عجله ایتمه بیر آز گوزلرون فداسی على #اکبریه_انور_اردبیلی

وداع حضرت علی اکبر (ع)
.
#زبدةالاشعار
.
: @nohe_torki
.
مرحوم انور اردبیلی
.
عجله ایتمه بیر آز گوزلرون فداسی على
گیدنده ستله گیدور عمرمون صفاسی على
.
بو سرعت عملون قلبیمه ایدور الهام
غریب آنون اولاجاقدور شهید آناسی على
.
بیر آیریلق که ئولومدن خبر ویرور آنووا
ایله بیر آیریلقن واردی چوخ بلاسی علی
.
خلیل کرب و بلا هاجره نه فکر ایلیوب
باشوندا وار سنون اسماعیلون هواسی على
.
گیندیروب سنی یولّور ضیافت اللّهه
شرف تاپار سنیله کربلا مناسی على
.
قویوبدی ختم رسولون عمامه سین باشووا
اولوبدی چگنوه زینت گوزل عباسی علی
.
ایدوبدی زنده شمایل رسول مختاره
بودور گورن دیسون ئوز جدّینون نماسی علی
.
حبیب حضرت خلّاقه بسکه مظهر سن
اودور سنه یاراشور جدیون لباسی علی
.
سنه یتیشدی سیادت نشانی دل شاد اول
ولی منه یتیشر معجرون قراسی على
.
قلم قاشون قلم قدرتون نشانه سی دور
واروندی طاق جبینونده حق جلاسی علی
.
نظام کپریگوه نظم عالم ایلور حسد
چکم او کپریگه یوخ سرمهنون بهاسی على
.
هزار نرگسی بیمار ایدوبدی هر باخشون
هزار سوسنی دیلّندیرور اداسی علی
.
بنفشه کج نگهوندن اولوبدی کج گردن
بو هجریده گل یاسنده واردی یاسی علی
.
سوسوز لبوندن اگر دامسا آب بیر قطره
هزار خضرون اولار چشمۀ بقاسی على
.
منیم ئورکده سوزوم چوخدی وقتون آزدی سنون
کتاب محنتمون یوخدی انتهاسی على
.
بیر آز یوباندیرا بلسم سنی غنیمتدور
چتین دوشه الیمه وصل کیمیاسی علی
.
قدم گوتورمه هله باشیمه گوروم نه گلور
دله چتندی اوزاقلاشسا دلرباسی علی
.
گوزل بالا نچه لحظه منیله گوز گوزه دور
گله بو گوزلریمه گوزلرون قداسی علی
.
وَرَم آلان ئورگین دردینی گوزومدن اوخی
منیم کیمی بو چولون یوخدی مبتلاسی على
.
بیر الوی ئورگه قوی بیریله نبضیمی دوت
طبیب تک ندی گور دردیمون دواسی علی
.
ئورک دیمه چوبالور بندیده قالان قوش تک
قفس سینه ده معلومدور صداسی علی
.
آنا باخا باخا دشوار صحنه دور والله
کفن گیه بدنه نوجوان بالاسى على
.
لبوندن اؤپدی بیبون منده قوی ایاقون اؤپووم
کنیزیون بُله سن واردی چوخ وفاسی على
.
بهشت آنا ایاقی آلتدادور دیوب جدّون
گوزل حدیثدی وار معتبر بناسی على
.
اوزینی لیلی بلور کمترین کنیز سنه
آنالیقا یوخودی دلده ادّعاسی علی
.
سنون ایاقوین آلتندادور بو جاریه نون
قسم او گوزلریوه زندگی بناسی علی
.
اویانا کاش یاتان بختی لیلینون الآن
اجل گله من اولام عشقوین فناسی علی
.
حیات رشته سی دور آلنوا دوشن تل لر
قدمووین توزی دور دیده توتیاسی علی
.
عم اوغلوین طویى باشلانمیوبدی صبر ایله
گورک نه رنگده دور قاسیمون حناسی علی
.
ایتورمشم اؤزومی بلمورم گیدنده سنه
و إن یکاد اوخیوم یا سفر دعاسی علی
.
.
.
.
#اکبریه_انور_اردبیلی
#اکبریه_شهادت
#عجله_ایتمه_بیر_آز_گوزلرون_فداسی_على
#ترکی
.
#زبدةالاشعار
.
: @nohe_torki