شهادت امام حسین
.
✍️ #زبدةالاشعار ✍️
.
🆔: @nohe_torki
.
#هدایت_تبریزی
.
اوخ چوخ گلوبدی کرب و بلانون دیارینه
چوخ اوخ دییبدی دام بلانون دچارینه
چوخ اوخ آتیلدی دشت بلا کار زارینه
اما اوچ اوخ سالوبدی جهانه فغان سسی
قورتارمیاندی بو اوچ اوخون ذکر نوحه سی
.
.
دگدی او اوخلارین بیری عباسین آلنینا
ال اولمادی او تیر جفانی چخارتماقا
مانع اولوبدی گورماقینا ساتر دما
قان دولدی گوزلره اولوب احوالی پر اسف
هر سمته باخدی گوردی کی قاندی همان طرف
.
.
دگدی ایکنجی سی او اوخون حلق اصغره
قنداقین ، اوز گوزون ، بویادی خون احمره
کیمدور بیلن نه حاله قالوب نازک حنجره
نازک بوغاز بیچیلدی قولاقدان قولاقینه
اوخ سویله مه وار اوخشاری شمرین پچاقینه
.
.
اما اوچومجی اوخ ایلدی عالمی کباب
سالدی بلا دیارینه وحشتلی انقلاب
قلب امامی گلدی ووروب ایلدی کباب
شدّتله دگدی پاره لدی داغلی سینه سین
ووردی داغتدی مهر وفانون خزینه سین
.
.
توکدی خزینه دن یره قیمتلی گوهری
اوخ سینه دن دگوب دالیدان چخدی پرلری
حالدان سالوب او تیر جفا شاه محشری
چکدی او تیری خارج ایده قانلی سینه دن
اوخ چخمادی ، اذیّتی چون اولدی دگمه دن
.
.
قانع ایدن عبارتی یوخ بوردا مقتلین
قدّین اگیب آپاردی کورک سمتینه الین
تیر سه شعبه نین ال آتوب دوتدی پرلرین
فکر ایلدی چکه دالیدان جانستان اوخی
سینه یاران ، ئورک داغیدان ، خون فشان اوخی
.
.
چکدی اوخی ، چکنده ئورکدن ویروب خبر
رعشه دوشوب وجودینه ، تیترشدی عضولر
گویا الینده یاره لدی ناوک سه پر
قانی کورکدن آخدی دوشوب جان طلاطمه
جان جان دیدی حسینینه معناده فاطمه
.
.
گوردی ئورک یارادی منظّم ورانموری
لنگر ایدور وجودی آت اوسته دورانموری
هر نه ایدور ئورکدن آخان قان دایانموری
فکر ایلدی آخان قانا بیر چاره ایلیه
پیراهنین بوکوب اتگین باسدی سینیه
.
.
لنگر ایدوردی گه صولا گه ساقه پیکری
ضعف ایلیوردی یاخشی گورنموردی گوزلری
مرکب گزوب دولاندی تاپوب بیر چوخور یری
قشلارینی خم ایلدی بتنین قویوب یره
آهسته او یارالی آقانی سالوب یره
.
.
گوردی دورانموری ایاقا اول یارالی شاه
مور و ملخ کیمی آلوب اطرافینی سپاه
بیر قان توکن سپاهدی بیر شاه بی پناه
لشگر ایچینده گیتماقا یول آشدی ذوالجناح
سرعتله خیمه گاهه طرف قاشدی ذوالجناح
.
.
اخیام ده حرملر اوتورموشدی دلغمین
هر کیمسه سیر ایدردی ئوزیله ئوز عالمین
یاتمش گورردی بعضی سی عباس پرچمین
اولسیدی ساغ دیردی ابوالفضل قهرمان
قویمازدی دشمن ایچره حسینی تک اول جوان
.
.
ناگه نه گوردولر بیر آتین گلدی شیهه سی
مأنوسیدی قولاقلارینا ذوالجناح سسی
فکر ایتدیلر خیامه گلور شاه بی کسی
زینب دیدی سکینه قزیم ای بزرگوار
چخ گور خیامه گلدی بابان شاه تاجدار
.
.
چخدی کناره گوردی که الواندی ذوالجناح
زین واژگوندی ، یالی قزل قاندی ذوالجناح
وار غملی بیر حدیثی خبر خواندی ذوالجناح
شیهه چکوب دیور گلین ای بختی قاره لر
ایندی حسینی قوم ستم پیشه ئولدورر
.
.
سسلر اوجالدی اهل حرم چخدی خیمه دن
بعضی گلوب ال آتدی دوتوب قانلی زیندن
بعضی سالوبدی بوینونا قول باشلادی سخن
کای ذولجناح ، نیله میسن نور عینمی
تپراقه سالدین هاردا یارالی حسینمی
.
.
زینب گوروب کی اورت اوشاق دوشدی وحشته
درد وبلا و محنت و غم یتدی شدّته
تاب ایلینمه دی بو غم بی نهایته
تز قاچدی چخدی تلّه او درد و غمه دچار
میدان کارزاریده باخدی گوره نه وار
.
.
گوردی هوانی گرد و غبار ایلیوبدی تار
بیر عدّه الده نیزه و شمشیر اوینادار
بیر سمتیده ولی ایله بیل ازدحام وار
بیلدی دوشوبدی اوردا یارالی برادری
قلبی آلشدی شعله چکوب دولدی گوزلری
.
.
سسلندی یابن فاطمه ای میر مؤتمن
ویر سس منه گوروم یارالی هاردا دوشموسن
امکانون اولسا خیمه لره ساری گلگیلن
گل خیمه لرده عترتیوین یوخ محافظی
بو دشت پر خطردن امانه آپار بیزی
.
.
احساس ایدوبدی مقتل آرا زینبین سسین
یاد دان چخارتدی قانی آخان یاره سینه سین
اقدام ایدوب حمایت حرملردن ایله سین
دورسون ایاقه ایستدی ، اما دورانمادی
اهل و عیاله شهپر ایمن آچانمادی
.
.
گوردی دورانموری ایاق اوسته او شهریار
اخیامه ساری گیتدی دیزی اوسته بی قرار
قان دولدوروبدی گوزلری آلنیندا یاره وار
گلدی چوخور یره یخلوب اولدی واژگون
قالدی ندن مداریده بو چرخ نیلگون
.
.
سفیانی شیعه سین چاغروب ایلدی خطاب
جور و جفا و ظلمه بیله ایتمیون شتاب
خوف ایتموسوز خدا و جهنم دن اجتناب
مردانه لیق مرامینه دارای فرد اولون
دینوزده اولماسا آخی آزاد مرد اولون
.
.
قلبیز دونوبدی یتموسوز امداده یتمیون
اخیامی سویماقا بیله سرعتله گیتمیون
من ئولمه میش حرملریمی غارت ایتمیون
سسلندی ابن سعد لعین ای سپاه شام
اول گلون حسینون ایدون امرینی تمام
.
.
لشگر قیتدی ایتدی حسین دوره سین حصار
هر نانجیبین الده بیر اسباب حربی وار
بعضی سی نیزه ، بعضی قلج ، بعضی داش وورار
بولمم وجودینی یارالار سالدی نه حالا
فکر ایتمورم بدنده سلامت یری قالا
.
.
زینب گوروب کی درد و غمی اسکیلنمدی
قارداشی سسلدی ولی قارداش گلنمدی
چوخ ناگرانیدی ، خبر اما بولنمدی
یوز قویدی قتلگاهه سراسیمه ، اشکبار
گورسون او حالیده یارالی قارداشین تاپار
.
.
گلدی یتنده گوردی دوشوب بیر چوخور یره
بیر عدّه نانجیب اونی ایتمیش محاصره
سبقت ایدردی یاره ورانلار بیری بیره
یوز دوتدی ابن سعده دیدی گورموسن مگر
ایندی حسینی بو سپه کوفه ئولدورر
.
.
یاننام ئولونجه بوته غمده بو محنته
جاخ گور گلوبدی کیمسه کیمه عرض حاجته
دوندردی ابن سعد یوزونی ، باخ شقاوته
بیر یول دونوب دیموب اولارا باری وورمیون
ظاهر اولوبدی جانکنش آثاری وورمیون
.
.
دوتموشدی بانگ اهل جفا چرخ اطلسی
هر کس یتوب ووراردی او بی یار و بی کسی
گلموردی نه سزلتی سی نه العطش سسی
نحر ایلمشدی گل بوغازین نیزه سنان
آغزین آچوب دانشماقا قالموردی هیچ توان
.
.
اولدی اولان اولوبدی پراکنده اشقیا
بیر قالدی بنت فاطمه بیر شمر بی حیا
قان دریاسندا بیرده فالوب کشتی نجا
باخ شمرده شقاوته ، آزاره ، کینیه
قویدی شقاوتاً ایاقین قانلی سینیه
.
.
چخسان یارالی سینیه قانی آخار یا یوخ ؟
سینه دوشوب فشاره فوادی سخار یا یوخ ؟
اوج ایلوب آهی عرش الهه چخار یا یوخ ؟
شمرون ایاقی آلتدا دیمم سندی سینه سی
دوشدی ولی فشاره او رحمت خزینه سی
.
.
زینب دؤزنمدی دیدی ای پست و بی حیا
باخ گور بولورسن هیچ ایاقون قویموسان هارا
وار سینه سینده قارداشیمون جان آلان یارا
قوزا آغیر ایاقیوی اینجیتمه سینه سین
کسمه باشین خراب ایلمه فاطمه ایوین
.
.
ئولدورماقا حسینیمی چوخ ایلمه تلاش
جاندان سالوبدی نوک سنان ، اوخ یاراسی ، داش
قارداشمی الیندن آلانیم اولیدی کاش
جان اوسته دوندریم قوی یوزون باری قبلیه
آغزیندا دل دولانسا اگر اشهدین دیه
.
.
بولمم نه اولدی آچدی حسین قان دولان گوزون
ایتدی اشاره زینبه سندرما ئوز ئوزون
گلسه نقدری درد و محن صبر ایدون دؤزون
گیت خیمه گاهه اهل حرمدن مواظب اول
غارت ایدرله ایندی خیمدن مواظب اول
.
.
بیرده دولاندیروب گوزون اول سرور امم
شمره باخوب بویوردی بولورسن که من کیمم
آگاهسن که خاتم پیغمبر اوغلویم
بولّم دیدی علیدی ، آتان فاطمه آنان
آدین حسین ، ئوزون ایاقیم آلتدا قالمسان
.
.
آدین سوروشدی ، شمردور آدیم دیدی اونا
فرمایش ایلدی نه دیوب دوزدی مصطفا
ویرمیش خبر حسینیمی اول کس بویار قانا
بنزر توکی دوغوز توکونه اول ستمگرین
اوخشار ایتینده بورنونا بورنی او کافرین
.
.
شمره دگوبدی سوز، اونی دیوانه ایلدی
جدّین منی ایته ، دوغوزا اوخشادوب دیدی
سینن ده کی پیمبر ئوپردی او سینه دی
بیر نوعی ئولدوروم سنی پیغمبر آغلاسین
زهرا دیسین اوغول وای آتان حیدر آغلاسین
.
.
گوتدی ایاقینی سینه سیندن قویوب یره
بیر ظلم ایدوب که فکری سخلمازدی باوره
ال آتدی او یارالینی یوز اوسته دوندره
فکری بو اولدی قان ایلیه گوزلرین یاشین
دالدان کسه جفائیله میر حرم باشین
.
.
دالدان کسوردی باشین حسینین بو علّته
ایستوردی که جان اوسته سالا چوخ اذیّته
باخ شمرده قساوت قلبه ، شقاوته
شمشیری چکدی حشر و قیامت بپا ایده
اول یاره لی باشی بدنیندن جدا ایده
.
.
بسدور دایان «هدایت» حیا ائت حسیندن
عمرون بویی یاز ، آغلا ، نوا ائت حسیندن
هر نیله سنده محض رضا ائت حسیندن
نوکر آدین قویان آقایا خدمت ایلیر
مسؤل اولا نه امرده جدّیت ایلیر
.
.
#حسینیه_شهادت
#قتلگاه
#اوخ_چوخ_گلوبدی_کرب_و_بلانون_دیارینه
#ترکی
.
✍️ #زبدةالاشعار ✍️
.
🆔: @nohe_torki
نظر دهید