ورود ماه محرم
گریز به شهادت حضرت علی اصغر (ع)
..
..
..
حاج ناصح اردبیلی
..
..
..
لطف ائدوب طبعیمه قدرت گینه خلاق انام
ائدورم منده اونون آدینه آغاز کلام
یازورام بیرده حسین سرور احراره سلام
نه حسین ،حقه فدا ذات حقه سویگلیدی
خلقتین گلشنینون عطریلی زیبا گلیدی
..
..
..
او حسیندی حقه یتمیش ایکی قربان وئردی
ایچمدی سورۀ جاناندا سوسوز جان وئردی
قوریا قویمادی دینون آغاجی قان وئردی
نقدر دور زمان وار او شجر بر وئره جک
قان حسینون قانیدی بهره مکرّر وئره جک
..
..
..
ای عزیزلر گئده قویمون هدره فرصتوزی
برق تک عمر کئچور آرتیق ائدون همتوزی
ارزشوز چوخدی سینا قویمیاسوز قیمتوزی
عَرَض اولسا بو جهان سیزلر اونون جوهری سوز
صدفه عالمی تشبیه ائلسم، گوهری سوز
..
..
..
آند اولا قلبینی اوخ یاره لین سلطانه
اونون عشقی ائلیوب بیزلری چون دیوانه
یانوروق دلده نجه شمعه یانار پروانه
دولانوم خیردا بویوک تک تکیزون باشلاروزا
خانمون شیشه سی آماده دی گوز یاشلاروزا
..
..
..
رشته ی عشرتی هر ماه محرم قیرّوق
مسجد و معبره کلاً قره پرچم ویرّوق
یاوه گولر دهنین منطقیلن سیندیرّوق
آهیله جمع اولاروق جامیله طشتون باشینا
آغلاروق زینبین اللرده ئولن قارداشینا
..
..
..
مدّعی نقشه چکور تازه لیه دل یاراسین
فکری وار قطع ائلیه عاشق و معشوق آراسین
بیز ولی گئیملیوک یوسف زهرا قاراسین
مصریده یوسفه صف چکدی اگر مشتریسی
گوره دشمن وار حسینون نقدر مشتریسی
..
..
..
بلی یوسف سالینوب چاهه گهی زندانه
عاقبت غُل سیاقیندا چکیلوب میدانه
بیر گونی مصریده ده سس یائیلوب هریانه
قرعه ی فال گلون جمعیده واضح آتیلور
بیلمینلرده بیله شهریده یوسف ساتیلور
..
..
..
مصرین اشرافی آلا یوسفی حیرتده گلوب
سینه ده اللری آماده دی خدمتده گلوب
گوردولر الده کلافی قوجا عورتده گلوب
دئدیلر گورمیوسن جمعیدی انبوه طلا
یوسفی آلماقا گلدون نیه سن گور عجبا
..
..
..
دَیَری وار نخیمون سویلدی جزئی ثمنه
بیلورم بو کلفه یوسفى وئرمزله منه
گلمیشم مشتری یم منده او گل پیرهنه
دئمیون سیندیرورام یوسف مصرین آدین
بیر نفر آرتیرورام مشترینون تعدادین
..
..
..
یری وار فاطمیه عرض ائدک ای اهل عزا
آغلاروق غملروزه ایللر اولا صبح و مسار
بیزی سن مشتری یاز یوسفووه یا زهرا
بیله بیلمز هامی درّ و گهرین قیمتینی
سن بیلرسن بو آخان اشک ترین قیمتینی
..
..
..
چوخلاری یوسفیچون مال فراوان گتیروب
باخ سنون یوسفووه الده هامی جان گتیروب
وار اوزاقدان گلنی دیده ی گریان گتیروب
مصره گئتمیشدی اولار یوسف کنعان آپارا
ولی گلمیش بولار اوز دردینه درمان آپارا
..
..
..
اولاری که یغیشوب بو یره دوتمیش ماتم
جوشلانور گوزلرینون یاشلاری همچون زمزم
دیوب ائوده گئدورم دردیمی اربابه دییم
دردیمی محضر مولایه دئسم دینجلّم
قلبیمون مطلبینی آغلارام آلّام گلّم
..
..
..
آقاجان سن بیلوسن روحه صفا ایستیه نی
دردینه جمعیدی بو یرده دوا ایستیه نی
هر نه دن چوخدی بو گون کرب و بلا ایستیه نی
یاندیرور مرقد شش گوشه غمی قلبیمیزی
ئولمه میش محضره اللهه گوره ایسته بیزی
..
..
..
یا بن زهرا بیلوسن هجرده دللر یارادی
بیزیده ایسته گورورسن یارین عشقی یارادی
تلّیلن مرکز میدان گوره ک هاردان هارادی
بیلیوک کوفه لیلر رسم جفا یوخلادیلار
گوره ک هاردا علی اصغر بالووى اوخلادیلار
..
..
..
تاپا بیلسوک او یری جمعیله محزون دورّوق
آهیله اوردا آقا شمع عزا یاندیرّوق
یاندیران نوحه لریله اورگه اود ویرّوق
یوزه گوزیاشیمیزی چشمه کیمی باغلاداروق
داشلاریندا او یرون نوحه میزه آغلاداروق
..
..
..
دییروک بوردا گرک روضه ی اصغر اوخونا
حرمله الده کمان گلدی بو یرده یوخونا
توش ائدوب حلق علی اصغری اوچ پر اوخونا
باتدى قانه او بالا نه دانیشوب نه دیندی
خیمه ده اوخ سسین آلدی آناسی دیسکیندی
..
..
..
تا حسین اصغرینی گوردی گئدوبدور هوشه
باخدی اوخ یاره سینه گلدی محبت جوشه
محضر یاریده باسدی بالاسین آغوشه
دئدی یارب بودا درگاهیوه خونین گلدی
اوچ گونیدی یاتا بیلموردی عجب دینجلدی
..
..
..
اوزی آسوده منی ایلدی پیچیده غمه
قالمیوب هم نفسیم حالی اولا کیف و کمه
نه اوزیلن قئیدیم اوخلى بالیلان خِیَمه
اگر عباس گوریدی بو یارالی بالامی
قویمازیدی قالا ال اوسته وفالی بالامی
..
..
..
آز قالور محضروه منده خدایا گلورم
بیر به بیر عهدیمه ایفا ائدورم دینجلورم
باخورام اصغره عباسیمه گوزیاش الورم
گر گوریدی او وفا کانی لالا قاندا منى
دوزمزیدی گوره بو حالیده میداندا منی
..
..
..
ای خدا نوشیدی عشقونده بو اندوه و بو غم
هر بلا گوندره سن بوردا خریداری منم
من حسینم ئولرم دشمنه عجز ایلمرم
نخل اسلامی طراوتده بو گون قان ساخلار
بو حسینون قانیدور دینیله قرآن ساخلار
شاهد اول اللریمون اوسته منیم بارخدا
ووردی اوخ اصغریمه حرملۀ شوم و دغا
امر ائله عکسیمیزی سالماقا عکاس قضا
تاجر عشقم اولوب قان منیچون سرمایه
وئرمرم بیر بئله عکسی بیلوسن دنیایه
..
..
..
یانورام عشقین اوتوندا کُوزه رن مجمر تک
اصغریمده قانینا باتدی بو گون اکبر تک
سالارام قانیله سجاده آتام حیدر تک
خوشدی آی مثلی گئدوب عشق سحابینده باتام
قطره ام جهد ائدورم موجیلی دریایه چاتام
..
..
..
عشقووین باده سی از بس گتیروب باشیمه شور
مست مستم منه یکسانیدی اندوه و سرور
فرقی یوخ بستر راحت منه یا کنج تنور
عاشق ایستر ره جانانیده گل مثلی اولا
تحفه ی یاریدی اوچ پر اوخ اولا یا کول اولا
..
..
..
سنون عشقونده باتوب پیر و جوانیم قانینا
تک تکی قربان اولوب مکتبینه قرآنینا
آنداولا اصغریمون قوش کیمی چیخمیش جانینا
راضیم قتله یتم غارت اولا مال و حشم
عجله م واردی منیم قافله مه تئز یتیشم
..
..
..
باغبان مثلی گولوم زینت دامانیمدی
ارزیابی ائلین سن کیمی جانانیمدی
بو شهیدلردن آخان قاندا منیم قانیمدی
گلدی من کلمه سی یارب بورودی قلبیمی غم
من دئدیم اینجیمه چون منده سنون ئولموشووم
..
..
..
«ناصحا» فکرووه بو نوحه لری کیم سالدی
یوخووی بیل ائله اول کیمسه گوزوندن آلدی
دور قوتاردی شب احیا سحره از قالدى
زحمتون سایه سینه کامه چاتارسان نینک
غم یمه قبریده آسوده یاتارسان نینک
..
..
..
#ورود_محرم #ناصح_اردبیلی #اصغریه_ناصح_اردبیلی #اصغریه #اصغریه_شهادت #ترکی #زبدةالاشعار
نظر دهید