یا مهدی
ــ
احسان بدرخانی
ــ
صاحب عصر میز عالمده امان اولسا گلر
غیبتیندن ، اگر ، امت نگران اولسا گلر
اوچ یوز اون اوچ نفرین کامل اولا تعدادی
بئش علامتدن اگر نام و نشان اولسا گلر
وار خبر شامیده طغیان ائده جک سفیانی
اولارین ظلمیلری قیمت جان اولسا گلر
سید پاک یمانی الکی اتدی خروج
کفریلن جنگی اونون ورد زبان اولسا گلر
مکه ده قتله یئتر نفس زکیه اوزمان
کوفه ده قان یئرین اوستونده روان اولسا گلر
آخرین واقعه بیرسسدی که گوگدن گلجک
خلق اوسسدن یرین اوسته نگران اولسا گلر
روش دینیله تنظیم ائدک اعمالمیزی
شوق دیدارینه شوروهیجان اولسا گلر
کوفه نین اهلی بیزه مایه عبرتدی اگر
محضر حضرته دوز نامه یازان اولسا گلر
سرو سامان وئریله صورت بازارمیزه
دانشقلاردا اگر صدق بیان اولسا گلر
شجر کینه و نفرت گونی گوندن اوجالیر
هرزمان بوآغاجین برگی خزان اولسا گلر
خلقی ابلیس آپارور دوزخه جنت آدینا
مین نفردن بئشی گراهل جنان اولسا گلر
(احسان) آنداولسون علینین شرف و عزتینه
صاحب عصرمیزهر یرده نهان اولسا گلر
#پندیات
#صاحب_عصرمیز_عالمده_امان_اولسا_گلر
#احسان_بدرخانی
#ترکی
نظر دهید