زبدةالاشعار

قویدی دنیایه قدم خسرو خوبان آناسی #فاطمیه_شعاع_تبریزی

میلادیه حضرت زهرا (ع)
#گریز به شهادت
.
.
مرحوم شعاع تبریزی
.
.
قویدی دنیایه قدم خسرو خوبان آناسی
اصل قرآن بالاسى ناطق قرآن آناسی
.
.
آدی زهرا اوزی محبوبۀ خلّاق جهان
خلق ایدوب عالم نسواندا اونی تک یارادان
مکّه ده اولدی بو گون طیّب و طاهر آنادان
باخوب اولدی بالانون حُسننه حیران آناسی
.
.
نجه زهرا که سپهر ادبه شمس ضحا
معدن عفّت و عصمت اوزی دریای حیا
صورتی معنی والشّمس مه برج وفا
فلک عشقده اون بیر مه رخشان آناسی
.
.
نجه زهرا که اونی خالق مابعد وازل
یارادوب سویگولوسون دهرده بی مثل و بدل
اودی عالمده گوزل لردن اولان عُمده گوزل
گورسه حیرتده قالار یوسف کنعان آناسی
.
.
نجه زهرا که اونا فاطر افلاک و زمین
اوز آدیندان قویوب آد خالق بی چون و قرین
فاطمه اولدی مسمّا اودی بو ماه جبین
زینبین قویدی باشا تاج زرافشان آناسی
.
.
نجه زهرا که قویان لحظه قدم دنیایه
شرقیله غربه ویروب نور رخی پیرایه
بو همان نوریدی حیرت گتوروب موسایه
اولا قربان اونا مین موسی عمران آناسی
.
.
نجه زهرا که اولوب زینت آدی قرآنه
عرضیمون صدقینه باخ سورۀ الرّحمانه
یخرج منهما الّؤلؤ وَالمرجانه
بوله سن باخسان اودی لؤلؤ مرجان آناسی
.
.
نجه زهرا که سالوب باشینه قرآن سایه
چونکه قرآندا اولوب شأنینه نازل آیه
شأنه باخ اوغلونا جبریل امیندور دایه
بسدی بو فخر اولوب منبع احسان آناسی
.
.
نجه زهرا که مکرّر بویوروب عقل کلّ
اولا قربان بو قزا کاش آتاسی ختم رسُل
گله بوعالمه مثلی داخی گلمز مشگل
چون خدیجه اولا زهرا کیمی ذیشان آناسی
.
.
نجه زهرا که اودی معنی آیات حجاب
اونون حقّینده رسول ثقلین ختم ماب
بویوروب فاطمة بضعتی منّی او جناب
چون بولوردی اودی سالار شهیدان آناسی
.
.
نجه زهرا که ایدر غبطه مقامین حوری
نوردور فاطمه نور رخی الله نوری
فاطمه نوری منوّر ایلمیشدی طوری
بسلیوب گور نجه بیر نیّر تابان آناسی
.
.
نجه زهرا که اونی حضرت خلّاق ودود
خلق ایدوب باشدان ایاقه کرم و بخشش و جود
فیض فیضندن آلار اهل یقین گبر و یهود
قویوب حیرتده سلیمانی سلیمان آناسی
.
.
نجه زهرا که او اسرار حقه محرمیدی
قلبی مهر حقیله داشقین اولان بیر یمیدی
آنا بطنینده آنایه او خانم همدمیدی
اولا اولمازدی رضا غصّه لی بیر آن آناسی
.
.
نجه زهرا که قالوب شأنینه حیرتده عقول
سورۂ کوثری حق ایلدی حقّینده نزول
ذایل اولدی غم پیغمبر اولوب خوار جهول
اولاجاق بو آتادان بولدوله عرفان آناسی
.
.
نجه زهرا که اونون مریمیدی خادمه سی
دم ویرر مرده دله همچو مسیحا نفسی
شیعه نون حشرده زهرادی اولان دادرسی
ملجأ اهل ولا کاشف الاحزان آناسی
.
.
نجه زهرا که او بند دل پیغمبریدی
کفو او خاتونه بو عالمده فقط حیدریدی
حیف اولا مونس ئولونجه اونا اشک تریدی
زینب آغلاردی گورنده ایدیر افغان آناسی
.
.
گلمییدی نجه داده او دُر کنز شرف
اولدی تیر غم و اندوهه دل نازی هدف
بیر یوزی گولمدی دنیاده اونون یا للاسف
اولدی معناده دل آزرده و گریان آناسی
.
.
کیم گوروب ایمدیهتک یاسلی عزالی اولانا
وورالا سیلی یوزی گل کیمی غمدن سولانا
قائم اوغلی یری وار چوللری آغلار دولانا
چون جوانمرگ اولوب اول حجّت یزدان آناسی
.
.
نجه قان آغلاماسون حجّت حق شاہ امم
آناسین سالدی ایاقدان ستم قوم ظلم
اولدی اون سگّیز ایل عرضینده رسا قامتی خم
ویردی جان سینه یارالی شه دوران آناسی
.
.
نجه زهرا دیه سن گلشن آرا بیر گلدی
نخل توحیده او شیرین دل اولان بلبلدی
اونا چکمیشدی رقیّه اودا شیرین دیلدی
ئولدی نسگللی ایله حوری غلمان اناسی
.
.
اودا نسگللی ئولوب آند اولا سوز دلینه
قالدی حسرت اودا بیر خوش گونه خویش و ائلینه
آتاسندان سورا دگموبدی غذا بیر دیلینه
ویردی چوخ نسگلیله هم بالا هم جان آناسی
.
.
ئولدى اللرده «شعاع» تا بو ایکی کنز حیا
یاندی هر تک تکینون حالینه سکّان سما
دوشدی چون بیر ایله درده بو آنائیله بالا
درده نه تاپدی بالا چاره نه درمان آناسی
.
.
.
#فاطمیه #شعاع_تبریزی #فاطمیه_میلادیه #ترکی #زبدةالاشعار

متن پیشنهادی:  شب عاشور بلا تاپدى صفا خانه ی عشق #شب_عاشورا_سیفی_اردبیلی

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی