زبانحال حضرت عبّاس(س) در موقع وداع
.
✍️ زبدة الاشعار ✍️
?: @nohe_torki
.
حاج مجید امینی تبریزی
.
صبریم آزالوب اولوب گوزومده
دنیا یوزی پرّ کاه قارداش
ویر رخصت جنگ اولوم بو چولده
من عازم رزمگاه قارداش
.
.
اسدیردی سموم درد و محنت
گلزاریوه بو گروه عدوان
باغلوبلا ره فراتی شاها
جور و ستمیله آل سفیان
لب تشنه قالوبلا خیمه لرده
گل تک بالالار اولوبلا خندان
قیزلار نجه که سولوبدی ای کاش
سولسون هامی گل گیاه قارداش
.
.
آیا بو نجه روادی یانسون
اولاد علی بو گون سوسوزدان
هر غنچه گله اولوب حرملر
بلبل کیمی تک به تک نواخوان
گوز یاشی توکور بنات زهرا
ایلولّه اوشاقلار آه و افغان
گوزلردن آخان سرشک لردن
تشکیل اولونور میاه قارداش
.
.
بیرسمتیده غش ایدوب خیمده
اصغر او ستارۀ درخشان
گوزدن توکوری سرشک حسرت
رخسارینه مثل درّ و مرجان
آیا بو نجه روادی اولسون
عبّاسین الینده تیغ برّان
مشکه ایلسونله حسرتیله
خیردا بالالار نگاه قارداش
.
.
اولاد رسول لایزالین
بیر تک گلوری منه گمانی
بیر شربه سو تاپموری رقیّه
اوج ایلوری عرشه الامانی
بیر مشک سو اخذ قیلّام هرچند
بو گوز ایکی قولدی ترجمانی
عطشان قالا قویمارام رقیّه
اول برج ادبده ماه قارداش
.
.
انصافیدی سو ایچوب دویونجا
سیراب اولا بو گروه کینه
انصافیدی خیمه گهده شاها
لب تشنه قالا قیزون سکینه
انصافیدی بو فرات آخسون
صحرالره ای شه مدینه
بیر مشک سو تاپماسون حرملر
چکسونله اورکدن آه قارداش
.
.
من وارث شیر کردگارم
دعوا گونی بیر آجیقلی شیرم
مقبول ایلسن وار افتخاریم
سن تک شه عادله وزیرم
سرمشق من آلموشام آتامدان
هنگام جدلده شیرگیرم
من حیدر ثانیم جهاندا
سنسن سوزومه گواه قارداش
.
.
من پور رشید مرتضایم
وار منده علی کیمی شجاعت
دولدورسا قوشون جهانی یکسر
حاشا ایلیم هراس و وحشت
زنجیرینی شیروون گر آچسان
قویماز قالا بیر نفر سلامت
بو الده کی تیغیمیله قیرّام
اولسا یر اوزی سپاه قارداش
.
.
بو سوزلر اولوب زبس موثّر
فرزند علی غریب شاهه
آچدی لب لعل در نثارین
فرمایش ایدوبدی مهر ماهه
رحم ایله بو اهل بیته قارداش
گل گیتمه اماندی رزمگاهه
عالملره من پناهم امّا
سنسن منه دادخواه قارداش
.
.
بو کوفه و شام اشقیاسی
هرگز دیمه ظلمیدن دویالّار
سن گیتسن اگر، بو چولده باشسیز
اوچ گون منی بیکفن قویالّار
ظلمیله ورالّار اود خیامه
بو نازلی رقیّمی سویالّار
اوز کینه سینی ویرر بروزه
بو فرقۀ دین تباه قارداش
.
.
ای چرخ وفاده بدر کامل
وی طعنه وران جمالی آیه
سن گیتسن علم یاتار بو چولده
آغلار گلر عترتیم نوایه
محتاج اولی اهل بیت طاها
بوندان صورا تازه بیر عبایه
یغمایه گیدر اساس خیمه
سانما قالار عزّ و جاه قارداش
.
.
یوخ چاره گیدورسن ایمدیکه گیت
بیر مشک سو اخذ ایله باری
عطشان قالوب اهل بیت طاها
گل تک سولوب اصغرین عذاری
نه سو تاپیلور نه سود وار ایچسون
دلدن کسیلوبدی اختیاری
قالمور او قدر که آغلاماقدان
گلسین گوزینه سیاه قارداش
.
.
مسلم قویوب آدلارین ولیکن
قرآنی دانولّار اهل کوفه
گیتسن بولورم سالالّا قارداش
قان ایچره بو مه یوزون خسوفه
آماج ایده لّه گل وجودون
بو دشتیده نیزه و سیوفه
جسموندن آخار دما او قدری
مملوّ اولی حربگاه قارداش
.
.
یازدوقجا #امینی بو کلامی
اوج ایلدی گوگلره فغانی
منظوری دگولدی نوحه یازماق
بیر جمع بو شعره اولدی بانی
ایتمزله بهشت آرزوسین
گر گورسه له بیرده کربلانی
حسرت قالا قویما گوزلرینده
بیچاره لره پناه قارداش
.
.
#سبک_قارداش_یارالی_باشیم_قالوبدور
.
#عباسیه_وداع
#عباسیه_شهادت
#صبریم_آزالوب_اولوب_گوزومده
#مجید_امینی
#ترکی
.
✍️ #زبدةالاشعار✍️
?: @nohe_torki
نظر دهید