احتجاج امام حسین(ع)با سپاه کوفه و شام
.
.
.
مرحوم میرزا عبدالوهاب حقیرخویی
.
فروغ شمع شبستان دودمان خلیل
چراغ انجمن افروز آل اسماعیل
.
یگانه گوهر نسل سلیل ابراهیم
ذبیح کعبۀ اخلاص و قبلۀ تسلیم
.
خدیو کشور امکان و عالم ناسوت
ولیّ ارض سماوات و کشور ملکوت
.
نگین خاتم اسلام و مرکز ایمان
محیط زورق ایجاد لجّۀ عرفان
.
گُل حدیقۀ گلزار سیدالثقلین
سرور سینۀ خیرالنّسا امام حسین
.
قریب ظهرده نصف النهار عاشورا
مقابل صف لشگرده یکّه و تنها
.
اولوب برابر ظلمتده نور حق پایان
جمال حقّه باخوب کوفیان بد بنیان
.
احاطه ائتدی محیطی احاطۀ کفّار
دولاندی نقطۀ توحید باشینه پرگار
.
جداسینی ائلیوب تکیه گاه نرمۀ گوش
سنان تفاخریله اولدی عرشیله هم دوش
.
آچوب لسان گهر بارینی لسان الله
که ای جماعت بی شرم و فرقۀ گمراه
.
مگر منی تانیمورسوز ولیّ سبحانم
منم حسین که فرزند شیر یزدانم
.
بودور باشیمداکی عمّامۀ پیمبردور
بئلیمده تیغ دوسر یادگار حیدردور
.
آتام علیدی شهنشاه لافتی حیدر
آنامدی فاطمه خاتون عرصۀ محشر
.
ائدوب نصایحی تبلیغ حجّتی اتمام
بیان شأن و نسب ایلیوب امام انام
.
ولی جنود شیاطینه کلمۀ قرآن
مفید دوشمدی حقدن اولوبلا روگردان
.
ائشیتدیلر کلمات صدای رحمانی
قویوب بنای تمرّد گروه شیطانی
.
تلاطم ایلدی دریای غیرت قهّار
چکنده نعره جگردن به سان رعد بهار
.
اوجالدی کلمۀ تکبیریله سپهره صدا
ال آتدی قائمۀ ذوالفقاره دست خدا
.
گتوردی معرکه ده ذوالجناح جولانه
سالوب غریو نهاد سپاه سفیانه
.
الینده تیغ دوسر پور حیدر کرّار
دلینده ذکر انا بن محمّد المختار
.
آخاردی خون عدو ذوالفقار حیدردن
سالاندا شعشعه باشلار اوچاردی پیکردن
.
ووراردی هرکیمی دورت حصّه راکب و مرکوب
دوشردی خاک مذلّتده خاذل و مکبوب
.
به حکم نصّ یدالله فوق ایدیهم
اولوب معاینه تصریح لا مقام لهم
.
بیری بیرینه اشارات فارجعو اشعار
قبول عار قیلوب قویدولار فراره قرار
.
قاچاردیلار قاباقیندان چو گلّۀ روباه
دوتوب سبیل هزیمت جماعت گمراه
.
ولی الیله یتوب قوم مشرکینه عذاب
گوروب عذابی نمایان مهازم الاحزاب
.
گلوب ظهوره او گون سطوت یداللهی
احاطه ایلدی قهری او قوم گمراهی
.
صدای الحذر و الغیاث و این مفر
چخوب سپهره عیان اولدی شورش محشر
.
به سان قوم شیاطین جنود نامسعود
شهاب دهریله درگاهیدن ادب مردود
.
خطاب کَلَّت الاَلْسُن وَ عَمیتِ الاَبصار
یتوردی لشگریانه چو صورت دیوار
.
نه حسّ و نه حرکت چون قوالب بی روح
وجود نحس لری خوفدن اولوب مقبوح
.
نه پای راه گریز و نه صبر و تاب درنگ
نه اقتدار هزیمت نه استقامت جنگ
.
گوروب شجاعتینی چوخ مهو اولوب حیران
قالوبدی ششدر حیرتده مات و سرگردان
.
سپهر کثرت وحشتدن اضطرابه دوشوب
تملّق ائتماقا، فَلَک ترابه دوشوب
.
دوتوبدی هیکل مرّیخ رعشه چون سیماب
ایتوردی گردشینی آفتاب عالمتاب
.
بلند صوتیله سسلندی جبرئیل امین
فدا بو شستوه جبریل ای امام مبین
.
جناح و قلب و کمین گاهی ایلیوب تسخیر
دوتوب قرار اولوب مرکزینده حق جاگیر
.
شعاع نور ائلیوب جیش ظلمتی مغلوب
سنانی مرکز میداندا ایلدی مضروب
.
قویوب غلافینه شمشیری اول امام رحیم
جدایه تکیه ووروب هم شهادته تسلیم
.
قتالی بوشلادی چکدی جدالیدن الینی
دوباره آچدی او دم احتجاج ایچون دلینی
.
خطاب ایلدی کفّاره یا عدوّالله
بوگون یر اوزره منم وارث رسول الله
.
سبب ندور که دوتوبسوز طریق کفر و عناد
سبیل حقه منم هادی سبیل رشاد
.
امام عصر منم حقیمی رعایت ائدون
پیمبر اوغلیام ای قوم دون حمایت ائدون
.
منم ولیّ سماوات و حجت ارضین
رسول خاطرینه وار اولان حسینه معین
.
قیلاندا واسطۀ آفرینش استمداد
دوشوب تزلزله ارکان عالم ایجاد
.
اوجالدی غلغله اوج سپهر مینایه
عروج ائدوب بو صدا بارگاه والایه
.
نخست ذات خداوندگار لم یزلی
سمیع حیّ و توانا و قادر ازلی
.
حریم محفل عزت حجاب وحدتدن
خطاب صادر ائدوب بارگاه عزتدن
.
ندا یتیشدی جوابینده یاحسین لبیک
ایا حبیبَ جَبیبی انا معینٌ علیک
.
که ای حبیبمون اوغلی حبیبم اولما ملول
نه خواهش ایله سن ایله مجابدور مقبول
.
اگر بودور غرضون ای شهنشه مظلوم
تمام لشگری بیر آنیده ائدوم معدوم
.
اگر علاقۀ رأیون دوتوب بو یرده قرار
بو کارزاریده جنبنده قویمارام دیّار
.
وفالی عاشق اولور گرچه طالب وصلت
گرک حبیبینه محبوبیدن یته نصرت
.
اگرچه یوخدی بو لشگرده دادخواه سنه
مکدّر اولما منم ناصر و پناه سنه
.
که ای ممالک عشاقه والی و سردار
غم ائتمه ذات خداوندگاردور سنه یار
.
شهادت امرینی بیز ائتمدوق سنه مختوم
دگل شهادتیله عشق لازم و ملزوم
.
گر اختیار ائدرسن حیات دنیانی
سنه مقرر اولوب حشمت سلیمانی
.
وگرنه وارسان اگر طالب لقا ٕ الله
مقام انسدی بزم وصاله بسم الله
.
هر ایکی باره ده مختارسن مخیّر سن
تقربینده گنه ماسوایه سرور سن
.
رضای عاشق و معشوق و طالب و مطلوب
دگل علیحده سنسن حبیب و محبوب
.
دوروب شهادته آماده اول امام وحید
یتیشدی سمع همایونینه پیام نوید
.
ویریلدی عاشقه پیغام مژدۀ جانان
نوید وصلیله اولدی شکوفه تک خندان
.
شکفته لندی جمالی جمال شوقیندن
گلوب تکلّمه گفتاره شوق و ذوقیندن
.
مقام رازیده عرض ائتدی ای خدای جهان
منم حسین که عهدیمده ذرّه یوخ نقصان
.
ظهور ائتمز اولا زینبیم سنانه اسیر
اگر علی قیزینا شمر دون وورا زنجیر
.
حیات ایستمیرم مطلبیم شهادتدور
شهادت امری منه مایۀ سعادتدور
.
نه اینکه تشنۀ سرچشمۀ بقایم من
وصال تشنه سیم طالب لقایم من
.
بو ادّعایه حضورونده شاهد ای داور
اقامه ایلرم عدلیلن اکبر و اصغر
.
قبول اولماسا یتمیش ایکی نفر تکمیل
گتورّم اکبریله اصغری ائدر تعدیل
.
علاوه شاهد دعوی گواه صدق مقال
اؤزون سن عالمی سن ای خدای ذوالجلال
.
بو باش بو ال بو بدن بو حسین بو حنجر
بو دشت کرببلادور بو شمر بو خنجر
.
دولوبدی بسکه تولّای دوستیله رگ و پوست
همیشه درد دلیم با حبیب دور یا دوست
.
سالوبدی باشیمه سودا تجلّی دلدار
سنان و خنجر و شمشیردن نه باکیم وار
.
گرکدی پایۀ عشقیم یتیشسون اتمامه
قطار زینبی چکسونله دهنۀ شامه
.
جداده باشیمی الدن اله دولاندیرالار
گرک عیالیمی بازاریده دولاندیرالار
.
گرک قالا بدنیم اوچ گون اوچ گجه عریان
یارالی پیکریمه آتلار ایلسون جولان
.
بلی اگر طلب ائتسم مدد یتر سندن
ولیک ایستمیرم شایقم شهادته من
.
یر اوزره خلقه منی حجت ایلیوبسن امام
امام خلقه گرک حجتین ائده اتمام
.
تاپوب علاقه دوباره مشیّت سبحان
حسین مرتبه سین وئرسون انبیایه نشان
.
او وقت صادر اولوب کل ماسوایه خطاب
صلای عام ویریلدی ایا اولوالالباب
.
تمام حاضر اولون ای ملائک نصرت
حسین خدمتینه آشکار ائدون خدمت
.
توقف ائتمیون ای قدسیان خلد مکین
نزول ائدون یره ای ساکنان عرش برین
.
خضوعیله یاپشون دامن ولایتدن
اجازه حاصل ائدون محضر امامتدن
.
حسین هر نجه امر ائتسه امری مجری دور
به غیر جدّ و پدر ماسوایه مولادور
.
خلاصه پرده نشینان کشور لاهوت
تمام معتکفان صوامع ملکوت
.
مقربین سرا پردۀ سرادق جاه
پیمبران اولوالعزم و اولیا الله
.
قطار سلسلۀ انبیای ذوالاکرام
نظام زمرۀ ارواح اولیای عظام
.
فرشتگان غلاظ و ملائکان شداد
تمام فرقۀ ابدال و زمرۀ اوتاد
.
الینده حربۀ آتش موکّلان جحیم
سلاح جوشنیله حاملان عرش عظیم
.
قاباقدا حامل وحی آله روح الامین
دالینجا فوج ملائک گروه کرّوبین
.
زمین کرب و بلایه نزول ائدوب صف صف
برابرینده او شاهین تمام چکدیله صف
.
دوزولدی دسته به دسته نظامیله ارواح
مقاله سلسلۀ انبیادن استفتاح
.
که ای نهال برومند باغ علّیین
شمیم دوحۀ طاها و روضۀ یاسین
.
بیزی بو نیتله سرافراز قیل ممنون
بو قوم حق نشناسی چو لشگر فرعون
.
اجازه وئرگیلن ای حکمران ارض و سما
ائداق بو ورطه ده یکسر غریق بحر دما
.
و یا بو فرقه نی چون قوم موسی عمران
قویاق بو وادی یته فناده سرگردان
.
طواف ائدوب باشینا فوج فوج جنّ و ملک
دوشوب ایاقینه سکّان نه رواق فلک
.
اؤپوب زمین ادب جمله ایلیوب تعظیم
که ای ضمیر صدور مکوّناته علیم
.
امام علمی قلوب عمومه دارادور
سنه بو قلبلرین مطلبی هویدادور
.
بیزی بو فخریله ممتاز قیل ملائکدن
وئر اذن شمر و عمرسعد و غیر ذالکدن
.
آلاخ قصاص جوانان آل طاهانی
روا دگل شهدانین آلینماسا قانی
.
زبان حالیله ذرّات کلّ مخلوقات
چه ذی حیات چه بی روح جمله موجودات
.
چو برّ و بحر و جبال و ریاح ارض و سما
وحوش برّ و سماک بحار و طیر هوا
.
ظهوره انفس و آفاقیدن گلردی صدا
بو نوع عالم معناده کای ولیّ خدا
.
تاپوب وجودویله امر کائنات نظام
نفوسه منزلۀ روحدور وجود امام
.
تمام عالمه سندن مدد یتر نصرت
مدد یتشمسه بیر نفس ایلمز حرکت
.
وار استعانتوه کلّ انبیا محتاج
پیمبران اولوالعزم و اولیا محتاج
.
بلی گر اولسا جماداته رحمتون شامل
توجه نظروندن جماد اولور قابل
.
هلاک دشمنه اولسا مشیّتون جاری
اولولّا رخت حیات وجودیدن عاری
.
ولی او حالیده میداندا سید بطحا
به سان نقطهٔ توحید یکّه و تنها
.
نه بیر نفر کمکی وار نه یار و انصاری
نه لشگرونده علم واردی نه علمداری
.
که ناگهان اوجالوب خیمه لره شیون و شین
ائشیتدی ناله و فریاد اهل بیتی حسین
.
او دم وئروب حرکت ذوالجناحه شاه زمان
کمال سرعتیله خیمیه چووردی عنان
.
یتیشدی شاه شهیدان کنار خیمیه تا
خطاب ایلدی یا زینبا و یا اختا
.
گنه آنام باجی زینب نه ناله دور شیون
هنوز ئولمه میشم ال تاپا سیزه دشمن
.
وصیت ایلمدیم صبره من سیزی آیا
اولور اشدّ مصیبت شماتت اعدا
.
هنوز گل بدنیم قانه اولمیوب غلطان
نه آغلاماقدی نه شیون نه ناله نه افغان
.
مگر نه واقع اولوب ای عزیزۀ زهرا
تمام اهل حرم ایلیولّه شور و نوا
.
گلوب تکلّمه سوزیله ناتوان زینب
خدنگ و تیر بلایه اولان نشان زینب
.
که ای پناهیم امیدیم عزیز جان قارداش
عبث من آغلامورام وار بیر آغلادان قارداش
.
علیّ اصغره باخ گور نجه پریشاندور
دوشوب بیر اؤزگه خیاله علاوه عطشاندور
.
بیر آز زماندی که یاتمشدی مهدیده راحت
او دم که قوم جفاجودن ایستدون نصرت
.
او استغاثه علی اصغره ائدوب تأثیر
آتوب اؤزین یره گهواره دن بو طفل صغیر
.
دیلی که یوخدی دانیشسون ولی بئله بولونور
سنه کومک گلوری یوخدی طاقتی سورونور
.
بو طفل آغلادور اولاد مصطفانی تمام
کباب ائدوب بیزی بیر لحظه دوتموری آرام
.
نجه من آغلامیوم چاره گلموری الدن
نه سو نه صود تاپولور اصغریم دوشوب دلدن
.
بویوردی ای مه برج حیا سپهر ادب
گتور منیم یانیما اصغری آنام زینب
.
وصال تشنه سیدور اصغریم نه تشنهٔ آب
وار اشتیاقی که اولسون خدنگیله سیراب
.
اگرچه طفلیدی درس وفاده کاملدور
خدنگ دشمنه تیر بلایه مایلدور
.
آلوب قوجاقه علی اصغری امام زمان
خیام طاهره دن اولدی عازم میدان
.
یتوب او قوم ستم پیشه نین مقابلینه
آلوب او گل کیمی قنداق اصغری الینه
.
خطاب ایلدی ای دشمنان دین مبین
نه کیشدور بو نه مذهب نه دیندی نه آیین
.
روادی بو اولا نهر فرات مهر بتول
قالا فرات کنارینده تشنه آل رسول
.
بو ارث فاطمه دی ناکسان کوفه و شام
حلال اؤزگیه اولادینه ندندی حرام
.
بو سو که سیز ایچیسوز حق آل فاطمه دور
تصاحب ائتماقا اولی عیال فاطمه دور
.
گلون طریقۀ انصافیله ائدون رفتار
دیون گوروم بو فراتین تعلّقی کیمه وار
.
دوروب حضورده حق صاحبی خلیفۀ حق
بوله بوله ائدبسوز غصب حقینی ناحق
.
ولیّ حقّی بولورسوز گناه کار اگر
نه جرم صاحبی دور شیرخوار علی اصغر
.
ائدون ملاحظه حق رسول مختاری
بو تشنه اصغره بیر جرعه سو وئرون باری
.
اگر مضایقه ائتسوز بو طفله جرعۀ آب
نه نوعیله ویروسوز جدّی مصطفایه جواب
.
جفادن ال گوتورون ای جماعت گمراه
ائدر بو ظلمی پیمبر قبول باالله
.
پیمبر امر ائلیوبدور قوناقه حرمت ائدون
قوناق حساب ائلیون امرینه اطاعت ائدون
.
اگر قبول ائده سوز یول وئرون فراته گئدوم
بو شرطیله بونی سیراب ائدوم گنه قییدیم
.
اگر توهّم ائدرسوز مباد اؤزوم ایچم آب
گلون آلون آپارون ایلیون اؤزوز سیراب
.
اگرچه ظاهر صورتده شهریار عرب
ائدردی فرقۀ بی آبرودن آب طلب
.
ولیک عالم معناده اول امیر حجاز
دیردی حال مقالیله ای گروه مجاز
.
حقیقت اهلی اولون حقی ائتمیون انکار
علیّ اصغری سیز طفل سانمیون زینهار
.
نه چون ادیب حقیقی و مرشد کامل
ائدوبدی مدرسۀ عشقیده بونی کامل
.
اولوب رسالۀ مهر وفاده ابجد خوان
ائدوبدی مبحث اوّلده درس عشقی روان
.
بولوب حقیقتی درک ایلیوب بو معنانی
طریق عشقیده لایق دگل گران جانی
.
بو اعتباریله خواهان تیر و پیکاندور
سبب بو طالب قرب وصال جاناندور
.
ائدوبدی قافلۀ عشق کوی یاره سفر
دوشوب او قافله دن آخره علی اصغر
.
بو اضطرابینه باعثدی فرقت احباب
محالیدور اولا آب فراتیله سیراب
.
شرار نایرۀ عشقده یانور جگری
گورون یوزینده عیاندور او آتشین اثری
.
بیر اؤزگه جلوه ده معشوق گوستروبدی جمال
ائدوبدی عاشقینی تشنۀ زلال وصال
.
الیمده شهپر همت آچوبدی چون شهباز
هوای اوج شهادتده تا ائده پرواز
.
قاناد چالور اوچا هرچند کوی جانانه
حجاب جسم ولیکن حجابیدور جانه
.
دوشوب بو فکره که جان جوهرین علایقدن
خلاص ایلیه وجهی بودور خلایقدن
.
کسوب علاقه یوزین سمت آسمانه دوتوب
خدنگ دشمنه اؤز حنجرین نشانه دوتوب
.
نقدر حجت ایچون ظاهراً امام زمان
نصیحت ایلدی اهل عناد ائدوب طغیان
.
گوروب که حرمله یوخدور وئرن حسینه جواب
قویوب خیالینه ائتسون جوابه فتح الباب
.
زبان نحس آچوب اول شقیّ بی ناموس
دئدی بو باره ده سن اولما یاحسین مأیوس
.
منیم الیمدن اولور درد اصغره درمان
نچونکه چوخ سولیدور بو الیمده کی پیکان
.
یقیندی گر بو سودان جرعهٔ قلیل ائده نوش
سو ایستمز داخی دلدن دوشر اولار خاموش
.
اگر یته بو سودان قطرۀ دوداقینه
گئدر بو حالی دوشر کوثر اشتیاقینه
.
وار اضطرابی عطشدن اولوبدی بی طاعت
غم ائتمه ایمدی بونی یاخشی ایلرم راحت
.
او دم الینده بیر اوخ چلّۀ کمانه قویوب
لطیف حلقین علی اصغرین نشانه قویوب
.
دئدی سوسوزلاری لازمدی من ائدم سیراب
دم خدنگیله گوندردیم آل ویر اصغره آب
.
الین آچان کیمی اوخ قورتولوب کمانیندن
خطا ائدوب که خطا ائتمیوب نشانیندن
.
اولوب او حالده اصغر شکوفه تک خندان
بنا قویوب جریان ائتماقا اونا حق قان
.
او خون پاکی دوتوب اوجونا ولیّ الله
سپردی سمت سمایه دیردی یا الله
.
بو قان حسین الیندن سنه امانتدور
جزا گونی منه سرمایۀ شفاعتدور
.
او عهد کیم ائلمشدیم سنیله روز الست
بوگون وفا ائلدیم وئرمدیم او عهده شکست
.
بو تیر حرمله بو حلق اصغر عطشان
گتورموشم قاپوا بیر سوسوز قوزی قربان
.
قبول ایله بو قربانی گر چه اصغردور
منیم یانیمدا علی اکبره برابردور
.
منای عشقیده وئردیم فدا من ای داور
ایکی اوغول بیریسی اکبر و بیری اصغر
.
سپوب او قانی سمایه امام جنّ و بشر
یتوب خطاب الهی که ای ملائک لر
.
دوتون بو قانی سپون ای گروه کرّوبین
ریاض جنته تاپسون صفا بهشت برین
.
اگر دوشه یره بیر قطره اصغرین قانی
زمین و خلق زمین سربسر اولور فانی
.
بو ماجرای جگرسوز یئتمز اتمامه
زبان بیانینه عاجزدی شرحینه خامه
.
حدیث عشق مطوّلدی شرحی طولانی
عقول درک ائده مشگل بو سرّ پنهانی
.
«حقیر»عقل تحیّرده وهم اولوب مدهوش
بیان مطلبی سربسته ایله یاکه خموش
.
الهی خون علی اصغرین بهاسی ندور
جزاده حرمله نین بولمورم جزاسی ندور
.
بزرگوار خدایا بحق پیغمبر
به حرمت گلوی پارۀ علی اصغر
.
بو جمعی عفو ائله جمعاً او طفل معصومه
باغیشلا بیزلری خون حسین مظلومه
.
#حسینیه #حقیر_خویی
#حسینیه_شهادت
#فروغ_شمع_شبستان_دودمان_خلیل
#ترکی
#زبدةالاشعار
.
نظر دهید