ورود به کربلا
زبانحال امام به حضرت زینب علیهما السلام
.
✍️ #زبدةالاشعار ✍️
.
🆔: @nohe_torki
.
مرحوم میرزا عبدالوهاب حقیر خویی
.
#سبک_حسین_جان_گل_علمدارون
#سبک_خداوندا_الیم_بوشدی
.
زمین کربلایه چونکی قویدون بیر قدم باجی
مهیّا اول بلایه کربلاده دمبدم باجی
انیس درد و غم باجی
عزیزه محترم باجی
.
.
مراحم منتهی اولدی یتیشدی مقصده راحل
بو وادی رهروان کعبهٔ اخلاصه دور منزل
نزول ائتجاق بو منزلده اولور شش گوشه ده نازل
امین وحی تنزیله بلا و درد و غم باجی
.
.
بو یردور کربلا معناده رشگ وادی ایمن
وجوه طیّبینه چون بو خاک پاک اولور مدفن
سنه ویرانه منزل من غریبه کربلا مسکن
بو عهد قسمتی اوّل یازوب لوحه قلم باجی
.
.
باجی شدّت گونونده سن منه همراز و همدم سن
آنام زهرایه محنت مسندینده نایب غم سن
مقام مَحرمیّتده بو گون اسراره مَحرم سن
سنی فی الجمله مطلبدن گرک آگاه ائدم باجی
.
.
آییلماز تا حیاتون وار باشون دنیاده محنتدن
ولی بی طاقت اولما شدّت درد و مصیبتدن
خبر وئرّم سنه بی شمّه اسرار شهادتدن
وقوع واقعات کربلادن کیف و کم باجی
.
.
بو چولده اَل تاپار آل رسوله آل سفیان
ائدللر خاندان مصطفانی خانمان ویران
یازوبلار کوفه دن صادر ائدوبلر قتلیمه فرمان
گلور یوزمین قوشونلار شمر دون الده رقم باجی
.
.
سوسوزلوق آتشینه یاندورالّار آل طاهانی
چیخار سوز عطشدن گوگلره اطفالون افغانی
خراب ائتماقلیقا بالمرّه ملک دین و ایمانی
اولوب کفّار شام و کوفه یکسر هم قسم باجی
.
.
بو چولده دوغرانور چون برگ گُل جسم علی اکبر
اَمر پیکان دَمیندن صود سوسوزدان شیرخوار اصغر
یخالّار قانه غلطان قاسمی قوم جفا گستر
ائدللر قولّارین عباسیمین بوردا قلم باجی
.
.
دوشر تیره تراب اوسته جوانان بنی هاشم
اولور مقتول تیغ و تیر و خنجر قوم و قارداشیم
گچر خورشید انور تک جدایه نازنین باشیم
تاپار رونق متاع ظلم بازار ستم باجی
.
.
بساط حشمت و جاهون اولور مندن صورا برهم
اسیر اولماقلیقا آماده اول باغلا بئلون محکم
حریم عصمته مَحرم اولانماز گرچه نامحرم
ولی زنجیر ظلمه باغلانور اهل حرم باجی
.
.
قضایه وئر رضا وئرمه الوندن صبر و ایمانین
گورنده سینم اوسته شمری چاک ائتمه گریبانین
اوجاتما سس مبادا کیم ائشیتسون دشمن افغانین
چتین دور هر مصیبتدن شماتت لاجرم باجی
.
.
بلا اقبال ائدنده سن بلادن اولما رو گردان
عطای یاردور ائتمه تغافل شکردن بیر آن
نه گلسه عاشقه معشوقدن ایلر قبول جان
بلا شکرانه سینده لا دئمز سویلر نعم باجی
.
.
کمند رشتهٔ ذکر مصیبتده اسیروندور
مقصّر اولسا خدمتده باغیشلا اوز«حقیر»وندور
کَرَم قیل مرحمتله دستگیر اول دستگیروندور
همیشه عفودور آئین ارباب کرم باجی
.
.
#ورود_کربلا #حقیر_خویی
#زمین_کربلایه_چونکی_قویدون_بیر_قدم_باجی
#ترکی
.
✍️ #زبدةالاشعار ✍️
.
🆔: @nohe_torki
نظر دهید