بیر گلشن او گُل یاره لریندن بَزَر عاشق
.
هر برگ گُل اوستونده گونوز شبنمِ شب تک
قان قطره لرین قطره به قطره دوزَر عاشق
.
بی خار گُل اولماز اودی هر گُل یاراسندا
بیر خارِ خدنگِ ستم اگلَندیرَر عاشق
.
هر خارِ جفا غارت ایدن بیر گُله خاطر
مین لر گُلِ گلزارِ محبّت دَرَر عاشق
.
اوز نفسنه اجرایِ قضا و قَدَر اوسته
بیرآز دایانار اهلِ قضا و قَدَر عاشق
.
بیر سنگِ فلاخن قان ایدر تر قطرانین
گر توزلی جبین اوسته دوزه قانلی تر عاشق
.
سرگرم اولی دامانیله آنّین سیله باخماز
خلوتگهِ یاره آچار اَغیاره در عاشق
.
بیر پیکِ صفیریله بولَر طپشِ دلندن
غمخانۀ دل دربینه حلقه دوگَر عاشق
.
اوچ شعبه لی پیکانی بولَر پیکِ محبّت
معشوق یرینده اونا یِر گوستَرَر عاشق
.
هیچ بیر دیلیله هیچ کَسه هیچ یرده دیولمَز
دردِ دلینی نوکِ خدنگه دِیَر عاشق
.
داغِ ثمرِ دل گورَر آشفته دلنده
گورمَزدیله دلبسته لیقیندا ثمر عاشق
.
اول نقشه سینی لوحِ وجودینده صفادن
اوچ شعبه لی پیکانِ جفادن سیلَر عاشق
.
قلبیندن ایکی عالمه بیر روزَن آچلسون
تیرِ سه پری حیطۀ دلدن چَکَر عاشق
.
داغِ دلی یاره دیماقا لاله نه لازم
دلداره خدنگ اوسته دلین گوندَرَر عاشق
.
بیر شاهدِ غیبی که اونی گوز گوره بولمَز
قانلی گوزیله روزنِ دلدن گورَر عاشق
.
اوّل نظرینده رُخِ جانانی گورنده
مین منّتیله اُلماقا منّت چَکَر عاشق
.
تا واقف اولار عالمِ اسرارینه عشقین
دلدوز اوخیله لبِ لعلین تیکر عاشق
.
امّیدِ وصالیله آت اوستن یخولاندا
خاکِ رهِ خلوتگهِ یاری اوپَر عاشق
.
اوز دوشدوقی یردن حرمه سعی و صفاده
یرده سورونَر یِدّی قدم دیده تر عاشق
.
تشریفِ شهِ عشقه یارالی بدنینده
ترتیب ویرَر تیریله طاقِ ظفر عاشق
.
قان چشمه سی تک یاره لرین قانی داشاندا
باشدان باشا اطرافینه داشلار دَرَر عاشق
.
اوخ نیزه فلج داش که وورار جسمینه اعدا
ایلر اولارا جسمِ لطیفین سپر عاشق
.
جان تشنه ویرَر نهرِ فراتین سویون ایچمز
اوز نحرینی منحور گورَر قان ایچر عاشق
.
عالملری بیر پیرهنه گر ساتا معشوق
اَگننده کی پیراهنی ویرمز مگر عاشق؟
.
بذل ایلر اوز انگشتر و انگشتنی باهم
تا غایتِ جودیله اولا مُشتَهَر عاشق
.
بیر سلسله گر سلسله بند ایستِیه معشوق
هشتاده یاخون قیز گَلین عورت توکَر عاشق
.
حقّ اوسته قانی ناحق آخار قانی آلنماز
قبرینده یاتار مُنتَظِرِ مُنتَظَر عاشق
.
ئولمَز ولو ئولدورسه له باش نیزیه گیتسه
بیگانۀ عشقین نظرینده اُلَر عاشق
.
ایستر گوره بیگانه مماتنده حیاتین
اعجازه وورار چنگِ ثبوت و سَمَر عاشق
.
تکبیر دِیَر گاه کسوک باشی جِداده
باشسیزلارا شاماته اولار راهبر عاشق
.
گه کُنجِ تنور ایچره یاتار بالشی کولّلر
عاشقلرینون باشینه کولّلر اَلَر عاشق
.
بیر دِیر هواسیله چخان بیتِ خدادن
قانلی باشیله دیره گیدر باش چَکَر عاشق
.
راهب دولانار مؤمن اولار دیرده، مسجد
بتخانه اولار کعبه گر ایتسه گُذر عاشق
.
گه سیره چخار گون کیمی شام ایچره جِداده
هر رهگذری کوچه بکوچه گَزَر عاشق
.
گه دعویِ اسلام ایلیَن ملّتِ کفره
قرآنِ مجید آیه سی تفسیر ایدر عاشق
.
سرمست ایده روم ایلچسنی بادۀ عشقی
شاماتده بیر بزمِ شرابه گیدر عاشق
.
منزل ویرَر اولادینه بیر کُنجِ خرابه
اوز خوابگهین قصرده بیر طشتِ زر عاشق
.
مقصوره نشینانِ جهان کوریِ چشمی
ویرانیه تقدیم قیلار بیر گُهر عاشق
.
معمورۀ عشق ایلر او ویرانۀ عشقی
تا کاخِ رقیبین ایده زیر و زَبَر عاشق
.
تا شأنِ خراباتی بوله اهلِ خرابات
پیرانه قویار خاکِ خراباته سر عاشق
.
الطافِ حسینیدی بو اشعار « حسینی »
اسرار مفصّلدی ایدوب مختصر عاشق
.
چون مور آپارور پایِ ملخ اَلده چکامه
بیر تحفه سلیمانه بَیَنسه اگر عاشق
.
چوخلار گیدَر عالمده رهِ عشق ولیکن
هیهات حسین بنِ علی تک گَلَر عاشق
ــــــــــ
(1) (سُور: سوره ها)
.
#حسینیه_مدح
#خروج_مکه
#ورود_محرم
#ورود_کربلا
#شورش_که_سالار_عالمه_شوریده_سر_عاشق
#سعدی_زمان
#چهارده_معصوم_حسینی ص 82
#ترکی
.
✍️ #زبدةالاشعار ✍️
.
🆔: @nohe_torki

متن پیشنهادی:  در حق حسین هر که عنادی دارد #حسینیه_یحیوی_اردبیلی

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی