راه شام
.
✍️ زبدة الاشعار ✍️
.
?: @nohe_torki
.
مرحوم یحیوی اردبیلی
.
طریق شامیده بیر گون او فرقۀ باطل
غروبیدی عربستان چولین ائدوب منزل
.
یوخودی بیر آبادانلوق نه ائو نه شهر و دهات
گوز ایشلدوقجا بیابان و کوه و دشت و فلات
.
او یرده قیلدی مکان قوم ارزل اعراب
قورولدی خیمه و چادر گچوب طنابه طناب
.
حسین باشینی صندوقه قویدی شمر لعین
ووربدی قفل ایلیوب موم و مهر اول بی دین
.
دوزولدی دوره ده مستحفظ و قراوللر
گئجه قرانلوقیدی یاندی خیلی مشعللر
.
گونون حرارتی گوندوز قوتاردی حدتیله
همان گیجه سویوق اولدی کمال شدتیله
.
لحاف و بستر ایچینده قشون یاتوب راحت
قالوبلا چولده بیر عده پناه سیز عورت
.
نه منزل اولدی نه حایل نه خیمه و نه اساس
هوادن حفظ ایلسون لااقل یوخیدی لباس
.
گیجه زمانی سویوق یل دگنده صبری کسور
حسین بالالاری تیترور الی ایاقی اسور
.
جناب زینب او بیچاره لر پرستاری
بو حالتیله گورنده یتیم بالالاری
.
دولاندی زحمتیله جمع ائدوب بیاباندان
گتوردی بیخ گَوَن ریشه سی مغیلاندان
.
اوشاقلاری چاغروب مختصر آلو قوردی
اودون کیمی او تیکان ریشه سینه اود ووردی
.
وئروبله باش باشا اول خرداجا خانم قزلار
اوت ایسّی سینده قوجاقلاشدیلار آدامسزلار
.
بو ماجرانی ائدور نقل زینب خاتون
یاتوب هامی او گئجه یاتمادوم من محزون
.
ایلیکه نصف شب اولدی یاتوب قراوللر
او قزلارون آراسندان اویاندی بیر دختر
.
باشینی قوزادی صندوقه ساری بیر یاخدی
یواش ایاقه دوروب گوز یاشی یوزه اخدی
.
گهی یروردی گهی اگلشوب دوراردی گهی
گهی دوشوب سورونوب قصدین آختاراردی گهی
.
مقام قیلدی او قیز مخزنون برابرینی
باشینی چگنینه ، قوینونا قویدی اللرینی
.
حزین سسیله باباسینه بیر سلام ائتدی
دئدی بابا بیزی مظلوم اهل شام ائتدی
.
دولانموشام بابا چوللرده چکمیشم زحمت
بو گئجه فرصت ائدوب گلمیشم ائداق صحبت
.
نولور سکینووه سنده بیر التفات ائده سن
بو بخت قاریه رسم وفانی اؤرگَدَه سن
.
آچیلدی قفل او صندوقون آغزی قوزاندی
گورن دیردی او صحراده مین چراغ یاندی
.
حقیقتون الی زندان ظلمی سندئردی
یارالی باش گوگه قالخدی هواده بیر دوردی
.
او قانلو گوزلرینی آچدی باخدی حسرتیلن
یتیم بالالارینی درک ائدوب او زحمتیلن
.
یواش یواش اشاقا اندی اندی آهسته
قویوب دوداقینی عطشان دوداقلارون اوسته
.
یوخیدی قول عوضینده دوداقلارین آچدی
دوداق دوداقه آتایلان بالا قوجاقلاشدی
.
دولان بو چوللری قورخما منیم بالام قورخما
سنون یانوندا همیشه اؤزوم وارام قورخما
.
ایاق یالین نقدر آت دؤشونده سن گزه سن
حسین خاطرینه سن گرک قزیم دؤزه سن
.
بئله خیال ائلمه سالمیشام سیزی گوزدن
همیشه شام یولوندا مواظبم سیزدن
.
گوروم یزید لعینون یوزی قرا اولسون
بو ظلمی گوردی روا خانه سی فنا اولسون
.
قرا گیوب دلِ خامه سوزی یازار آغلار
او یازدیقین اوخیور «یحیوی» اورک داغلار
.
#راه_شام
#طریق_شامیده_بیر_گون_او_فرقۀ_باطل
#یحیوی_اردبیلی
#ترکی
.
✍️ #زبدةالاشعار ✍️
.
?: @nohe_torki
نظر دهید