فراقوندا دونوبدور گوگل قانه اوغول گل #رضویه_تائب_تبریزی

زبانحال حضرت امام رضا (ع)
.
زبدة الاشعار
.
: @nohe_torki
.
مرحوم تائب تبریزی
.
فراقوندا دونوبدور گوگل قانه اوغول گل
چوخ ایستور سنی گوگلوم خراسانه اوغول گل
.
او بیمار غریبم که مشتاق طبیبم
باشیم اوستونه سنده طبیبانه اوغول گل
.
.
وئروب زهر عداوت منه دشمن جانی
داخی سالموش ایاقدان بو رنجور بلانی
بو حالیله یاخوندور ائدم ترک جهانی
باشیم اوسته بو ساعت یانا یانه اوغول گل
.
.
منیم قیدیمه بوردا نه بیر کیمسه قالان وار
ائلیم یوخدی غریبم نه بیر یاده سالان وار
نه بو دردیمی دلدن محبتله آلان وار
شریک اولماقا درد فراوانه اوغول گل
.
.
قضایه دوزوموم وار شه ملک رضایم
علیدور آدیم اما مُلَقَّب به رضایم
نه اندازه ده درد و بلا گلسه رضایم
رضانین باشی اوسته صمیمانه اوغول گل
.
.
اوغول صبریمى الدن غم هجرون آلوبدی
بیر اود دورکه یانار اود دل و جانه سالوبدی
دلیمده گوزل آدون گوزوم یولدا قالوبدی
وصالیله علاج ائت بو هجرانه اوغول گل
.
.
اوغول درد غریبی بولورسن بولن اولماز
وطن آیری ائل آیری اونی یاد ائدن اولماز
باشی اوسته غریبین یامان گون گلن اولماز
یامان گوندی ام آخر بو سامانه اوغول گل
.
.
گلر بو باشیم اوسته قبیلم ائیلم اولسا
آلار دردیمی دلدن نه درد دلیم اولسا
بو دلده آزالار هر غم و نسگلیم اولسا
ائلیم یوخ باشیم اوسته شفیقانه اوغول گل
.
.
گوزوم نوری جوادیم اولان جانیمه جانان
یتوبدور باشا عمریم یاخوندور که وئرم جان
ئوزون ایله تلاوت گوزل لحنیله قرآن
فدا بیر ایله لحنه او قرآنه اوغول گل
.
.
ائدوب عشق مریضی منی محنت هجران
او درد ایلیوب اودلی دلی غنچه کیمی قان
طبیبیم سن او درده گل ائت وصلیله درمان
فدا ایله طبیبه او درمانه اوغول گل
.
.
غریبم وطن عشقی منیم هم نفسیمدی
دوداقه یتشوب جان بو آخر نفسیمدی
ئولن وقتده گورسم یوزون بیرده بسیمدی
ئوزون اولماقا همدم بو نالانه اوغول گل
.
غمیله وئرورم جان غریبم وطنیم یوخ
یانار حالیمه کیملر منیم یاد ائدنیم یوخ
دوتا شام غریبان کیمیم وار گلنیم یوخ
ئوزون طوسده شام غریبانه اوغول گل
.
.
اوغول حسرتیدیم من که معصومه گلیدی
باشیمدا نه بلا وار او مظلومه بولیدی
گوزوم یاشینی گوزدن محبتله سیلیدی
گله اولمیوب امکان او گریانه اوغول گل
.
.
باجیم کاش گلیدی کناریمده قالیدی
نه دردیم وار ئورکده او مظلومه آلیدی
قولون بوینوما مهر و محبتله سالیدی
ئوزون اولماقا عامل او عنوانه اوغول گل
.
.
اگر مهلت اولیدی او رنجور و فگاره
منی گورماقا حتما گلردی بو دیاره
قویوب یوز یوزه اشگین آخیرداردی عذاره
اجل قویمادى یتسون او جانانه اوغول گل
.
.
گلوب قارداش ئولنده گوزون باجیسی باغلار
هامی آغلیار اما باجی چوخ گوزل آغلار
باجیم یوخ باشیم اوسته بو غم سینه می داغلار
ئوزون قورماقا بوردا عزاخانه اوغول گل
.
.
یقین شوق وصالیم باجیم صبرینی آلدى
آیردی وطنیندن اونی چوللره سالدى
گلوب یوللاری قمدا وفات ایلدى قالدى
گله بولمدی ملک خراسانه اوغول گل
.
.
خزان آفتی پوزدی اونون عمر بهارین
آلوب سینه سینه قم یرى جسم نَزارین
گئدوب ایله زیارت اونون غملی مزارین
گتور عطرون ئوزونله بو سامانه اوغول گل
.
.
خراساندا گوزومدن جهانی آتارام من
اولوب دینیمه قربان مرامه چاتارام من
باجیم قمدا یاتوبدور بو برده یاتارام من
یانار شمع مصیبت چو پروانه اوغول گل
.
.
منیم حالیمی شیعه کماکان بوله جاقدی
به عنوان زیارت بو طوسه گله جاقدی
یووب اشکیله قبریم غبارین سیله جاقدی
ازل اولماقا زایر بو نالانه اوغول گل
.
.
اولوب «قاسمیان» بوهمین سوزلره بانی (1)
یازوب «تائب» آخوبدور یوزه اشک روانی
گلوب مدفنیمه ذکر ائده للر بو بیانی
فراقوندا دونوبدور گوگول قانه اوغول گل
.
(1) به درخواست مرحوم حاج علی اکبر مارالانی نوحه خوان به رشته نظم در آمده است
.
#سبک_علی_جان_بالا_لبیک
.
#رضویه_شهادت
#فراقوندا_دونوبدور_گوگل_قانه_اوغول_گل
#تائب_تبریزی
#ترکی
.
#زبدةالاشعار
.
: @nohe_torki