روضۀ حضرت ابوالفضل (ع)
.
✍️ #زبدةالاشعار ✍️
.
🆔: @nohe_torki
.
مرحوم غمکش
.
قارداش سسینی درک ائلدی تلیده قارداش
ئوز قویدی پریشان دلیلن علقمه بیرباش
پیوسته آخار صفحۀ رخسارینه قانیاش
سس وئر سسیمه سسلدی، غوغا ائدور اوباش
تا درک ائلیوم هاردا ییخوبلار سنی قارداش
.
.
دشمن دولودی خیمه و میدان آراسیندا
توپراقه ییخوبلار سنی عدوان آراسیندا
پیکر یارالی باش یارالی قان آراسیندا
سعی ایله اخا گرد مصیباته بورونمه
توپراقلارین اوستونده حسین جانی سورونمه
.
.
تا گلدی یئتیشدی باشینون اوسته دایاندی
باخدی ئوزونه آهیله دل خسته دایاندی
خم قامت حسین، قامتی بشکسته دایاندی
سسلندی بئلیم سیندی ابوالفضلیم اماندی
سس وئر گؤزون آچ قاراشوین حالی یاماندی
.
.
آتدان کی ییخیلدون یئره، پرچمده ییخیلدی
اردوی حسین قارداش همان دمده ییخیلدی
حیدر ائوی بو محنت اعظمده ییخیلدی
عالملره دردوندن اخا ولوله دوشدی
چوخ سعی ائلدیم تئز گلم امّا بئله دوشدی
.
.
پرچم کی الوندئیدی الیم بازیدی قاراش
اولاد علی جمله سرافرازیدی قارداش
درد و غم زینب بیلوسن آزیدی قارداش
قطع اولدی امیدیم داخی یوخ چارم ابوالفضل
مین درده بو صحراده گرفتارم ابوالفضل
.
.
غم یاغدی غموندن گؤزلیم کرببلاده
موج ایلدی غرق ائتدی منی بحر بلاده
اطرافیمی دور گؤر کی آلوب آتلی پیاده
اشرار آرا عبّاسیم آدامسیزدی حسینون
قارداشوی تک قویما کی اوغولسوزدی حسینون
.
.
دردوندن حسین زار و نواخواندی، حزیندی
زینب اورگی داغلیدی، هجرونده غمیندی
قارداش ئولومی قارداشا قارداش نه چتیندی
قلبیم سیخانون قلبینی الله اؤزی سیخسون
شهلا گؤزوه اوخ ویرانون گؤزلری چیخسون
.
.
ای گلشنیمون سرو دل آراسی گؤزون آچ
حیدر آتامون شیر دل عبّاسی گؤزون آچ
آرامیم آلان دیدۀ شهلاسی گؤزون آچ
هر لحظه سنون آدوه بالیده لنردیم
بو قامت شمشادوه بالیده لنردیم
.
.
بو کوفه لیلر طاقتیمی آلدی ابوالفضل
کیم حیدر اؤپن قوللاروی سالدی ابوالفضل
حسرت دل زاریمده منیم قالدی ابوالفضل
واردی یئری بو قارداشوین صورتی سولسون
یوخدی قولون آخر سنیلن قول بویون اولسون
.
.
ای ماه منیریم سنه اولدوزلاریم آغلار
سایونده سنون دالدالانان قیزلاریم آغلار
ای وای عمو وای سسلر آدامسیزلاریم آغلار
سس وئر بو چتین لحظه ده قارداشوه قارداش
آچ گؤزلروی بیر دولانوم باشوه قارداش
.
.
«غمکش» گؤزوین یاشینی رخساروه باغلا
حسرتله چئکوب آه دل عالمی داغلا
نهر اوسته سوسوز جان وئرن عبّاسیمه آغلا
ال چئکمه نقدر عمرون اولا بزم عزادن
سسله وای ابوالفضل، وای آقا، دویما نوادن
.
.
#عباسیه_شهادت
#قارداش_سسینی_درک_ائلدی_تلیده_قارداش
#نوحه_های_محرم_غمکش
#ترکی
.
.
🆔: @nohe_torki
نظر دهید