قان پیکریندن جوش ائدن صدچاک اولان اعضا حسین #حسینیه_مصیبی_تبریزی

« یا اباعبدلله الحسین (ع) »
.
.
.
مصیبی تبریزی
.
.
.
قان پیکریندن جوش ائدن صدچاک اولان اعضا حسین
آرام قلب مصطفی دُردانۀ زهرا حسین
.
.
عرش خداده عشقیلن طیّ حجابات ایلین
باشدان گئچن معراجیده ئوز عشقین اثبات ایلین
ایستی قوم اوسته جان وئروب سیر سماوات ایلین
قربانگه معبودیده عشقین ائدن معنا حسین
.
.
قان لجّه سینده کشتی اسلامیانه نوح اولان
عزّ و وقار و جاهیده پیغمبره ممدوح اولان
قلب نبیِّ مصطفی تندیس عشقه روح اولان
دین پهنه سینده کشتی ایمانه دریا یا حسین
.
.
ای سرّ کاف وها و یا وی رمز عین وصاد عشق
سن سن منای عشقیده فرمانده مرصاد عشق
عشقونله ای مصباح دین بنیان اولوب بنیاد عشق
ای قاف دین عترته خوش بال و پر عنقا حسین
.
.
شان و جلالت ده همان مافوق روح الله اولان
کربوبلاسی طور حق ثاراللهه خونخواه اولان
فرعونیان کوفه و شامه کلیم الله اولان
مصداق عرش اللهیدور اول سینه سی سینا حسین
.
.
قرآن حقده شانینه ذبح عظیم عنوان اولان
میدان کاروزاریده ئوز قانینه غلطان اولان
شیرازه سیز قرآن ،ره قرآنیده قربان اولان
قان چشمه سیلن ایلین قان مقتلین مینا حسین
.
.
ای مقتل غمناکینه گویدن قرا یللر اسن
باشین قفادن خنجر جلاد اهریمن کسن
عشقی بوتون عاشقلرین بوینوندا حق پیما رسن
جان بذل ائدن جانانینه لاقید و بی پروا حسین
.
.
توپراقه تا قانین آخوب اعجاز شایان ایله دی
رجحان حقّانیتی طاغوته اعلان ایله دی
صبرین بلا و محنته ایوبی حیران ایله دی
مدهوش اولوب ایثاریوه باشدانگئچن یحییٰ حسین
.
.
ای باءِ بسم الله حق تنویر احساسون سنون
صولمیش خزان ظلمیله گلبوتۀ یاسون سنون
درس وفانی عالمه تا وئردی عباسون سنون
سس گلدی عرش وفرشیدن صدمرحبا سقا،حسین
.
.
هر قطرۀ قانین سنون آفاقی تسخیر ایله دی
برهان وعقل و منطقی عشقون زمین گیر ایله دی
باش سیز بدن گودالیده معراجی تصویر ایله دی
عطشان ایچن جام بلا قلبی اولان دریا حسین
.
.
هر اوخ کی دگدی سینه وه قاندان وئروب پیکانه سو
عشقون قوانینی سینار گر دونمیه القانه سو
قربانگه عشاقیده لازم دگور قربانه سو
قانین سولی پیکانلارا سرچشمۀ اِبقا حسین
.
.
بیر قوم کی مهمانی نون کسمیش قفادن باشینی
قوللارینی ذبح ایلیوب آتدان سالوب قارداشینی
نیزه باشیندا باشلارا بذل ایلیوب شاباشینی
بیله شرف سیز میزبان گورمز داخی دنیا حسین
.
.
دوتموش«مصیّب»قلبینی حسرت توزی ای دادگر
کرب و بلانین فرقتی ائتمیش اونی فریادگر
گوستر صفالی قبریوی ای شیعیه امدادگر
سن مرتضانین اوغلوسان کان کرامت یا حسین
.
.
#حسینیه_مدح
#حسینیه_شهادت
#قان_پیکریندن_جوش_ائدن_صد_چاک_اولان_اعضا_حسین
#مصیبی_تبریزی
#ترکی