اربعین
..
..
..
..
رسول رزاقی
..
..
..
..
قارداشین قبرینون اوستونده آچوبدور باجی باش
دئدی خوش گلدون ائله زینبه عطشان قارداش
..
..
..
..
منی دیندیر باجوام قلب یارالی یارالی
دوشمیشم قرخ گون اولار سندن آرالی یارالی
یغمیشام باشیمه بیر دسته وفالی یارالی
گزمیشم دشت و بیابانلاری ویلان قارداش
..
..
..
..
جسموین گورمیشم عاشوریده چوخ یاره سینی
قوی سالیم قبروین اوسته باشیمون قاره سینی
قلبیوین منکی او گون ایلمدیم چاره سینی
توخدیوب یاره سی یا اینکه وئرور قان قارداش
..
..
..
..
ابر باران کیمی رخساریمه قانیاش الرم
قبروین تپراقینا زلفیمی الآن بلرم
اولسا امكانیم اگر قبروه تیز تیز گلرم
یاندیران اوخشامالار ایلرم عنوان قارداش
..
..
..
..
ظلم و جوریله آپاردی منی عدوان گئتدیم
گئتدیم اما بیلوسن دیده سی گریان گئتدیم
سنی گونلر قباقیندا قویوب عریان گئتدیم
نعشوی دفن ائلیم اولمادی امکان قارداش
..
..
..
..
زیر پا سینه ده دُردانه لروندن دئ منه
زخم سر نیزه سنان پاره لروندن دئ منه
آتام اوغلی دیله گل یاره لروندن دئ منه
منده عنوان ائلیوم نیلدى عدوان قارداش
..
..
..
..
سنکی باتدون قانوا چیخدی جدا اوسته باشون
باش و قولدان کی حسین گئچدی گوزل قارداشون
ناگهان مینلریلن خیمه لره دولدی قُشون
قالدیم اول حینده آواره و حیران قارداش
..
..
..
..
ساجدیم امر ائلدى قاچدیلا قیزلار چوله
یاندیروب خیمه لری دست عدو وئردی یله
قورخوسیندان بالاجا قیزلارون آز قالدی ئوله
نیلیوم کوفه لیده اولمادی وجدان قارداش
..
..
..
..
سالدیلار آت دوشینه خورداجا هر قیز اوشاقین
پیکرین قمچیلر ئوپدی تیکان ئوپدی ایاقین
قوریدوب ایستی هوا گل مثلی دل دوداقین
گه قاچوب گه دایانوب ایلدی افغان قارداش
..
..
..
..
بیر قیزین دامنی اود دوتدی قاچوب صحرایه
او قیزین گوزلری اوخشیدی ننم زهرایه
اولمادی بیر نفریم باشینه سالسون سایه
عنقریب اولدی دوشه عرصه ده جاندان قارداش
..
..
..
..
بیر سؤزوم واردی حسین قلبیوه آتش ویراجاق
تشنه اکبادوی قارداش تزه دن یاندیراجاق
جسم سجّادیمی درک ائتدیم الو یاندیراجاق
سرپرست سیز قالاجاق گوردیم اسیران قارداش
..
..
..
..
آز قالوردی اود ایچینده یانا اول فرزانه
یوخودی طاقتی تا چکسون اؤزون بیر یانه
اؤزیمی ویردیم اودا چون یارالی پروانه
پر لریم یاندی چیخارتدیم ولی اوددان قارداش
..
..
..
..
باتدی گون اولدی قرانلوق قاباغا گلدی گئجه
قیزلارون پاره چادردا دئموسن یاتدی نئجه
شمع و فانوس یوخیدی گوزوم اغیاری سئچه
خیمه نی دور ویراردیم ولی هر آن قارداش
..
..
..
..
بیر نفر درک ائلدیم خیمه لره ساری گلور
ائله بیلدیم گینه ده دشمن غدّاری گلور
بیلمدیم عترتیوی گورمگه دلداری گلور
سسلدیم گلمه بیزی ائتمه هراسان قارداش
..
..
..
..
بیر قدمده گله سن سسلیم عبّاس گلر
یا حسین محنتیمی ایلیر احساس گلر
یا چاغیرّام بابامی موقع حسّاس گلر
دیرم زینبه لطفون ائله احسان قارداش
..
..
..
..
گلدی القصّه یتیشدی ائلدی جلب نظر
زینبون سوز دلی ای یارالی وئردی ثمر
گوردیم اوندا بابامی گل یوزه قانیاشی اَلَر
ممکنوم اولمادی ذبح ائتمگه قربان قارداش
..
..
..
..
واحسین ناله سی دولدوردی او دم آفاقی
نچه لحظه بیزیلن همدم اونون اولماقی
اولدی باعث بو سؤزی نظمه چکه «رزاقی»
اونی زوّار ائله اؤز قبریوه عطشان قارداش
..
..
..
..
نظر دهید