فکر ایلدی حرّ اولدی پشیمان عملیندن #حر #حافظی_تبریزی

حالات حرّ علیه الرحمه
.
✍️ #زبدةالاشعار ✍️
.
🆔: @nohe_torki
.
مرحوم حافظی
.
فکر ایلدی حرّ اولدی پشیمان عملیندن
بو فکره دوشوب ایلیه جبران عملیندن
.
.
بیر مکتب آچوب توبیه مینلرجه کتابی
مینلرجه کتاب ایستوری شرح اولماقا بابی
.
.
اوّل دئدی اوز نفسنه کای شوم ستمگر
یازدیردون آدون صفحۀ تاریخده کافر
واردور نه جوابون دیسه محشرده پیمبر
گوردون نیه بو ظلمی روا اوغلوما ای حرّ
ایتدون نیه بیر بیله جفا اوغلوما ای حرّ
.
.
آزقا لدی هلاک ایلیه غصّه او سعیدی
ناگه یتیشوب فکرینه امّید نویدی
دور ترک ایله کفّاری عمر سعد پلیدی
گیت باب حسینه او سعادت قاپوسون دوؤ
سرچشمۀ احسان و کرامت قاپوسون دوؤ
.
.
گرچه اونی سن تیر بلایه سپر ایتدون
غوغایه سالوب باشینی پر شور و شر ایتدون
کسدون قباقین یولدا دچار خطر ایتدون
اورتَر گئنه گوز، شهدی، گدا حرفینه قالماز
نومید ایلیوب حتماً الى بوش یولا سالماز
.
.
عذر ایسترم اوّل قسم اجدادینه ویرّم
توپراقه دوشوب آند اؤزونون آدینه ویرّم
اوندان صور آند عترت و اولادینه ویرّم
بلکه گئچه بو زار و پریشان گُنهیندن
اغماض ایده بو خانه سی ویران گُنهیندن
.
.
گورسم که منی عفو ایده گلمور اورگیندن
بعداً دوتارام اکبر و عبّاس اتگیندن
ایستر اولاری اوپسم الیندن بیلگیندن
حتماً گئچر اولسا بیله مین قان عملیندن
بو رسم دی عاقل گیچه نادان عملیندن
.
.
اولدی بو خیالیله مصمّم او دل آگاه
اوغلیله غلامین اوزینه ایلدی همراه
دوردی گَله سسلندی تَوَکَّلتُ عَلَى الله
ایتدی آتا سو ویرماقى عنوان و بهانه
اردوى امامه دوتوب اوز اولدی روانه
.
.
دیشده هامی انگشت تحیّر دوروب اعدا
ایلوردی او کیفیته آردیجا تماشا
فکرینده دیردی اولارین بعضی سی گویا
حمله آپارور لشگر سلطان حجازه
یا تازه خبر وار هامی حیرتده بو رازه
.
.
بیر آز که آچوب فاصله کفّار صفیندن
شام اهلی گوروب منحرف اولدی هدفیندن
نادمدی کأنّه عمّل ماسَلَفیندن
وضعین دگیشوب حالین ایدوب حالت تسلیم
اوّلده حسینه باش اگوب ایلدی تعظیم
.
.
دورموشدی حسینونده او آز لشگری یکسر
صف چکموشدى خیمه قباقینده سراسر
واقف جریانه اولوب عبّاس دلاور
شمشیر چکوب نچّه قدم گیتدی قباقه
عبّاسی گوروب حرّ باشین سالدی اشاقه
.
.
فرمایش ایدوب حرّه ابوالفضل علمدار
واردور نه مرامون منه قیل مطلبی اظهار
خجلتله او دم سویلدی ای سرور ابرار
عرضیم واریدی محضر سلطان حجازه
اوز محضرینه عرض ائدرم وئرسن اجازه
.
.
فوراً قیدوب محضر شاهه او هنرور
بوس ائتدى ادب خاکینی عرض ائتدی برادر
قربان سنه نه امر ایله سن ایله مقرّر
وار بیر نفر ایستور سیزی گورسون سوزی واردور
دشمندی ولاکن تبعیت گوزی واردور
.
.
فرمان ملوکانه او شاه ایلدی صادر
بیر نچّه نفر اولدولا بو امره مباشر
وئر آلت حربون دئدیلر اولگله حاضر
هر نه واریدی آلت جنگین اولار آلدى
قویدی الینی باشه اوزین توپراقا سالدى
.
.
سورتوردی یوزون توپراقا آغلوردی یانوردی
گاهی یوزی اوسته سورونوب گه دایانوردی
خجلت سبب اولموشدی، یول اوسته یوبانوردی
زحمتله اوزون محضر سلطانه یتوردی
دوشدی دیلی بنده اوزون اوّلده ایتوردی
.
.
سندیردی بلین بو عملی اهل نفافین
دوتدی اتگین پادشهین اوپدی ایاقین
حضرت بویوروب حرمتی لازمدی قوناقین
سن ایندی قوناقسان بیزه دور اولما پریشان
دردون ندی کشف ایله ایدوم دردیوه درمان
.
.
عرض ایلدی حاشا گوتورم یوز ایاقوندان
لایق دگولم اوپماقا گرچه دوداقوندان
لطفیله پذیرالوق ایدورسن قوناقوندان
خجلت توزونی پاک ایله روی سیهیمدن
احسانیوى اتمامه یتور گئچ گنهیمدن
.
.
کیمسن بویوروب حضرت اونا وار نه گناهون
آز قالدی منی یاندیرا بو آتش آهون
ستّاریدی ، غفّاریدی ، رحماندی اِلاهون
داغلاردان آغور معصیتون اولسا باغیشلر
آساندی خداوندین الینده چتین ایشلر
.
.
بو سوزده بو طرزیله گلوب حرّ کلامه
دولدوردی گوزین اشگیله عرض ایتدی امامه
لعنت گله هند اوغلونا بو لشگر شامه
ایوای منه آلّاندیم عجب گونلره قالدیم
اوّل حرم عصمتی من قورخیا سالدیم
.
.
ایندی ایدیرم توبه پشیمانم ایشیمدن
دوندرموشم اوز منصرفم اوز روشیمدن
حلّیت اولوب عمده خیالیم گلیشیمدن
ایتسونله حلال امر ایله پیغمبره خاطر
بو قاسم و عبّاس و علی اکبره خاطر
.
.
حرّین اله گتدی دل پر سوز و خراشین
رأفتله آپاردی الینی قوزادی باشین
پاک ایلدی حق بین گوزونون آخدوقی یاشین
فرمایش ایدوب صدقیله تائب پیس عملدن
مصداق اونادور که گنهی یوخدی ازلدن
.
.
بو سوز داغدوب حرّ غمین اولدی خرامان
یوز دوتدی حسینه دیدی جانیم سنه قربان
اوّلده کرم قیل منه ویر رخصت میدان
شاها یوزیوه باخماقا خجلت چکورم من
قوی تیز بویانوم قانه که خفّت چکورم من
.
.
چوخ یالواروب عجز ائتدی آلوب رخصت دعوا
اوغلوندا غلامینده ایدوب جنگه مهیّا
میدانه گلوب سسلدى ای فرقۀ اعدا
بسدور گوز آچون بیرجه بو غفلت یوخوسوندان
من تک آیلون سیزده جهالت یوخوسوندان
.
.
سعد اوغلنی اغوا ایلیوب فکر منیّت
یوخدور او ستم پیشه ده روح بشریّت
سیز آگه اولون ایتمیون اوندان تبعیّت
یوخسا سیزه من عرصه نی تنگ ایلرم ای قوم
تا وار قولومون قوّه سی جنگ ایلرم ای قوم
.
.
سعد اوغلی گوروب حرّ ائله که ایلوری گفتار
قورخوب ایده غفلتله یاتان ملتی بیدار
بیر تیر کمان ایستدی فوراً او ستم کار
بیر اوخ قویوب آتدی دیدی اول لشگر کینه
شاهد اولون اوّل اوخی من آتدیم حسینه
.
.
فرمان وئروب اوندان صورا شام اهلینه یکسر
اولسون بو بلا دشتی گرک عرصۀ محشر
یاغدیردى اوخی قطرۀ باران کیمی لشگر
گویا دگوب اوخ قلب پیمبر یارالاندى
اوخ دگدی چادرلاردا حرملر یارالاندى
.
.
بیر جنگ و جدال اولدی که یوخ شرحینه یارا
توزدان دوتولوب گون یوزی اولدی شب یلدا
سایسیز توکولوب توپراقا آز وقتیده اعدا
نه حاله قالور باخ گور او معدود جماعت
الّی نفری درک ائلدى فیض شهادت
.
.
حرّینده رشید اوغلی همان جنگ و جدلده
شمشیر شررباری دوتوب شیر تک الده
یتمش نفری توپراقا سالمشدی ازلده
افسوس شهید اولدی یتیشدی غمی حرّه
شاد اولدی بیله بولدی وئروب عالمی حرّه
.
.
ایوای بالاوای سسلمه دى ایتمدی فریاد
حمدیله ثنائیله خداوندی ایدوب یاد
اوغلومدا سعید اولدی خدایا ایوین آباد
مین ایله اوغول تحفۀ ارزاندی حسینه
هرتک تکی جانیم کیمی قرباندی حسینه
.
.
حرّین بو خیالیله باشی گرمدی جنگه
باخموردی داشا نیزیه شمشیر و خدنگه
دشمن قوشونون قیردی گتوردی ایله تنگه
بیر ظالم اودم رشتۀ امّیدینی قیردی
بیر اوخ او سعیدین آتینون قارننا وردی
.
.
آت ئولدى قویوب فارس هیجانی پیاده
یوز ویردی جسارت سپه ابن زیاده
وئرموردی امان گر چه گنه اهل عناده
ناگه باشنا ظلمیله بیر یاره یتیشدی
بیچاریه گویا خبر چاره یتیشدی
.
.
ضعف عارض اولوب سالدى ایاقدان او جراحت
امداده حسینی چاغورا چکدی خجالت
اما دوتوب اوز خیمیه سسلندی او ساعت
من ایلدیم اوز عهدیمه ایفا سنه قربان
گیتدیم ره عشقونده خداحافظ حسین جان
.
.
.
گویا یتیشوب سمعینه بو ناله امامین
حرّینده بولوردی شه لب تشنه مرامین
مولادن اولور دیدۀ امّیدی غلامین
تا جانی اولان دمده، دم بختینه گلدی
یولدا گوزونی قویمادی سروقتینه گلدی
.
.
اگلشدی باشی اوسته باشین آلدی کناره
قان گوردی وئرور چشمه کیمی باشدا کی یاره
دسمالین آچوب باغلادی سویلوب او فکاره
سن حرّسن ای حرّ ایلدون عهدیوه ایفا
بو اسمه مناسب آنان ایلوبدی مسّما
.
.
جانلار سنه قربان اولا ای شاه لب عطشان
عذر ایستییرم اولسا جسارت سنه قربان
بیر حرّجه بُلموردی سنی فرقۀ عدوان
قویموبدی سنون یاره لرون باغلیا زینب
کامینجه توکوب گوز یاشینی آغلیا زینب
.
.
ای نعمتینون شکرین ایدن بندیه لازم
شکرانۀ نعمتدی سوزوم اولگلان عالم
بیر بوالحسنى اسمی حسن دینوه خادم
من «حافظینی» ایلدی بو نوحیه ارشاد
سنده ایله لطفاً اونون عقبا ائوین آباد
.
.
#اصحاب_الحسین
#فکر_ایلدی_حر_اولدی_پشیمان_عملیندن
#ترکی
.
✍️ #زبدةالاشعار ✍️
.
🆔: @nohe_torki