مجسم ایله گوزوم ذکر اولان روایته باخ #دفن_شهدا_غمگین

دفن شهدای کربلا
..
..
..
محمدباقر محمدزاده قومیان(غمگین)
..
..
..
مجسّم ایله گوزوم ذکر اولان روایته باخ
حسین تشنه لبی یاده سال مصیبته باخ
..
قالوبدی اوچ گجه گوندوز جنازه لر یرده
او اهل شامده انصافه باخ مروته باخ
..
او گونده لشکرینه سعدین اوغلی امر ایتدی
بیزیم ئولنلرى دفن ایلیون عداوته باخ
..
ولى قالانلاریلان اولماسون ایشوز اما
اولارا ویرمیون ال بغضه باخ کدورته باخ
..
حسینین اولمادی بیر کس اوچونده دفن ایدنی
قوناق چاغرماقا بیر باخ قوناقه حرمته باخ
..
یتیشدی حضرت سجاده امر ربّ جلیل
آتان حسینی گیدوب دفن ایله بیر حکمته باخ
..
گلوبدی طرفة العین ایچره کربلایه امام
سوار مرکب اولوب گلماقندا سرعته باخ
..
گورنده اهل قبیله گلور بیر آتلی هامی
دوشوبله حیرت و تشویشه اضطرابته باخ
..
یتوب سوروشدی امام اول قبیله اهلیندن
سبب ندور بورا جمع اولموسوز کرامته باخ
..
جواب ویردیله بیز گلمشوق تماشایه
بو جسملرده ای آتلی بویور جراحته باخ
..
بویوردی گلمه موسوز سیز بورا تماشایه
گلون کمک لق ایدون دفن ایداق او حالته باخ
..
جواب ویردیله فکر ایلروق که دفن ایلیاق
ولی تانونموری بو جسملر حکایته باخ
..
کتاب صفحه سی تک پاره پاره یرده قالوب
ورق ورق یازیلوب جلدسیز کتابته باخ
..
بویوردی حضرت سجاد اوزوم گوزل تانورام
تصور ایله او بیمار امامه قدرته باخ
..
تاپوب آتاسنی قان ایچره بیر چوخور یردن
سلام عرض ایلدی کثرت محبّته باخ
..
هزار حیف کفن تاپمادی او مظلومه
بوکوب او کهنه حصیره آنانی خفّته باخ
..
قویوب جنازه نی قبره یازوب او قبر أوسته
بودور حسین لب عطشان کلام حجّته باخ
..
بولوردی اصغر عطشانه چوخ محبتی وار
ویروب قوجاقنه خوردا بالانی همّته باخ
..
دیولّه گرچه حسین سینه سینده یر ویردی
نظرده ایله مجسبم اوزون او حالته باخ
..
یقین گینه دیوری لای لای اصغریم لای لای
قویان آناسنی آغلار کمال الفته باخ
..
بولوردی لیلی مضطر ملول اولار دلدن
قویوب ایاق طرفینده علینی حرمته باخ
..
قازوبلار امر امامیله بیر بویوک گودال
که دفن ایدوب هامی اصحابی بیر سعادته باخ
..
گوروب حبیبی شهنشاهه لایق دربار
اگر نصیب اولا قبری گیدوب جلالته باخ
..
توکوب سرشکنی گوزدن باخوب فراته طرف
بویوردی یرده قالان وار طریق صحبته باخ
..
گلوبله اهل قبیله او دم امامیله
گورنده سویلدیلر بوندا سرو قامته باخ
..
نه وار باشی بدنینده نه قوللاری سالم
او حاله بیر نظر ایله غم و مصیبته باخ
..
توکوب عذاره گوزوندن امام گوز یاشنی
بویوردی رحمت ایده حق عمومدا همّته باخ
..
داخی عموم کیمی گلمز جهانه اشجع ناس
ویروب سوسوز سو کنارینده جان شهامته باخ
..
قازوبلا بیر بالا قبر اول وفالی سرداره
گوتوردی دفن ایلدی قبره باخ شجاعته باخ
..
دوباره کوفیه گلدی اورکده درد و ملال
نه حالدیدی خدایا امام او ساعته باخ
..
اگر نصیب اولا غمگین او قبر ششگوشه
بو جمعیله گیدوب اوردا جلال و عزّته باخ
..
#دفن_شهدا #غمگین #ترکی #زبدةالاشعار