فصل بهار دور گینه بلبل نوا ایدر #اصغریه_وافی_تبریزی

حالات حضرت علی اصغر (ع)
.
#زبدةالاشعار
.
: @nohe_torki
.
مرحوم میرزا محمد تقی ولادی (وافی تبریزی)
.
فصل بهار دور گینه بلبل نوا ایدر
گل گل دیوب گلیله اوزین آشنا ایدر
.
بلبل ترنّمین ایشیدوب گل آچار گوزین
خوش بیر نفس عجب گله زیب و صفا ایدر
.
گل عندلیبه سینه سی اوستونده یر ویرر
هردم که وصل عیشینه میل و هوا ایدر
.
هر شاخ سرو ، بلبله بیر آشیان اولور
بیر عمر او آشیانه ده نشو و نما ایدر
.
بلبل مقالی گل یوزی بیر برگ عیشدور
بو عیشه باغبان هامی معمرین فدا ایدر
.
بیرگلدن اوترې جانیله مین خار جورینه
طاقت تمام ذوقیله صبح و مسا ایدر
.
گلشن دولوسی سوسن و نسرین و لاله دن
بیر گلبن أوسته دور او ریاضت که تا ایدر
.
باخ گلشنون صفاسنه گل آبرنگینه
گور اوز شکسته قلبیوه بیر انجلا ایدر
.
صاف اولسا قلبون آئینه سی ، صرصر خزان
ظلمین نشان سنه ، او خوش آب و هوا ایدر
.
گلشن خزانی سوسن و سنبل سارالماقی
بلبل قیامتین سنه واضح ادا ایدر
.
گلزار و گل قضیه سی صورتدی اصله باخ
بو قصّه گور نشان سنه نه ماجرا ایدر
.
بلبل سکینه دور گل علی اصغرین یوزی
لال اول دلیم ربابی ندور مبتلا ایدر
.
گل غنچه سی کیمی سارالان اصغرین گورر
نه اضطراب ، او نوگل باغ وفا ایدر
.
گه حول ایدوب اوزین یره گهواره دن سالور
گویا غریب آتاسینه نصرت رجا ایدر
.
شهباز پنجه سینده اولان مرغ زار ، تک
مین آه وزار او بسمل بی دست و پا ایدر
.
ایستر ربابی ایلیه لیلایه همنوا
هردم که ناله اکبره اول بینوا ایدر
.
گه سینه سین خراش ایدر گاه صورتین
اول یرده بیر تجسّم حیرت بنا ایدر
.
سوز عطش قرارین آلوب ال ایاق چالار
قید حیاتیدن اوزین ایستر رها ایدر
.
دل یوخ نفس باتوب سسی چخماز که سو دیه
بیر جرعه سو اشاره ئیله اقتضا ایدر
.
خوردا دلین دوداقلارینا گه دولاندورور
دردین بو دیللریله ادا بی ندا ایدر
.
سویوخ بالا آنا الى أوسته الولاشور
بو حاله گور نه نوعی تحمل آنا ایدر
.
بیر بیر چادرلاری دولانور ناامید اولور
بی اختیار نالۀ وا اصغرا ایدر
.
ثکلا مثال او طفلی گورن باشلیوب نوا
فریاد و شیون عترت خیرالورا ایدر
.
گویا بو وقت أو وقتدی میدان عشقده
اشراره احتجاج اوشه نینوا ایدر
.
گوردی اوجالدی خیمه لریندن فغان سسی
شیون بیر آیری نحویله آل عبا ایدر
.
بی اختیار یوز چوووروب حجت خدا
گورسون نه ناله دور حرم کبریا ایدر
.
ایلوب خطاب زینبه سلطان غم حشم
نه ناله دور حریم شه لافتی ایدر
.
ویردیم سیزی بوحالیمه سوگند صبر ایدون
آخر شکسته دل منی بو آه و وا ایدر
.
سیز ناله ایلینده ایدر طعنه اهل کین
من بیکسه شماتت عدو برملا ایدر
.
سس چکمیون بو نحویله من هر قَدَر ساغام
گر چه هجوم غم سیزه بی منتها ایدر
.
قلبیم یارالودور یارا أوسته یارا دگوب
بو یاره لردن آرتوق اثر بو صلا ایدر
.
چوخ یانمشام ، یانار اودوما، وورمیون اتک
بسدور ثبات صبریمی غارت ، بلا ایدر
.
هر لحظه غملو گوگلومه ، مین غم هجوم ایدر
هر نه روا غمی منه دشمن روا ایدر
.
غملر پناهی زینب نالان ویروب جواب
آیری خبر تعاقب ایده مبتدا ایدر
.
عرض ایلدی حسین باجون ئولسون بو وضعیله
بیجا دگول که ناله بو بختی قرا ایدر
.
ویرموش صدا صدایه ، ایدر ناله اهل بیت
وار بیر سبب بو ناله لری اقتضا ایدر
.
سن رزمگهده دشمنه ایتدوقجه احتیاج
اصغر تمام سعییله نفسین فدا ایدر
.
گهواره ده نه بیر دوتار آرام ، نه آنا
آغوشینه تمایل ایدوب اعتنا ایدر
.
مین شوریله اوزین یره گهواره دن سالار
باخماز آنا محبّتی منع واَبا ایدر
.
قونداقده دوشر یوزی اوسته سورونمگه
گویا که عزم رزمگهِ اشقیا ایدر
.
بیکسلقون بیلوب سنه امداد ایتمگه
ایثار اؤز حیاتینی بو مه لقا ایدر
.
ایمائیله دیر بابا لبیک ، آز بویور
هل من معین امّته ، اصغر حیا ایدر
.
گل آل آپار منیده ویر اوخلار قباقینه
سعد اوغلی تا بُله که او فکرهوا ایدر
.
جانان یولوندا ویرماقا بیر نقد جان فدا
حاشا مضایقه بو قتل الضّما ایدر
.
امر ایتدی شاه دین باجی آل اصغری گتور
بیر شربه سو گوروم بونا دشمن سخا ایدر
.
آلدی خلاصه اصغری سلطان نینوا
دلده نوا اورکده ثنای خدا ایدر
.
شام اهلینون مقابلینه تا یتوب دیدی
کای قوم تشنه لیق بونون عمرون فنا ایدر
.
اکبر دگول بو دوغریاسوز بند بندیدن
بو اصغریمدی گورون نجه بیر شرب ما ایدر
.
چوخ تشنه دور گورورسوز الیم اوسته اودلانور
نی تک سیزیلدیوب عطشیندن نوا ایدر
.
اوچ گوندی ایچمیوب سو اوزیده آناسیده
بو ظلمی هانسی کافره مسلم اولا ایدر
.
گیرم سیزون گمانوزه من یاغیم سیزه
باشسیز قالان بو عورت اوشاق نه خطا ایدر
.
آخر سیزون پیمبریزون نسلدور بولار
خورد و کبار واعطشا مطلقا ایدر
.
پیغمبر اهلبیتینه هر ظلمی ایلوسوز
شرم ایتموسوز مخاصمه روز جزا ایدر
.
اوچ گوندی بیر ایچیم سو تاپولمور خیامده
پیغمبر اهل بیتی سوسوزدان بکا ایدر
.
نه وار آناسنون سودی ویرسون بو مضطره
نه سوتاپار نه قدری گزر التجا ایدر
.
بیرجه باخون عطش نجه دیلدن بونی سالوب
گل تک جمالینی سارادوب کهربا ایدر
.
بیرجرعه سو ویرون بونا الله رضاسینه
رحم ایلیون سوسوزدی اجل التقا ایدر
.
سانمون ایدوب بهانه علی اصغرین حسین
اوز نفسینه بو فکری بو بی اقربا ایدر
.
من مایلم بو عرصه ده لب تشنه جان ویرم
چون تشنه لوق وصاله منی آشنا ایدر
.
دنیا سو اولسا من سوسوز ئولّم سو ایچمرم
بو زخم دل سودان منی صاحب غنا ایدر
.
سعد اوغلی گوردی شاه شهیدون تکلّمی
لشگرده ظاهر عالم رقّت نما ایدر
.
ایتدی خطاب حرملیه یوخسا گورموسن
باطل منیم اساسیمی بو مقتدا ایدر
.
نه دورموسان ، حسینه ندن ویرموسن جواب
یوخسا سنونده حالیوی بو شه سوا ایدر
.
ویر تیر آبداریله سو تشنه اصغره
گورسون آتاسی رحم اونا تیر جفا ایدر
.
سعد اوغلنون مرامینی بُلدی او بی حیا
قصدینده قطع نسل شه قل کفا ایدر
.
قویدی دیزین ترابه آلوب بیرکمان اله
باخموب امام قدّینی غمدن دوتا ایدر
.
بیر تیر زهرداریله نازک بوغازینی
ایلوب نشان حیا دیمه اول اشقیا ایدر
.
نازک بوغازین اوخ ایله باشدان باشا بیچوب
یوخ احتیاجی ذبحه او اوخ اکتفا ایدر
.
اوخ غفلتاً دگنده ازل آچدی گوزلرین
پس گتیدی هوشه یعنی ادای ثنا ایدر
.
اوخ ردّ اولوب یریندن آخان قانیله اونون
زلفون یوزون خضاب امام هدا ایدر
.
دولدوری بیرده اوجونه گوی سمتینه سپوب
یعنی نه ظلم گور منه قوم عِدا ایدر
.
امر ایلیوب خدای حسین اخذ اولا او قان
چون گلسه منهدم یر اوزین کَالهَبا ایدر
.
هرگون غروب وقتی هواده اولان شفق
تجدید بو مصیبتی تا حشر اولا ایدر
.
اصغر جنازه سی الى اوستونده شاه دین
گاهی ارادۂ حرم مرتضی ایدر
.
ایستر گلوب او طفلی یتورسون آناسینه
گلمز یوزی عیان ایده زیر عبا ایدر
.
ناچار اولوب گینه قایدوب چوللری گزر
ناله آنا یرینه او بیکس آتا ایدر
.
گه داده اوغلونی چاغورار گاه قارداشین
گلمز جواب نالۀ واغربتا ایدر
.
هر دم سالار خیالینه اوز یار و یولداشین
اصحاب باوفادن امید وفا ایدر
.
هر بیر شهیدی بیر دلیله سسلر آختارور
گورسون بو تازه دردینه کیمدن دوا ایدر
.
نه سس ویرر زهیر ، نه عباس ، نه حبیب
نصرت گورر نه قاسم نوکد خدا ایدر
.
مأیوس اولوب گینه قیدوب خیمیه گیدر
زهرا نشانی زینبین اوّل صدا ایدر
.
سویلر گل ای شریک غم و محنتیم باجی
گور قسمتون بلا ، نجه دست قضا ایدر
.
گل اصغریمی آل باجی بو ، لشگر اوخلادی
مشکل ربابی ، محنتی غمدن جدا ایدر
.
آلتی آی ، تمام زحمتنین اجرینی بیر اوخ
بیر آن واحد ایچره ، بیله بی بها ایدر
.
گل آل منیم بسیمدی آپار ویر آناسینه
گورسون آناسی اصغری کسب شفا ایدر
.
باسسون یانقلی سینه سینه بیرده جان کیمی
جانانه گر چه اصغری جانین فدا ایدر
.
آلدی خلاصه اصغری زینب او حالیله
مین فکر اونی آناسنا ردّ ایتماقا ایدر
.
سسلندی گل رباب داخی بیله چکمه آه
آهین اودیله شعله بو گون نه سما ایدر
.
گل اصغرین ایدوبدوله سیراب اهل کین
طاقت سوسوزلوقا داخی هرقدر اولا ایدر
.
تا بو سسی ایشیتدی آنا بیر هوسلنوب
بولمزدی تیره بخت تک عمرین قضا ایدر
.
گورجک او طفلی یاندی چکوب دلدن آه سرد
سویلوب بو ظلمی هانسی لعین و دغا ایدر
.
بیر پر شکسته بلبلی هانسی خطالی ال
آغشته قانیله بیله بیر معتنا ایدر
.
هانسی آنا منیم کیمی اوز روزگارنی
آه و فغان و ناله ایشین ، دائما ایدر
.
گل غنچه سی کیمی بالاسی تشنه اوخلانور
قوینوندا قالمش اللرى وامُحجَتا ایدر
.
هر بیر آنانی گورسه ویرور سوبالاسینه
نسگل آنان سنی اوزینه سالها ایدر
.
بو پرده پرده قانه دونن گوگلومی سنون
نسگل لرون ، هلاکیمه دلدن رضا ایدر
.
اخلاص واقعی سنی (وافی) بو قصّه ده
تحریک گاهی جهریله گاهی خفا ایدر
.
نومید اولما یاز گله سوز صاحبی یقین
هر بیتینه جزا گونی بیر بیت عطا ایدر
.
.
#اصغریه_وافی_تبریزی
#اصغریه_شهادت
#فصل_بهار_دور_گینه_بلبل_نوا_ایدر
#ترکی
.
#زبدةالاشعار
.
: @nohe_torki