زبانحال زائر کربلا
.
✍️ #زبدةالاشعار ✍️
.
🆔: @nohe_torki
.
رئوف
.
مدّت عمرومده شاها بیر بو آنی آختاروردوم
ائتماتا بوسه بو توزلی آستانی آختاروردوم
.
.
بلبل شوریده تک ، من آختاروردوم گل وصالین
صبر ایدوب هجره دوزردیم عمریمون هر ماه سالین
آند اولا بو قبره دلدن آتمادیم قبرون خیالین
هر یره گیتدیم بو باغ باصفانی آختاروردوم
.
.
هانسی ہیر یرده مگر وار بیله باغ و بیله گلشن
ظاهراً دار بلا ، معناده امّا دار ایمن
قویسالار قالام ئولونجه ایلرم بو یرده مسکن
چوخ أوزون مدّتدی بو دارالأمانی آختاروردوم
.
.
حمد لله کیم منه یار اولدی توفیق و سعادت
بوسه ائتدیم آستانون قالمادی گوگلومده حسرت
عمر دنیادن منه آرتوخدی مطلق بیله ساعت
بیله بیر گون بیله ساعت هر زمانی آختاروردوم
.
.
معنویاته گوز ایستر باخماقا اولسون ضیاسی
ایله گلشندور بو گلشن هر گلین وار بیر صفاسی
هامی گللردن بلی خوشرنگدور اکبر یاراسی
دائماً پائین پاده بو جوانی آختاروردوم
.
.
من گوروب قبرین پوزولدوم سن آقا نه حاله قالدون
سن باشی اوسته گلنده هر باخان آرامین آلدون
قانینه آغشته گوردون أوز أوزون نعش اوسته سالدون
ای ذبیح حق دیدون من بو منانی آختاروردوم
.
.
آستانوندا واروندور بیر وفاپرور نگهبان
پیر اما روحی برنا عاشق محبوب رحمان
بیر ایله پیره فدا اولسون هامی پیر و جوانان
اول قوی ایمان حبیب باوفانی آختاروردوم
.
.
غنچه بیر گل وار بو گلشنده سوسوزلوقدان سولوب دی
باغبان سولموش گورنده بولمورم حالی نولوبدی
اُنّوگی زُلفی یوزی آلقانیله الوان اولوبدی
او خلاناندا گولدی یعنی من بو آنی آختاروردوم
.
.
قاسم نورسته گلشنده گل آچدی اَرغوانی
لیک خندان اولدی تئز حیرتده قویدی باغبانی
قانی آخدی ائتدی رنگین سرزمین کربلانی
ایله بیر آهو باخشلی نوجوانی آختاروردوم
.
.
سَرویدی عباس صحن بوستان مرتضاده
سالدیلار اما ایاقدان بو زمین پربلاده
روضه سینده روز تاسوعا گر اولسام کربلاده
سسلرم باب الحوائج بو مکانی آختاروردوم
.
.
گر یانیمدا صحبت اولسا گلشن و گلدن چمندن
صبر و طاقت سَلب اولار هر آن ده بالمرّه مندن
بی سبب من دوشمَدیم آیری قبیلمدن وطندن
بلبلی زینب گلی سن گلستانی آختاروردوم
.
.
قتلگهده ائتمرم من زینبون حالین فراموش
بولمورم صبر ائتدی گوردی نعشوی یا دوشدی بیهوش
اوندا تاپدى بیر چوخور یرده أولوب سنله هم آغوش
سویلدی تاپدیم او که من آشنانی آختاروردوم
.
.
گوردی گل خندان اولوب بلبل گلوب نی تک نوایه
آغلیوب شور آرتروب لحن حجازی کربلایه
سویلدی قرآن دی یا رب بو اولوبدور آیه آیه
یا حسینون نعشیدور من کربلانی آختاروردوم
.
.
کاسۀ چشمین باخوب قارداشه دولدوردی لبالب
سسلدی اولسون سنه قارداش فدا مظلومه زینب
آیری مطلبدن منه چوخ چوخ گرانتر دور بو مطلب
تاپمادیم بو عور جسمه سایبانی آختاروردوم
.
.
تاپمادیم بو محنت اندوهباره ئوزگه چاره
قلبیمه دگسون دیدیم دست یداللهی دوباره
بولمه دیم من دوشموشم قارداش بو مطلبدن کناره
ال آتوب غفلتله ظلم ساربانی آختاروردوم
.
.
اوندا که اقدام قیلدی قتلوه قوم ستمگر
ائتدیلر باشون بدندن یرده جسمون قالدی بی سر
بیر اوجا آوازیله سن سسلدون الله اکبر
صوت تکبیرون آلوب نوک جِدانی آختاروردوم
.
.
من «رئوفم» اسمیله بولمم مطابقدور مُسمّا
نوکرم شاها سنه امّا اورکده وار معنا
هانسی نوکرلر آقاسیندان کناره دوشدی آیا
من کیمی مدت لری بو استانی آختاروردوم
.
.
#آرزوی_کربلا #زائر_کربلا
#مد_ت_عمرومده_شاها_بیر_بو_آنی_آختاروردوم
#ترکی
.
✍️ #زبدةالاشعار ✍️
.
🆔: @nohe_torki
نظر دهید