کوفه
.
✍️ زبدة الاشعار ✍️
?: @nohe_torki
.
مرحوم هندی
.
قران اوخیان باش یارالی باشوه قربان
باش باشه چاتان اوغلووا قارداشوه قربان
.
گل گوزلریوون قانینی اشگیمله سیلیم من
آیات اوخین دیللره قربان کسیلیم من
.
حاشا بو منوّر باشی تشبیه ایدم آیه
آی نیزه ده قران اوخوماز آیه به آیه
آیات مبین دور بو باش آیات خدایه
باشدان ایاقا عشقیله پرشوردی بو باش
پیغمبرون آلنیندان اولان نوریدی بو باش
.
وار بو یارالی باشون عجب حُسن لقاسی
خونگرم دوداقلاردا حزین طرز اداسی
حق کامه سی کهف آیه سی جان بخش صداسی
ایوای بو باش قارداشیمون باشینه بنزر
بیر صورت زیبادی که نقاشینه بنزر
.
بو جاذبه لی سسده بویوک بیر هیجان وار
دنیا دولوسی جان یارادان جوهر جان وار
زینب کیمی قلبونده مگر سوز نهان وار
اود دوتدوم آلیشدیم بو یانقلی نفسوندن
جان یولدی گیچن گونلریمون نقشی سسوندن
.
عطشان کسیلن باش لب شادابی نشان ویر
لعل لب آرا لؤلؤ نایابی نشان ویر
کهف آیه سی تک آیت اعجابی نشان ویر
دور کرب و بلا سمتینه اعجازیوی گوستر
کهفینده یاتان پیکر جانبازیوی گوستر
.
ای باشی سرافراز ایلین نوک جدانی
دلکش سسیله لرزیه سال موج فضانی
تیترت یری افلاکی بوتون کون و مکانی
قوی دولدورا آفاقی کمال کلماتون
عالم گوره یکساندی حیاتونله مماتون
.
قرآن اوخی قرآن اوخوماق ذکر جلیدور
گورسونله بو باش صاحبی نور ازلیدور
دردانۀ زهرادی حسین ابن علیدور
تحصیلینی تکمیل ایلیوب دوش نبی ده
تفسیر یازار نیزه ده قرآن مجیده
.
حسرت چکرم نیزه نون احوالینه قارداش
اوپدی بوغازوندان یتوب آمالینه قارداش
افسوس باجون زینبون احوالینه قارداش
دشمنلر الینده گزر الدن اله باشون
قویمازلا منیم یانیمه بیردم گله باشون
.
قان قطره سی مرجان کیمی مژگانه دوزولموش
جان رشته سینه گوهر شادانه دوزولموش
افروخته مشعلدی نیستانه دوزولموش
دلخون جگریم پارچالانوب پاره سی دور بو
بیر داغ درونون باش آچان یاره سی دور بو
.
اوّل باشینی باشدان ایدر شمع شبستان
روشن اولور اوندان صورا خلوتگه جانان
سن عشقده سرخیل وفاسن سنه قربان
باش سهلیدی سن حق یولونا واریوی وئردون
دوتدون قولونی قولسوز علمداریوی وئردون
.
بیر باش که ایدر ناز اونون جلوه سی نوره
بیر باش که باشین قویمازیدی سینه حوره
خولی نه جثارتله اونی قویدی تنوره
سن ای گل رعنا نیه توپراقه باتوبسان
یوخسا گیجه کول اوسته تنور ایچره یاتوبسان
.
بولدوم بو اوزاق یولاری قارداش نیه گلدون
باش چکماقا باشسیزلارا بو کوفیه گلدون
لیلانون اوغول وای سسینه وای دیه گلدون
خوش گلدون عجب وقتیده سالدون بیزی یاده
گل قویما گئداخ بزمگه اِبن زیاده
.
ای پادشهیم قبله گهیم بنده نوازیم
زنجیر ستم گردن بیماره نه لازم
آرتار اونا باخدوقجا منیم سوز و گدازیم
وار گور یری باشین آچا زلفون یولا زینب
قانه بویانان باشوا قربان اولا زینب
.
بیر عائله نون مسکن آبادی یخلدی
تاراجه گیدن لانۀ یبربادی یخلدی
طوفان بلاخیزیله بنیادی یخلدی
حسرت کشم آخر نه اولور یانیمه گلسن
ای روح و روان، روح گلور جانیمه گلسن
.
افسوس گل نازیمی دست ستم آلدی
بلبل باش آلوب گئتدی گلستانی غم آلدی
بیر قاره بولود چیخدی بیابانی چم آلدی
گل گیتدی خزان گلدی چمن ایللره قالدی
گرمیّتِ جمعیّتیمیز محشره قالدی
.
گوردوم یارالی باشیوی باش محمله چالدیم
بنزتدیم او باشه باشیمی کام دل آلدیم
سن سیز آنام اوغلی نه یامان گونلره قالدیم
صد شکر باشون سایه سی دوشدی باشیم اوسته
آرتیخ منی وورمازلا آخان گوز یاشیم اوسته
.
هر یانه گیدم منله گلیر جور زمانه
خوش مونس دلسوزدی وار منّتی جانه
کیم گوردی یاناندا گَلَه پروانه فغانه
عشقونله سنون گوگلومی قارداش غمه ویرمم
عشق عالمینون عالمینی عالمه ویرمم
.
کیم کعبۀ مقصودی گوروبدور چخا سیره
سیرینده بوتون خیر ویره یاریله غیره
بو سیر برادر چکر آخر سنی دیره
گوزلر یولووی ایمدی درِ دیرده عیسی
یوز قبلیه سجّاده آچوب راهب ترسا
.
ای پایۀ ارشادی سماواته چخان باش
گلدستۀ عرش اوسته مناجاته چیخان باش
یالقوز باشینا گردش شاماته چخان باش
شامون یولی چوخ قورخولیدی تک باشا گئتمه
گئتمه بو باشین زحمتی باشدان آشا گیتمه
.
دائم باشون آردینجا گلور محنت ایام
گورسون بو باشون امری تاپار هاردا سرانجام
من تک سورونور یرده باشون سایه سی تا شام
ذرات گزر سیرده خورشید دالنجا
منده گزرم سایۀ امّید دالنجا
.
حسرتله اولور ساکن ویرانه رقیه
ویرانه نی ایلر بیزه غمخانه رقیه
طوفان مصیبتده دویار جانه رقیه
شام ایچره غریبانه قالیر مهد مزاری
دائم او مزار اوسته گزر ناله زاری
.
#هندی ندی بو سنده اولان حرص اضافی
ترک ایله سخنگولره میدان مصافی
هر فرده بو بازاریده کافیدی کلافی
شاه شهدا چون آچار ابواب جنانی
البته سالور یاده بوتون نوحه یازانی
.
#کوفه
#قران_اوخیان_باش_یارالی_باشوه_قربان
#هندی_تبریزی
#ترکی
.
✍️ #زبدةالاشعار ✍️
?: @nohe_torki
نظر دهید