لطف ایلسه گربنده سینه حضرت باری #وداع_عدلی_تبریزی

وداع و قتلگاه
با مقدمه
.
.
حاج اصغر فرشچی (عدلی تبریزی)
.
لطف ایلسه گربنده سینه حضرت باری
ایلر اوزونه عابد و هر عیبدن عاری
.
فضل و کرموندن سالی بیر سایۀ رحمت
پاک ایلر اورکده اولونان گرد و غباری
.
بیرده سالی اولاد علی عشقنی قلبه
تا رهبر اولا عشق لری جنته ساری
.
خوش حالینه اول کیمسه که عاشقدی حسینه
محفلده چاتور باشه اونون لیل و نهاری
.
ای مست می عشق حسین لطف خدادن
میل ایلموسن می که گزورجسمی داماری
.
عشقین اورگه نعمت عظمادی سالوب حق
واجبدی گیت اول نعمتنون شکر گزاری
.
هر کیمسه حسین عاشقی اولسون اولابولمز
می ایستورایچه میسیزاونون یوخدی چخاری
.
عطشاندی حسین عشقینه هر عاشق صادق
سوندورمز عطشدن اونی بو دنیا سولاری
.
مست اولسا اگر ایچمسه دائم می عشقین
سرخوش اولابولمزتاپاجاق حال خماری
.
ای مدعی لر دل یاراسی ویر ما حسینون
عاشق لری اولسه اونا یوخ قبر فشاری
.
محشرگونی یوخ واهمه سی چون وارحسینی
قورتارسا اونی نار جهیمدن او قوتاری
.
پر یاندوری پروانه کیمی شمعینه عاشق
ایللر بویی محفلده ایدر گوزیاشی جاری
.
بیر نفس سلیمیله گلر بزم عزایه
آغلار غمینه گوزلر اولار ابر بهاری
.
#گریز به #وداع
.
یاد ایلرحسین آیرولوری اهل حرمدن
سالموش اونی بیر دایریه اوز بالالاری
.
هرتک تکی گوزیاشی توکوردامنه سویلور
گتمه بابا جان ایستمرم سو سنی تاری
.
گتمه دیه بولمور باجیسی ایلور اشاره
یعنی دوتالا دامنینی کان و قاری
.
امّا شه دین باخمادی محشردی او یرده
ایلوبدی وداع خیمه ده کی خردو کباری
.
ایستردی گیده سسلدی قارداش سنه قربان
قوی بیر بوغازون بوسه ایده زینبی باری
.
بیرده الوی سینمه قوی تا اولوم آرام
گیتسن داخی قالماز باجوون صبر و قراری
.
تاپشور منی آللهَه حسین گیت دوزرم من
ای زینبنون عرصه ده تک دار و نداری
.
#گریز به #قتلگاه
.
بیرده سالی یاده گیدوری کوفه و شامه
یول سالدیلاراول قتلگهه دوشدی گذاری
.
ابرغمه دولدی گوزی توکدی یوزه قانیاش
باشسیز تا گوروب یرده دوشوب میر فخاری
.
باشدان باشا جسمینده یاراصاف یری یوخدی
اوچ پراوخ اولوب سینه سینه ضربۀ کاری
.
قویمازدی عدو آغلیه یاباغلیه یاره
طوفان غم وغصه نین اولموشدی دچاری
.
گلدی دله یاتما یارالار یورقونی قارداش
دور زینبیوی سال یولا یولاندی قطاری
.
قالدی بدنون گون قاباغیندا منی عفو ایت
دفن ایلمدیم ترک ایدورم غملی دیاری
.
شامه گیدورم کرب و بلا ملکی سنونکی
بو یر آدی عالمده اولار شیعه شعاری
.
بیرگونده حسین واریوخووی خالقه ویردون
یوزدن یوخاری یتدی مجاهد سنه یاری
.
ویر دوزال اله قویمیه سوز تا یخا دشمن
قرآن ایوینی هم یخیلا دینون حصاری
.
منده علمون قوزارام عالمده حسینیم
هرقومون اولانهضت آدی دلده شعاری
.
محشرگونی غم چکمیجاق « عدلیِ »عاشق
گرچه گناهی چوخدی اونون یوخدی شماری
.
.
.
.
#وداع #عدلی_تبریزی
#قتلگاه
#لطف_ایلسه_گر_بنده_سینه_حضرت_باری
#ترکی
#زبدةالاشعار