شهادت حضرت زهرا (س)
.
✍️ زبدة الاشعار ✍️
.
🆔: @nohe_torki
.
محمد هوشمند
.
قیامت دیر مگر یارب بو غمده ماسوا آغلار
نه وار بیت امامتده بوگون آلعبا آغلار
.
گلیب یئر گوی نوایه قدسیان باشین آچیب یکسر
جهانی ترک ائدیب زهرا، بوگون ارض و سما آغلار
.
بهار آفرینش، ظلم اعدادن خزان اولدی
گل آغلار، گلستان آغلار، ائده ر ناله صبا آغلار
.
جفا و کینه دن اود ووردولار بیت الامان یاندی
قاپی آغلار، در و دیواریده نقش و نما آغلار
.
چمن آغلار، یئل آغلار، بلبل آغلار گول فراقینده
دل آغلار، دلبر آغلار ،یاره لر آغلار دوا آغلار
.
آییردی گردش دوران وفالی یاری یاریندن
گلر جنت ده فریاده آچار باش مصطفی آغلار
.
داخی محراب زهرادن، صدای ربنا گلمز
علینین دودمانیندا آتا آغلار، بالا آغلار
.
قبول اولدی دعاسی دینجلیب آلامیدن زهرا
قیزی زینب بو محنتده سالار باشه قرا آغلار
.
گلیب دیر دورت بالا افغانه زهرا نعشنین اوسته
آنا وای سسلینده هر بالا ، شیر خدا آغلار
.
توکر یاقوت تک گوزدن عذاره اشگینی کلثوم
ایکی باجی ،ایکی قارداش، بو غمده برملا آغلار
.
آنا گئتدی بو دنیادن بلالر زینبه قالدی
یانار نار فراقینده دئیه‌ر ایوای آنا آغلار
.
علی مشکل ده دیر هر دم دئییر حسرتله یا زهرا
گوز آچ باخ گؤر عم اوغلون درده اولموش مبتلا آغلار
.
علینی هئچ بو حالدا گؤرمه میشدی دوست یا دشمن
قالیب دی چاره سیز یالقیز شه مشگل گشا آغلار
.
ائله برهم دی احوالی علینین بو قضایادن
پریشان حالینی گؤرسه یاد آغلار، آشنا آغلار
.
وئرنده غسل زهرایه، علی آز قالدی جان وئرسین
قویوب دیواره اوز سسیز، او شاه لافتی آغلار
.
حسینین ناله سی افلاکه بیر شور و نوا سالدی
گوروبله مغسل اوسته دیده‌ی خیر النسا آغلار
.
دئییر اسما دل شبده، علینین قلبی اودلاندی
چکیب ال غسل دن گوردم علی المرتضی اغلار
.
بو حالدا تسلییت وئردیم ،ساغ اولسون باشین ای مولا
سنی هیچ گورمه میشدیم من بئله ای مقتدا ،آغلار
.
بویوردو دیل دولوب دردیله بیر کیمسه بیلن یوخدی
وار حقیم گر گوزوم قالسا، منیم صبح و مسا آغلار
.
سفارش ائیله دی زهرا وئرم غسلین لباس اوستن
نهان سری عیان اولدوقجا چشم ماسوا آغلار
.
بو مدت ده وفاسیندن غمین مندن نهان ائتدی
علینین عمری اولسا هر قدر ائیله‌ر نوا آغلار
.
وفاده بیر نفر زهرایه چاتماز، چوخ وفالیدی
یقین قبر ایچره بو احوالیمه اول با وفا آغلار
.
اؤزو گئتدی منی تک قویدی بو دنیای فانی ده
منه بیگانه آغلار، دشمن آغلار، اقربا آغلار
.
نئجه غسل ائتدی زهرایه نئجه توپراقه تاپشوردی
نئجه آیریلدی قبریندن بو درده انبیا آغلار
.
علی اولدی دیریلدی تا که گنج عشقی گیزلتدی
بقیعین توپراقی تا حشر اولنجا بیصدا آغلار
.
توکنده قبرینه توپراق سپردی باشینه هردم
علینین محنتین یاده سالار اهل ولا آغلار
.
قلم یازدوقجا هجرانی گوزوندن قان توکر #مدهوش
یانار دیلدن ایدر ناله بو غمده بی ریا آغلار
.
#محمد_هوشمند
#فاطمیه_شهادت
#قیامت_دیر_مگر_یارب_بو_غمده_ماسوا_آغلار
#ترکی
.
✍️ #زبدةالاشعار ✍️
.
🆔: @nohe_torki
نظر دهید