زبانحال حضرت زهرا سلام الله علیها
.
✍️ زبدة الاشعار ✍️
.
🆔: @nohe_torki
.
مرحوم حاج حیدر #خوندل_تبریزی
.
عم اوغلی سنده بو ایوده یورولدون آه و زاریمدن
گذشت ایله منی آز قالدی عمر مستعاریمدن
.
گَل اگلش باشیم اوسته باشیمی بیر آل دیزون اوسته
کناره گیتمه بو دیدار آخِرده کناریمدن
.
اولار بیر آز صورا شمع حیات فاطمه خاموش
یانار پرسوخته پروانه لر شمع مزاریمدن
.
حلال ایله منه اوز حقّیوی جان تاپشوروم راحت
قبول ایت عرضیمی شرمندیم بو اعتذاریمدن
.
وصیّت امرینی واجب ایدوب پیغمبر رحمت
سنه شاهد دوتام لازمدی اوز پروردگاریمدن
.
نه بو ایوده خیانت باش ویروب مندن بو مدّتده
صداقت لفظی وار صدّیقه لیقدا افتخاریمدن
.
نه بیر کلمه یالان جاری اولوب دوران عمریمده
منیم بو اعترافیله آزالماز اعتباریمدن
.
نچه لحظه قالور محروم اولام فیض وصالوندان
اجل آثاری مشهود اولدی حال احتضاریمدن
.
منیم عمریم یتیشدی باشه، قورتولدوم بلالردن
آتامدا قورتولار گیتسم عم اوغلی انتظاریمدن
.
سنون فکرون ایدوب افکاریمی آشفته زلفیم تک
نجه من آیریلوم سن تک وفالی شهریاریمدن
.
تلاش ایتدیم که بلکه دردیمی مستور ایدم سندن
ولیکن آخدی اشکیم آچدی پرده استتاریمدن
.
سنون حقّون گیدن گوندن منیمده قان اولوب باغریم
آخار خون دلیم رخساره چشم اشکباریمدن
.
نجه یانموشدی قلبیم اونداکی اودلاندی باب الله
او سوز دل هله روشندی آه پرشراریمدن
.
ایله قان اولدی باغریم امّتین جور و جفاسیندن
یانار گلشنده گورسه لاله قلب داغداریمدن
.
منه گلزاریدی مُلک مدینه، اوز ایویم گلشن
دویوردی غصّه لر امّا منی دار و دیاریمدن
.
نه قدری ایسترم اوز حالیمی مستور ایدم امّا
ایدر رنگیم حکایت بیر خزان اولموش بهاریمدن
.
نلر اولدی، آتام پیغمبره من ایتمرم اظهار
اوزی امّا بُلر مطلب ندی نیلی عذاریمدن
.
سولان رخساریمه باخسا، خزانین آفتین گورسه
گورر ذوق و صفا الفت کسوبدی لاله زاریمدن
.
نیاز اولماز ایدم آزرده خاطر قلب طاهانی
جنایت شرحی روشندور بو جسم زخمداریمدن
.
او گونکه ایتدی حمله آشنای عشقه بیگانه
من اولدوم باخبر اوّلده اوز انجام کاریمدن
.
نه سندن، نه حسینیله حسندن دویموشام امّا
دویوردی غصّه عمریمدن، گونومدن، روزگاریمدن
.
اولار زهراسی زینب بو ایوین مندن صورا بُلّم
گوتورمه سنده گوز بو نور دیدم یادگاریمدن
.
قیزیم کلثوم اوشاقدی تاب ایدنمز درد هجرانه
اودور چوخ ناگرانم من بو شیرین دل هزاریمدن
.
باخاندا حسرتیله بو خزان اولموش گلستانه
آخار اشکیم عذاره دیده ی گوهر نثاریمدن
.
او گونکه پایگاه دینی دشمن پایکوب ایتدی
هله شرمندیم سندن او حال ناگواریمدن
.
دایاندیم پشت درده تا دفاع ایتدیم ولایتدن
قیریلدی جبریله بیر غنچه امّا شاخساریمدن
.
یارالاندیم اوزوم، بو سهلیدور محسن شهید اولدی
سودوم که قالمادی، قان آخدی سو تک چشمه ساریمدن
.
فشار دشمن و دیوار وار مجروح بیر سینه
یخلدیم صبر و طاقت گیتدی قلب بردباریمدن
.
اوتاندیم وهله ی اوّلده سندن، سسلدیم فضّه
عم اوغلوم حیدری آگاه ایله حال نزاریمدن
.
کمال شرمیله ویردی جواب آرام و آهسته
خانم ناراحت اولما بو جواب آشکاریمدن
.
عم اوغلون مرتضانی چکدی جبراً مسجده اشرار
یوخ آیری اطّلاعیم اول ولیّ کردگاریمدن
.
دوروب گَلدیم دالونجا مسجده فوراً او ضعفیله
حمایت ایلیم سندن، عقیدمدن، شعاریمدن
.
نه همّت ایلدیم اوردا اوزون گوردون، اوزون بُلدون
نجه آلدیم نتیجه اهتمام شاهکاریمدن
.
قلم یازما دایان، شرم ایت حریم پاک زهرادن
دیمه چخدیم کناره غفلتیله رهگذاریمدن
.
ادب ایله رعایت قویما #خوندل شرمسار اولسون
دیر وار انفعالیم پیشگاه تاجداریمدن
.
.
#فاطمیه_شهادت
#عم_اوغلی_سنده_بو_ایوده_یورولدون_آه_و_زاریمدن
#ترکی
.
✍️ #زبدةالاشعار ✍️
.
🆔: @nohe_torki
نظر دهید