جریان دادگاه منقذ در حضور مختار (1)
گریز به احوالات حضرت علی اکبر علیه السلام
(خبر از اشرف المحدثین مرحوم حاج ملا عبادالله راثی)
✍️ زبدة الاشعار ✍️
?: @nohe_torki
مرحوم انور اردبیلی
مختاریدن حمایت ایدوب رب ماسوا
خونخواه اولوب حسینه او سردار باوفا
قاتل لری دوتوب ایلدی عمرینی فنا
کوتاه اولوبدی کوفه ده قوم ظلام الی
پیروزیدور همیشه بلی انتقام الی
ائتدی جلوس او تختیده که زادۀ زیاد
چکدی فساده عالمی اخذ ایلسون مراد
سوید حسینی زینبی ده ائتدی شرگشاد
چوخ آز زماندا دبدبه سی اولدی تار ومار
اگلشدیروب او تختیده مختاری روزگار
راوی دیور که من واریدیم بارگاهیده
مختاری ایلدیم گوزی یاشلی مشاهده
درد ضمیرینی یتورور هر نگاهیده
قلبینده واردی غصه یوزوندن عیانیدور
گاهی دورور گهی اتورور ناگرانیدور
عرض ایلدیم نه وار منه کشف ایلدی امیر
دستور ویرمیشم ایده لر منقذی اسیر
من انتقامه منتظرم اولسا دستگیر
ظلمیله سوندوروبدی حسینون چراغینی
باغلی قویوب مدینه ده اکبر اطاقینی
کچدی بو غملی صحبتون اوستن بیر آز زمان
مأمورلر او ظالمی گتدی کشان کشان
مختار اونا دئدی ایله ئوز ظلمیوی بیان
قلبونده واریمیش نقدر حب و بغض و کین
یخدون نیه آقام ابی عبداللهون ائوین
وئردی جواب ئولدوره جک سن یقین منی
ئوز گوردوگوم ایشه ئوزوم آگاه ائدیم سنی
اکبر او چولده وحشته سالموشدی دشمنی
لشگر قاچوردی کوفیه سولموشدی رنگلر
صفلر بوکولموشیدی پوزولموشدی هنگلر
جرأتلنوب او چولده کمین ائتدوم اختیار
نزدیکیمه یتیشدی او فرزند نامدار
من دال طرفده حملیه اولدوم امیدوار
شمشیریم اندی دوندی رسا قامتی خمه
تشبیه اولوب او حیدره من ابن ملجمه
دلدن سالوبدی یاره او شبه پیمبری
رنگی یاشیل عمامه سی تئز اولدی احمری
قان آخدی من ووران یارادان دولدی گوزلری
زین عقابه قویدی باشین تکیه ایلیه
گوردوم لجام مرکبی دوندردی خیمیه
بیلمم نقدر ائتدی قلنجیم اونا اثر
باشین اوجالدا بیلمدی بیلدیم همین قدر
اطرافین آلدی کوفه لیلر الده حربه لر
اعضاسین اِربه اِربه ائدوب فرقۀ ظلام
آتدان دوشوب دئدی بابا مندن سنه سلام
گلدی غریب آتاسی اونا نصرت ایلیه
آتدان دوشوبدی دیلده اوغول وای دیه دیه
میدانیده اوغول باشینی آلدی سینیه
در حال احتضاریدی اکبر او مرحله
آز فاصلیله عمه سیده گلدی مقتله
منقذ ایلیکه شرح ایلدی ئوز جنایتین
حضار مجلسین او دنی پوزدی حالتین
مختارون آلدی دلده اولان صبر و طاقتین
شدتله اشکینی یوزه توکدی او نیکنام
دستور وئردی آلدیلا منقذدن انتقام
قاتل یتوب جزاسینه مختار ائدوب ثنا
راوی دیور بو مطلب جانسوزی برملا
گوردوم او بزمیدن اوتوروب دورت نفر آقا
گوز یاشلاری آخور یوزه تیترور بدنلری
هر دوردی یاسلیدور قره دور پیرهنلری
کیم سوز دئدوم آخور بو قدر اشک حسرتوز
یوزدن حجازون اهلینه واردور شباهتوز
واردور حسینیله سیزون آیا نه نسبتوز
گورموشدوز اکبری بو قدر سینه داغلوسوز
مجلسده هامی ساکت اولوبدی سیز آغلوسوز
نطقه گلوبله ائتدیلر اظهار بو سوزی
هر بیر کسون عزیزی ئوله آغلیار گوزی
ای کاش اولیدی بوردا علی اکبرین ئوزی
دقت ائدوب گوریدون اونون خط خالینی
شهلا گوزون پیمبره بنذر جمالینی
بیز گورموشوک اودور اوجالوب سوز آهیمیز
ماتملیوک سرشک عزادور گواهیمیز
خاک مدینۀ نبوی زادگاهیمیز
دلدن دوشر او کسکه اولا دلبر آیریسی
بیز اکبرین دائیلاریوق اکبر آیریسی
گوزدن گرک جمالیمیزه آخسون اشک ناب
زندان اولوب مدینه بیزه یوخدی صبر و تاب
اکبر اناسی قلبیمزی ایلیور کباب
سوز یوخ حضوره عرض تسلایه گئتمیشوک
بیر سوز دیوب بیزه باجیمیز نسگل ائتمیشوک
کرب وبلا چولونده کوچن وقته کاروان
لیلا تاپوبدی اوغلونی مقتلده باغریقان
باشین آلوب دیز اوسته ائده دردینی عیان
منقذ گلوب ائدوبدی او حالی مشاهده
رحم ائتمیوبدی ظالم اونا قتلگاهده
خنجر چکوبدی ذبح ایلیوب اکبرین باشین
حسرت باخوب آناسی ائدوب جاری گوز یاشین
مشگلده قالسا باجی سالار یاده قارداشین
چوخ آختاروب بیزی او بیاباندا گوزلری
اکبر جنازه سینه دیوبدی بو سوزلری
قویمادی قاتلون دیزیم اوسته باشون قالا
سندن محمدی گولون عطرین آنون آلا
منقذ منه دانشماقیدا چوخ گورر بالا
خوار اولموشام اگر چه گرامیدی اوّلیم
نیلوم اوغول دائیلاریوا چاتمیور الیم
ــــــــــــــــــــــ
۱۴ رمضان سال۶۷ هجری قمری، مختار بن ابی‌عبيده از شيعيان بزرگ و از قيام‌كنندگان پس از شهادت امام‌حسين (ع) به شهادت رسيد.
بحار الأنوار : ج 45، ص 386
#مختار_ثقفی
#اکبریه_شهادت
#مختاریدن_حمایت_ایدوب_رب_ماسوا
#انور_اردبیلی
#قیام_زینب_انور
#ترکی
✍️ #زبدةالاشعار ✍️
?: @nohe_torki
نظر دهید