جریان کفن و دفن حضرت رقیّه (س)
درخرابه شام
..
..
..
عینی فرد زنجانی
..
..
..
مظلومون آهی دهریده انسانی آغلادار
نه انس و جنّ عالم امکانی آغلادار
..
مظلومون آه و ناله سی قوزانسا فرشدن
بیر لحظه چکمز عرش معلّانی آغلادار
..
شبنم کیمی دوزولسه گل عارضده گوزیاشی
شبنم دوشر گل اوسته گلستانی آغلادار
..
مظلومون آهی قوزانا گر داغلی سینه دن
سینا چولونده سینۀ سینانی آغلادار
..
مظلوم و ظالم عالم امکانه چوخ گلیب
تاریخه باخساکیم بُله جریانی آغلادار
..
امّا رقیّه تک هانی مظلومه بیر بالا
بو اوچ یاشندانون غمی دنیانی آغلادار
..
ویرانسراده ایلدی دِق مرگ اونی یزید
سن باشلا من دیدوقجا تباکانی، آغلادار
..
آلدی باباسینون باشون آغوشه جان ویریب
جان اوسته گوردیلر سر بابانی آغلادار
..
ویردی نه نوعی جان دیمورم آیری سوز واریم
بیر داستان که صاحب وجدانی آغلادار
..
غسّاله گلدی ویردی اونون غسلین آغلادی
نقل ایلیوب اؤزی بله جریانی آغلادار
..
گوردوم یارالییب او قزی تازیانه لر
اولدی عیان منه غم پنهانی آغلادار
..
غسلین ویروب کفن ایلدیم قاره معجرین
آغ خلعت اولمادی اودی انسانی آغلادار
..
غساله گیتدی قالدی قوری یرده گل بدن
دفن ایتمدی او منظره نسوانی آغلادار
..
زینب گوروبدی قالسا اگر یرده صبحه تک
بو غُصّه اهل بیت پریشانی آغلادار
..
خردا جنازه سین گوتوروب یردن عمّه سی
دفن اولماسا گوروبدی اسیرانی آغلادار
..
قزلار دوشوب دالیجا دیوب وای رقیّه وای
ویرانه اهلینی اونون هجرانی آغلادار
..
زین العبا دوروب در ویرانه ده ملول
بوینوندا سلسله سسی زندانی آغلادار
..
دردین دیردی قلبیمی یاندیردی آی باجی
جان ویرماقین علینی آنام جانی آغلادار
..
کسدی او ساعت عمّه سینون ناگهان یولون
عمّه قیت دیدی غمون اصلانی آغلادار
..
حمل ایلمه جنازه نی قبر اوسته صبر ایله
بیر سوز ایشتمیشم که مسلمانی آغلادار
..
زینب بویوردی وار نه خبر ای گوزل بالا؟
آهون شراری مکّه و بطحانی آغلادار
..
قوی دفن ایداخ جنازه سینی بو گجه علی
تشییع صبحه قالسا یتیمانی آغلادار
..
قورخوم بودور رباب ئوله دفن اولماسا اگر
اصغردن آرتوخ ایندی او نالانی آغلادار
..
اوغلی ئولن آنالارا باخ ئولدورور اؤزون
آغلور سکینه گور نجه لیلانی آغلادار
..
واردور نه علّتی نیه دفن اولماسون بو قز
میّت قالاندا یرده مُعزّانی آغلادار
..
بیر آه چکدی آغلادی بیمار کربلا
بیر سوز دیدی که زینب کبرانی آغلادار
..
فرمایش ایتدی زخم زبان یاندیرور منی
تنها نه من شه عطشانی آغلادار
..
قبر اوسته شامون اهلی گلوب هایهو ایدور
بو قیل و قال حجّت رحمانی آغلادار
..
بیز قویماروخ دیولَّه بورا خارجی قزی
وای دل یاراسی قلب احبّانی آغلادار
..
ویرانه دن کناره آپارما رقیه نی
توهین ایتسلر سنه زهرانی آغلادار
..
یوخ چاره قبر قاز بونا ویرانه ده اؤزون
بو ایش چتیندی چون دل ویرانی آغلادار
..
قربان اولوم سنه باجیمی بوردا دفن ایله
بو منظره سماده کی سُکّانی آغلادار
..
ویرانیه قییتدی خانم توکدی گوز یاشین
اَینَ حَماتی صوتی نیاکانی آغلادار
..
گاهی هرایه قولسوز علمداری سسلنور
اول خردا قبر صاحبی سقّانی آغلادار
..
آز قالدی کاخدان گله بیرده خرابیه
مظلوم حسین باشی سالا طوفانی، آغلادار
..
بیر خردا قبر قازدى او مظلوم ئولن قيزا
اما نَئیله قازدی قالا پنهانی آغلادار
..
قویدی مزاره اؤپدی گویرمیش یوزین دئدی
یانسون او که گویرتدی بو سیمانی آغلادار
..
ای گول کیمی صولان بالا ای مهربان بالا
گوز یاشیم آخسا گلشن و بستانی آغلادار
..
بلبل کیمی قفسده اولوب چرپنانمادون
جان وئرماقون طیور خوش الحانی آغلادار
..
ایستی سویوق فشاره سنی سالدی شامده
بو سقف سیز خرابه سلیمانی آغلادار
..
چوخ غصّه لر یغیشدی کچیک قلبیوه سنون
گیت آگه ایت بابام شه مردانی آغلادار
..
نقل ایلدی بو قصه نی بیر عالم جليل
قزوینده دور او سید روحانی آغلادار
..
..
#حضرت_رقیه #عینی_فرد #حضرت_رقیه_شهادت #ترکی #زبدةالاشعار
نظر دهید