معنای شرافت اوزی هر عزّته دارا #حیدریه_تائب_تبریزی

ترکیب بند در مدح حضرت علی (ع)
.
.
مرحوم تائب تبریزی
.
معنای شرافت اوزی هر عزّته دارا
تالیِ بلافصل رسولِ حق یکتا
.
دنیایه گلن عزّتیله بیت خداده
آفاقه سالان نور جمالیله تجلا
.
مسجدده تابان سجده ده باش فیض شهادت
بو صیت شهادتله سالان عالمه غوغا
.
هر ممکنه خلقتده اولان علت غائی
گردونۀ طلعتده اولان طلعت زیبا
.
هم سنگر و هم مسلک و همدرد پیمبر
پیغمبر اسلامه اولان یاور و یارا
.
دیوان عبودیته زیبا آدی زینت
اللهه گوزل بنده هامی عالمه مولا
.
دنیا لره مولای برازنده علیدور
پیغمبر اسلامه نماینده علیدور
.
اودور حجت یزدان
اودور ناطق قرآن
اودور جانلارا جانان
بوجانلار اونا قربان
.
.
.
.
باشدان ایاقا مهر و وفا صدق و صداقت
انگیزه انسانی و دریای فتوت
.
احیای بشر اوسته فداکار مؤید
کانون حیا معدن انصاف و مروت
.
مظلومه طرفدار – ستمکاره مخالف
سلطان عدالت گر و قربان عدالت
.
مشیر خدا نفس نبی عزت اسلام
سرسلسله با شرف آل رسالت
.
نفسین ایلین احمد محموده وقایه
پیغمبر حقی قوتاران لیک سلامت
.
فرّارلرین ضدّی اوزی حیدر کرار
پروا سیز اولان ضیغم ذات احدیت
.
بحر ادبه گوهر رخشنده علیدور
چرخ شرفه مهر درخشنده علیدور
.
اودور حجت یزدان
اودور ناطق قرآن
اودور جانلارا جانان
بوجانلار اونا قربان
.
.
.
.

اعقلدی ذوی العقل آرا عقله سوزی برهان
اعدلدی عدالتده – او عدله اوزی میزان
.
اعلمدى هامی علمده کل علمادن
افضلدی فضیلتده اوزی ناطق قرآن
.
اوز نفسی سایوبدور اونی پیغمبر اکرم
ایلوب بوسوزی ختم رسل خمّ ده اعلان
.
حق بین دی بینا گوزی عین الله ناظر
وجه الله باقی یوزی آئینۀ ایمان
.
فریاد رس جمله مساکین و ارامل
بی چاره لرین چاره سی امید یتیمان
.
اصنامی نگونسار یخان خاکه صمدگو
تکبیر صداسین اوجادان بندۀ یزدان
.
باغ احدیّتده سراینده علیدور
بو عالم خلقتده گوزل بنده علیدور
.
اودور حجت یزدان
اودور ناطق قرآن
اودور جانلارا جانان
بوجانلار اونا قربان
.
.
.
.
مدرکدی قوی عید غدیرین جریانی
ال استه پیمبر گوتوروب شیر خدانی
.
فرمایش ایدوب امر خدای ازلیدور
اعلان ایلیم سیزلره بو سر نهانی
.
هر کس منی اوز نفسنیه اولابوله مطلق
لازمدی که من تک بوله مولا بوجوانی
.
من هر کیمه مولایم علیدور اونا مولا
دعوت ایلیوب بیعتینه پیر و جوانی
.
عرض ایتدی خدا، دوست دوتا هر کس علینی
دوت دوست اوزون سن ایله بیراهل ولانی
.
هر کیمسه علی دشمنیدور دوت اونی دشمن
بی پرده یتوردی هامویه اصل بیانی
.
نایب منه عالمده برازنده علیدور
بو عالم اسلامده سازنده علیدور
.
اودور حجت یزدان
اودور ناطق قرآن
اودور جانلارا جانان
بوجانلار اونا قربان
.
.
.
.
بیر خیمه قورولدی او بیاباندا او ساعت
مولایه گلوب پیر و جوان ائتدیله بیعت
.
یتدی لقب خاص اونا مؤمن لر امیری
ویردی بو لقب اوسته اونا خلق بشارت
.
هم آلدی یرین صحبت تنصیص ولایت
هم یتدی خلافت اونا هم یتدی امامت
.
عرشه اوجالوب شوریله تکبیر صداسی
مردم آراسندا واریدی آیری بشاشت
.
دگمو شدی هامی بیر بیره ایلردیله شادی
بعضی هامودان چوخ ایدوب اظهار ارادت
.
سویلردی على حالوه طوبا اولا به به
تبریک و گوارا بو امامت بو خلافت
.
ختم رسله تالی شاینده علیدور
اسلام ده شخصیت ارزنده علیدور
.
اودور حجت یزدان
اودور ناطق قرآن
اودور جانلارا جانان
بوجانلار اونا قربان
.
.
.
.
افسوس ایله بیر حقّی او بی عاطفه داندی
داندی – اوزی ناحق سوزی اوستونده دایاندی
.
ناحق دانیشان حقینی غصب ایتدى علینین
نه قوخدی خدادن به حیا ایتدی اوتاندی
.
مظلوم على یرمی بش ایل قالدی ایوینده
نه بیر گلن اولدی نه گیدن دوزدی دایاندی
.
هر مردین ایشی اسگیله مردم قاچار اوندان
دوزدور بو سوزوم مسئله مرسوم جهاندی
.
یاندی قاپوسی که در و دیوار آراسندا
ئولدی بالاسی هم حرمی قانه بویاندی
.
بیر غیرت رحمان باخا دوگسونله عیالین
بو امره دوزوب صبر ایلماق خیلی گراندی
.
باخدی دولی گوزلی بیله بیر صحنیه دوزدی
یا رب بو نجه صبر دی نه تاب و تواندی
.
اولموب بیری مظلوم على تک بو جهاندا
مظلوم لیقیندا اوزی مشهور جهاندی
.
قان باغلادی یانمیش اورگی پرده به پرده
لاله اورگینده اوتوران قان او نشاندی
.
دانا باخا نادان اولا حاکم نه روادی
دونسون بیله دورانی بونه دور زماندی
.
گر ایلمه سیدیله على حقینی انکار
دانمازدی حسین حقینی اشرار عیاندی
.
#گریز #اصغریه_شهادت
.
زهرا بالاسین چکدیله صحرای بلایه
بو واقعه سر سلسله گفتار بیاندی
.
سو یوللارینی باغلادیلار حقی دانان لار
عطشان بالالار باخدی سویا سودیدی یاندی
.
اوز سود امرین گتدی ال استه دیدی لشگر
اوچ گوندی لب عطشان بو گل غنچه دهاندی
.
قویموبلا او مظلوم سوزون باشه یتورسون
عطشان بالاسین او خلادیلار قانه بویاندی
.
تا یتدی سوسوز حلقینی اؤپدی سولی پیکان
یاتمیشدی او ، دیسگیندی گوزون آچدی اویاندی
.
تائب ندی دردون دی علی اصغره آغلا
آچسون گرهون چون گره کاری آچاندی
.
قربان خدا زندۀ پاینده علیدور
هر مشگل اولا یاخشی گشاینده علیدور
.
اودور حجت یزدان
اودور ناطق قرآن
اودور جانلارا جانان
بوجانلار اونا قربان
.
.
.
.

#حیدریه_مدح #غدیریه
#معنای_شرافت_اوزی_هر_عزته_دارا
#تائب_تبریزی #حیدریه
#ترکی
.