خطابه حضرت رقیه علیها سلام در مجلس یزید
..
..
..
..
شاهی اردبیلی
..
..
..
..
عندلیب شجر جنت و طاوس ارم
زیب آغوش حسین، فضلده چوخ، سنّده کم
مجلس سلطنتی ده ایلیوب قدین علم
پربها کلمه لری ، بزمی سرافکنده ایدور
قدردن درّی سالور، گوهری شرمنده ایدور
..
..
..
..
منیم آدیمدی رقیه هدفیم عهد قدیم
گرچه اولمیش اوره گیم تیغ جفائیله دو نیم
ایستسم بیر نفسیمله دیریلر عظم رمیم
غنچه لر قلبی منیم آتش شوقیمده یانار
«ای که باور نکنی فی الشّجر اخضر نار»(1)
..
..
..
..
ای ستمکار و بد آیین و جفاپیشه یزید
اى سبک پایه سبکسر سبک اندیشه یزید
وورمیشام آهیمیلن ریشه وه مین تیشه یزید
عنقریباً سنى مستأصل و مردود ایدرم
تاجیوی تختیوی اجلالیوی نابود ایدرم
..
..
..
..
باخما رخساریمه سن برگ خزان تک سارالوب
یا که گیسولریمی یل داریوب تپراق آلوب
باشیمه یا که اسارت بولودی سایه سالوب
عظمت شمعی ضمیریمده فروزاندی هنوز
قدمیمدن خفقان ملکی هراساندی هنوز
..
..
..
..
منی بیر آهیله عیسی نفس ایتمیش بوقیام
سنی اون منصبلن هیچکس ایتمیش بو قیام
منى ذى فضل سنی ذی هوس ایتمیش بو قیام
سنی آینده تبهکار و سیه دل تانییار
منی آز سنّیله بیر سالک کامل تانییار
..
..
..
..
سنه بیر باز پسین قعر مکدّر یازیلوب
منه ایوان زر و قصر منوّر یازیلوب
سنه دوزخ منه فردوس مشجر یازیلوب
سنی اهریمنه نوکر تانیار اهل خرد
منی عالم لره مفخر تانیار اهل خرد
..
..
..
..
منه روشندی ره سیر مقام ملکوت
گورمیشم حقّی دیریتمکده جلال و جبروت
ظالمین تختینی یاررام ایده رم من تابوت
دیمه دیل سیزدی بو دختر سیخیلوب زار و ملول
گر دانیشسام ایلیر طنطنه داغلاردا حلول
..
..
..
..
که منم راکبۀ قافلۀ صاعقه پی
که منم رهسپر صخره کن و آتش طی
که منم باغ مظالمده امن صرصر دی
گر چه بیر عرش تکان واهمه گین حالده یم
طایر قدسی ایدن خاک نشین حالده یم
..
..
..
..
من کمال شرف و عزته دارایم اوزوم
مرغ ویرانه نشین فلک آرایم اوزوم
باخ منیم صورتیمه صفوت سارایم اوزوم
اصرح فلسفۀ عفّتی ، مندن خبر آل
شاخص عصمت و شخصیّتی مندن خبر
..
..
..
..
که منم بادیه پیمای ملائک درجات
که منم حاشیۀ عطف سلام وصلوات
که منم لفظی معانیدن ایدن سلب ثبات
بیله فکر ایتمه فلک الدن آلوب عزّتیمی
حاش لله که اسارت پوزا شخصیّتیمی
..
..
..
..
شخص اودور که صمد دادگره تکیه ایده
نه که سیم و سپه و زور و زره تکیه ایده
بی خرددور او که سرنیزه لره تکیه ایده
چوخ قوی پایه لری باغلى بیلک لر یوخ ایدوب
چوخ شجاعتله گلن تحفه شماتتله گیدوب
..
..
..
..
بیله فکر ایلمه که عزت و جاهون واردی
تاج و تخت و کمر وملک و سپاهون واردى
بارگاه و حشم و پشت و پناهون واردی
منده بو قدرت ایمانیله بوش اللریلن
ایدرم قصریوی ویران او قوی لشکریلن
..
..
..
..
آز گوروب سنّیمی فرض ایتمه بیانیمده سکات
گوهر لفظیم ایدر نقطه نی نطقیله فلات
عزمیوی بزمیوی تسخیر ایلیر معجزه جات
پیکر مجلسیانی بورویر رخت سکوت
عجز سندن گورونر عالمه مندن جبروت
..
..
..
..
حاملان شرفین قافله سالاری منم
محور معرفتین نقطۀ پرگاری منم
من یشا مکتبنون کاشف اسراری منم
باخماسن لشکر ماتم اوزادوب اللرینی
گلشن فاطمه نون پرپر ایدوب گل لرینی
..
..
..
..
گر چه تا وار نفسیم آغلارام اکبر دیرم
یانارام گر چه قیامت گونی اصغر دیرم
گرچه یوز محشره گودالی برابر دیرم
لیک ترک ایلمرم ذکر و مناجاتیمی من
هامودان باش گورورم قاضی حاجاتیمی من
..
..
..
..
منم اذکاری سالان منبر افلاکه تکان
خاک ویرانه ده مسکن ایلین عرش مکان
خط سیرینده نسیم علوی عطر چکان
کوکب منزلتیم رخنه ویروبدور ماهه
سفرۀ فیض آچارام شمس منوّر جاهه
..
..
..
..
ایندی بیلدون که منیم خوان ضمیریمده نه وار
مکتب نهضت عظما و کبیریمده نه وار
گزورم هانسی منازلده مسیریمده نه وار
سوورم هانسی هوائیله صفا عالمینی
تاپمیشام هانسی جهتدن عظما عالمینی
..
..
..
..
ایندی گور کیمدی منیم سلسلۀ منتسبیم
جدّه و جدّ و نیاکان وهیب و وهبیم
کیم آتامدور کیم آنام کیم حسبیم کیم نسبیم
آتامون رتبۀ رخشانی نه میزانیده دور
بابامون دولت امکانی نه میزانیده دور
..
..
..
..
او که جدّیم دی منیم اوندادى لمعات خدا
اونی قرآنیده تحسین ایلیوب ذات خدا
اودی قرآن اودی ایمان اودی مشکات خدا
آسمانلاردا اونون طلعتی الآندا قالور
ظالمی واهمیه مکتبى الآندا سالور
..
..
..
..
بابامون قدرتنون گوهری الله اوزی دور
فاعل پنجۀ افسونگری الله اوزی دور
واقعاً فتح ایلین خیبری الله اوزی دور
دامجی مین قطره اگر جمع اولا منها اولاجاق
بیری گر وصل اولا دریایه او دریا اولاجاق
..
..
..
..
همچنین روضۀ رضوان آتاموندور آتامون
قصر آئینه و ایوان آتاموندور آتامون
روشن اول طلعت سبحان آتاموندور آتامون
او مه برج شر فدور ، نبوی خلعتی وار
گنبد عونی مصفّا ایلین طلعتی وار
..
..
..
..
او قیام ایلدی که فتنه نی معلوم ایلیه
حقّی بی پرده دیوب باطلی محکوم ایلیه
نه که تنها اوز آدین بی کس و مظلوم ایلیه
او قیام ایلدی که سیندیرا خودکامه لری
پوزا آلقانیله محو اولمالی برنامه لری
..
..
..
..
او قیام ایلدی که خلق ده ایمان تاپیلا
بینش امّت اسلامده عرفان تاپیلا
دینی تخدیردن آزاد ایلین قان تاپیلا
کربلا واقعه سی شیعه نی ذی جرأت ایده
بوینی چگنینده نه که زار و گدا صورت ایده
..
..
..
..
(1) سعدی
..
..
..
#مجلس_یزید #شاهی_اردبیلی #ترکی #زبدةالاشعار #حضرت_رقیه #حضرت_رقیه_شاهی_اردبیلی #حضرت_رقیه_مدح #حضرت_رقیه_شهادت
نظر دهید