اجازه خواستن قمر منیر بنی هاشم (ع)
.
.
مرحوم عاصی تبریزی
.
.
قالمیوب صبریم حیاتیمدن اولوب بو سینه تنگ
باخ بو پوزقون حالیمه وئر سیّدی فرمان جنگ
جانیم اولا قربان سنه
وئر رخصت میدان منه
.
.
دویموشام عمریمدن ای فخر تمام کائنات
عین ذلّتدور منه بو زندگانلوق بو حیات
من باخوم اما سوسوزدان خیمده یانسون بنات
قویماسون سوز عطش گول یوزلرینده آب و رنگ
.
.
گر آچوب قولّاریمی ائتسن منی جنگه مجاز
قویمارام بو چولده قالسون بیر نفر اهل مجاز
قولومی آخر حقیقت بول سن ای شاه حجاز
ترجمان وئرّم ایکی قول اتمَسم بیر بیله جنگ
.
.
نارَشیدم من فرات اوسته علم گر وورماسام
خون اعدائیله بو گون بو چولی دولدورماسام
لشگری برهم ائدوب بیر شور محشر قورماسام
قویمارام قالسون نه سر لشگر و نه سرهنگ و هنگ
.
.
گر منه وئرسن اجازه ای امام مستظام
قویمارام قالسون بو لشگرده بو تیپ و بو نظام
باخما واردور بو قوشوندا چوخ هنرمند عظام
گر بو لشگر فرض اولا دریا منم شاها نهنگ
.
.
من او الله شیرینون دعوا گونی بیر شیریَم
باشی اوسته دشمنین مسلول اولان شمشیریَم
من علیّ المرتضانین پور با تدبیریَم
باخمارام باران کیمی یاغدیرسا دشمنلر خدنگ
.
.
من باخوم سولسون سوسوز قیزلار جمالی غنچه وش
خیمه لردن عرشه اوج ائتسون صدای العطش
اولماسون بیر شربه سو ائتسون علی اصغرده غش
باغلاسون راه فراتی فرقۀ بی نام و ننگ
.
.
گر منی ایتسن مرخّص ای شه ذولاِقتدار
قویمارام بو آل سفیاندان قالابیر نامدار
کوفه ده ابن زیادون جانینه سالّام شرار
شامده وورّام یزید بی حیایه پالهنگ
.
.
ای مروّت کانی ای فخریّۀ آل مناف
گلمیوب ائتسون ابوالفضلون تماشای مصاف
زنگ غمدن قلبیمون آینه سینی ائیله صاف
لطف ائدوب وئر جلوه قلبیمدن سیلینسین تا بو زنگ
.
.
اذن وئر آخر آلوم بو گون ئولنلر قاننی
ائیلیوم قان دجله سی دشت بلا میداننی
ختم ائدوم فوراً بو دعوانون عمل دیواننی
ضرب و شستمدن نتیجه تا آلا روم و فرنگ
.
.
قوی گئدوم بو قومیله یا ائیلیوم جنگ و جدل
یا الیمدن آل بو شمشیری سن ای صبح ازل
بس هاچان لازم اولور آخر بو شمشیر و بو أل
بوندان آرتوخ قالمیوب منده توانای درنگ
.
.
ای آدی سقّا اوزی امّا شهید تشنه لب
وی گوزل آدی اولان باب الحوائج منتخب
عاصی بیچاره ائیلر حاجتین سندن طلب
صدق قلبیله وُروب بو دامن مقصوده چنگ
.
.
#عباسیه #عاصی_تبریزی #عباسیه_شهادت #ترکی #زبدةالاشعار
نظر دهید