حضرت زهرا سلام الله علیها
.
✍️ زبدة الاشعار ✍️
.
🆔: @nohe_torki
.
شاعر؟؟؟
.
#سبک_یارالی_جان_یارالی … 4 سبک
.
غم پیغمبر ایدوب غرق محن فاطمه نی
یخدی ظلمیله یره چرخ کهن فاطمه نی
.
تاپشوروب امته جان اوسته پیعمبر بو سوزی
حفظ ایدون عترت و قرآنی دیوب دولدی گوزی
حشریده داور اولار محکمه ده الله ئوزی
سویلیوب حیدره معراج ایلین فاطمه نی
.
شهر یثربده غرض حضرتی درک ایتدی اجل
امتی ایتمدی اما سوزینه ذره عمل
مسندی چونکه اونون ظلمیله غصب اولدی ازل
آغلادوب مسندینه تکیه ویرن فاطمه نی
.
دئدیلر ایندی گرک خانه نشین اولسون علی
چیخماسون عالمه دای صورت خورشید علی
اوتوروب ایوده علی قالدی تحیرده ولی
ایندی پیچیده غمه غملی سخن فاطمه نی
.
غصب اولوب ملک فدک اولدی عدو ئوز باشینا
باجینون دردی اولان وقته دیر قارداشینا
اولمادی قارداشی غرق اولدی خانم گوز یاشینا
دیدی درک ایتمور اجل غصه چکن فاطمه نی
.
گوردی مظلوم اوتوروب ایوده او سلطان نجف
بوینی چگنینده گیدوب فکره او کانون شرف
قصد ایدوب دوردی گیده خانه اغیاره طرف
مقصدی گتدی او دم اوغلی حسن فاطمه نی
.
خامه انصاف ایله قوی قلبیده سوز قالسون هله
چاتدی القصه فدک مدرکی اللردن اله
فاطمه الده سند منزلینه دوردی گله
اینجیدوب یولدا ولی اهل فتن فاطمه نی
.
خانمون قارداشی اولسیدی آلا صاق و صولین
ثانی اول کوچه ده والله کَسَه بیلمزدی یولین
گوردی یوخ قارداشی ظالم گویه قالخیزدی قولین
کوچه خلوتدی دیوب یوخدی گورن فاطمه نی
.
یولومی کسمه دیوب باخمادی ظالم سوزینه
نه حسن اوغلونا رحم ایتدی نه هر آن ئوزینه
ووردی بیر سیلی دولوب فاطمه نین قان گوزینه
چکدی آغوشه ایله، وجه الحسن فاطمه نی
.
دگوب الله صاق ئوزی من نجه دیواره دیوم
سیندی گوشواره قولاقینده اولوب پاره دیوم
اولدی بو حادثه دن یاقولاقی یاره دیوم
قویمادی شاد ایوینه ثانی گیدن فاطمه نی
.
یتیشوب منزل مولایه او سیمای حجاب
اوتوروب صحن سراده او خانم یوزده نقاب
چاغیروب اوغلی حسینی قاباقا ایتدی خطاب
دیدی آرام ایله گل سیلی دگن فاطمه نی
.
منه خاطر دیدی رو بندیوی رد ایله ننه
دیگوروم اوغلووا، آیا نه گلیب یولدا سنه
دیدی قربانون اولوم ثانی وروب سیلی منه
سالدی گل گور نه حالا ظلم و علن فاطمه نی
.
قلبیدن آگه اولوب مطلبه چون شاه حجاز
ایتدی حرمت خانمون سینه سینه ایتمدی ناز
نیلی رخساره حسین صورتینی قوبدی بیر آز
نطقه ناگه گتوروب نطقه گلن فاطمه نی
.
دیدی قوی قالسون اوزومده یوزووی چکمه دالا
حرمتون شامل حالیمدی گرک یاددا قالا
ایوون آباد اولا، زهرا یوزی دینجلدی بالا
شرمسار ایتدون اوغول قلبی اسن فاطمه نی
.
دانیشور الده قلم ایندی او یانمیش قاپیدان
آتش قهره یانوب قانه بویانمش قاپیدان
صف چکوب اوچ یوز عرب ظلمه دایانمش قاپیدان
ایتدی آماج ستم اهل وطن فاطمه نی
.
در و دیوار آراسندا خانمی غصه سیخوب
اوجالان وقته سسی فکر ایدورم فضه چیخوب
یره زهرانی گوروب بیر قاپی مسماری یخوب
در و مسمار یخوب فضه دیین فاطمه نی
.
دیمورم چرخ فلکدن نجه کام آلدی خانم
سقط اولان محسنی هر گون یادینا سالدی خانم
بیلمورم یاره لی حالدا نئچه گون قالدی خانم
سالدی چون حالدان حالا یاره بدن فاطمه نی
.
داد او ساعتدن اوجالدی گویه بیر ناله سسی
یعنی یثربده یتیم اولدی پیمبر نوه سی
ظلمیدن ئولدی یقین اون بیر امامین ننه سی
اوخشیوب زینب ئوزی الده اولن فاطمه نی
.
چیخدی مسجدده اودم منزیله یوز قویدی علی
گوردی زهرانی ئولوب زندگیدن دویدی علی
کوینگین من دیمورم فاطمه نین سویدی علی
گیجه چون اولدی ایدوب غسل و کفن فاطمه نی
.
#فاطمیه_شهادت
#غم_پیغمبر_ایدوب_غرق_محن_فاطمه_نی
#لاادری
#ترکی
.
.
✍️ #زبدةالاشعار ✍️
.
🆔: @nohe_torki
نظر دهید