عالمده یا حسین دیمه سرداریوام سنون #عباسیه_اعظمی_تبریزی

زبانحال حضرت ابوالفضل (ع) در اذن میدان
.
.
مرحوم اعظمی تبریزی
.
.
عالمده یا حسین دیمه سرداریوام سنون
فخریم بو دور غلام هواداریوام سنون
.
.
یا سیّدی دیمم سنه خدمت ده لایقم
امّا یانام شرار محبت ده شایقم
عالم ده عاشقین ندی جرمی من عاشقم
بیر عمردور کی عشق گرفتاریوام سنون
.
.
هر کیمسه نون اگر چه رسوم و قراری وار
عالم ده عاشق عشقینون امّا عیاری وار
سلطانه عاشق اولسا غلام افتخاری وار
من عاشقم غلام هواداریوام سنون
.
.
عاشق تیکر امیدیله دلدارینه گوزون
سن روحومون علاقه سی سن حالی سن اوزون
من نیلورم بهشتی بهشتیم دی گول یوزون
عالم بولور کی عاشق رخساریوام سنون
.
.
غم ایتسه ده کتاب خیالی ورق ورق
عشقونده ثابتم نقدر جاندا وار رمق
باخما یاراشمارام سنه ای فخر ماخلق
سن گولدن آیریلان دگلم خاریوام سنون
.
.
بیر نوکرم سنه دیمورم کامه یتمرم
ایتسن قبول حسرت فردوس ایتمرم
بو آستانه دن منی قوسان دا گتمرم
نه عزّ و جاه طالب دیداریوام سنون
.
.
بو آستانه وه اؤزومی سالموشام غرض
بیر گنج دور قاپون منه نه جوهر و عرض
عالم لریله نوکر آدین ایتمرم عوض
گورسم بویورموسان شه ابراریوام سنون
.
.
کور اولماز هر گوزی که سنه اشگ ریز اولا
نوکر اولان سنه ایکی دنیا عزیز اولار
اولّام سنه غلام آنام دا کنیز اولار
فخر ایلرم کی خادم درباریوام سنون
.
.
عاشق گرک دی مطلبین آلسون حبیب دن
عشقون منی سالوب ایله تاب و شکیب دن
ایستر مریض دردی نه درمان طبیب دن
ایله دوا بو دردیمه بیماریوام سنون
.
.
بازار یوسفه گلن اولدی کلافیلن
طی ایتمرم وفا یولونی من خلافیلن
بازار عشقه گلمیشم حسرت قیافیلن
بو نقد جان الیم ده خریداریوام سنون
.
.
گورّم بو چولده دشمنوی دسته دسته من
آیا اولار گورم سنی گور دل شکسته من
ویر بیر اجازه پرچم آچوم باشون اوسته من
غمگین گورنمرم سنی غمخواریوام سنون
.
.
مولا منیم الیمده بو شمشیر اولا اولا
عطشان قالا سوسوز بالالار گل کیمی سولا
عبّاس ئولوب مگر غمیله خاطرون دولا
آگاهی سن کی غم ده هم اسراریوام سنون
.
.
گورّم مدام شعله لنور نار جنگی من
بس نیلورم بو زندگی عار و ننگی من
ویرسن اجازه گر پوزارام فوج و هنگی من
ورّام علم فراته علمداریوام سنون
.
.
من «اعظمی» قاپوندا نه مدّت دی که وارام
قوسان منی گیدوم هایانا وار مگر هارام
گر قاره دور یوزوم وار اورکده ولی یارام
لطف ایله روسیاه عزاداریوام سنون
.
.
#عباسیه #اعظمی_تبریزی #عباسیه_شهادت #ترکی #زبدةالاشعار