قلب ربابی ناله ایلن داغلاما علی #اصغریه_نخستین

زبانحال حضرت رباب (س) با حضرت علی اصغر (ع)
سوال و جواب
.
.
مرحوم نخستین اردبیلی
.
/// زبانحال حضرت رباب (س) ///
.
.
قلب ربابی ناله ایلن داغلاما علی
اخیامیده سوسوزدی هامی آغلاما على
.
.
یاندیرما بو یانان ئوره گی دود آهیدن
آهون چیخار دومان کیمی بو خیمه گاهیدن
شش ماهه یوسفیم باخوسان قعر چاهیدن
یعقوب کربلا علی جان یاد إئدر سنی
شهزاده سن بو غصّه دن آزاد ائدر سنی
.
.
دریا کیمین گؤزون آخنور سو کنارینه
گؤز یاشی داشلانور توکولور غم غبارینه
لعنت بو چرخ کج روشین کج مدارینه
یاندیردی تشنه لیک سنی بو چرخ یانمادی
رأیونجه چرخ کج روش اصلا دولانمادی
.
.
رنگون طلای زرده دونوبدور فشاریدن
غم دوروی آلوب بالا دورت بیر کناریدن
اغبار وار اوغول، آیرور یاری یاریدن
نالون کسیلدى شدت آه و فغانیدن
ای گول سو ایسته مه بو سوسوز باغبانیدن
.
.
سنگین اولوب چکنمیوسن بار عشقووی
ای درّ عشق، داده چاغور یار عشقووی
آگاه ایله بو درّه خریدار عشقوری
صرّاف عشق آلار سنی الان قوجاقینه
آغوش شهده سن گئدوسن سو سراقینه
.
.
ناخون عشقی وورما على غم دوتان داغا
فرهاد عشق اولوبسان أوغول صود چیخارتماقا
قربان اولوم او گؤز یاشووا قانلی دیرناقا
ویردوقجا تیشه صود یرینه قان چخار على
روحیم دوشوب فشاره منیم جان چخار على
.
.
ای کوه کن بو کوه خون آلوده ویرما چنگ
شرمنده ام خجیلم اوغول إئتمه منله جنگ
چارم آزالدی باشیمه دنیا اولوبدی تنگ
هم من دئمم فشاره دوشوب جانیم آغریور
اولسون قسم او جانووه پستانیم آغریور
.
.
آهسته آغلا قوی سسووی دشمن آلماسین
اخیامیدن بو ناله کناره اوجالماسین
هئچ کیم علی آنون قالان احواله قالماسین
تئزتئز باخوب منیم یوزومه آغلاما على
سیلِ سرشگووی یوزوه باغلاما على
.
.
یوخدور دؤشومده صود بالا سندن خجالتم
من بی وفا آنا دگولم کنز محنتم
دریای غمده من على غرق مصیبتم
بو قدری آغلاما منی آغلار قویان بالا
بو داغلى قلبین اوستونه داغلار قویان بالا
.
.
قانلو دؤشوم دوداقلاروی قان إئدوب على
قانه بویانماقی سنه آسان إئدوب على
نوحون محیط عشقیده طوفان إئدوب على
اما دوشوبدی کشتی طوفان طلاطمه
طوفانیده قالوبدی حسین ابن فاطمه
.
.
ای گلستان عشقه منیم غنچۀ تریم
بو فکرى إئتمه ای سوسوز آهویه بنذریم
یوم گؤزلرون دیوم سنه من لایلای اصغریم
گهوارووی رقیّه سنون ترپه در بالا
لایلای دیوب دل آچماقووی ئورگه در بالا
.
.
لابلای سسین إئشیتمیوسن یا که یاتموسان
یوخ دوشلریمده صود منی سن گؤزدن آتموسان
سو قان اولیدی گؤز یاشووی قانه قاتموسان
هر دم دونوب باخورسان على نهر علقمه
عباس عمون سو اوسته ئولوبدور سو ایسته مه
.
.
بیر ذرّه استراحت إئله راحت أول بالا
هم صحبتم سنیله من هم صحبت اول بالا
صبر إئت بلایه آز بئله بی طاقت أول بالا
ایسلاندی گؤز یاشونلا منیم قاره معجریم
یاندیردی بو یانان ئوره گیم یاندیم اصغریم
.
.
من هئچ، بو قدری آغلیوب آغلاتما عمّه وی
قلبیم یانور اوجالتما بئله آه و ناله وی
نقش ایلیوم ئوره ک باشینا غملو نقشه وی
قوی باشوی علی ایکی پستان آراسینا
گؤز یاشی مرحم ایله مه دیرناق یاراسینا
.
.
.
.
#اصغریه_شهادت
#قلب_ربابی_ناله_ایلن_داغلاما_علی
#اولسیدی_دل_آچاردی_بو_نوعی_گلاییه
#ترکی
#زبدةالاشعار