مقاتلده مورخلر خبر وئرمیش قضایادن #مجلس_یزید_یحیوی_اردبیلی

وقایع مجلس یزید لعنة الله علیه
.
.
مرحوم یحیوی اردبیلی
.
.
مقاتلده مورخلر خبر وئرمیش قضایادن
یازوبلار نقل گوناگون او شام فتنه افزادن
هره بیر گوشه دن بیر خط آیرمیش آب دریادن
او دریا که ائدر جنبش بلاى آل طاهادن
همین بو قصّه نی من تاپمیشام بیر کنز انشادن
.
.
تاپوب پایان او گونکه ماجرای سید بطحا
عبیدالله یازوب بیر فتح نامه ایلدی امضا
وئروب بیر قاصد کوفه نژاده شامه گئتسون تا
اونا همراه اولوب بیر ناظر اوضاع عاشورا
یزیدی دیل به دیل آگاه قیلسون شرح دعوادن
.
.
یتیشدی فتح نامه آرتیروب هند اوغلینا بهجت
ائدوب مخبر قضایانی یزیده مو به مو صحبت
خصوصی مجلسه عمر وابن عاصی ایلدی دعوت
چکیلدی سرّی نقشه تا گلنده عترت عصمت
آلیشسون زینبون قلبی دیزی دوشسون توانادن
.
.
واریدی بیر نفر نقاش مصری ماهر و استاد
ائدردی بیر دوگی اوسته بیر آدم عکسینی ایجاد
همان نقاشه امر ائتدی یزید خانمان برباد
وقوع کربلانون عکسین أئتسون رنگیله بنیاد
ایله عکسی که قان أولسون اورکلر بیر تماشادن
.
.
ورود بارگاهه متصل یدّى اطاقیدی
اطاقلار تو به تو بزم یزیده چون رواقیدی
اطاق هفتمین پیوست باب تخت و طاقیدی
اونون دیوار و سقفی صاف و سیمین رنگی آقیدی
أونی نقاش ائدوب آئینه تک چرب مصفّادن
.
.
دانیشدی مرد کوفی نقشه نی نقاش فن چکدی
ازل بیر خیمه ی شاهانه ی زر پیرهن چکدی
او زرّین خیمیه چوخ خیمه لر اطرافدن چکدی
کنارینده اونون بیر حجله ی کوچک بدن چکدی
وئروب ترتیبه أو حجله أوسته اورتوک قاره دیبا دن
.
.
او عالی خیمه ده بیر قبّه زر تخت روان چکدی
او تختی بیر نفر خاتون علیایه مکان چکدی
او خاتونی حریم بانوانه حکمران چکدی
قباقینده دوروب أولاد هاشم مهربان چکدی
عبارتدور او خاتون زینب محجوب کبرادن
.
.
اویاندا صف چکوب بیر عده ی پیر و جوان چکدی
حسینی عرشه ی عزتّده با اجلال و شأن چکدی
ابوالفضلون الینده پرچم شمشیر نشان چکدی
مهابتله اونی اردوی شاهه پاسبان چکدی
اولور تابنده آثار وفا رخسار زیبادن
.
.
نقاب و معجر آلتدا بیر بولوک اهل حرم چکدی
هاموسین رخت عصمتده عزیز و محترم چکدی
مقابلده دایانمیش ال ال اوستونده خدم چکدی
بو جاه و حشمته دست جفا آخر قلم چکدی
کمند محنت ایّامه سالدی تخت اعلادن
.
.
بئشیکده خواب نازه غوطه ور بیر سود امر چکدی
دوتوب گهواره نی بیر قز اونا لایلای دییر چکدی
ورود کربلانی عزّتیلن سر به سر چکدی
قلم آغلار صورا نقاش مصر اوردا نه لر چکدی
مکدّر خامه دن نامه قلم شرمنده طغرادن
.
.
وئروب دیوارده ترتیب ایکی تابلو مهارتله
همین تابلولار آغلاتدی یزیدی او قساوتله
ابوالفضلی دوروب قولسوز بدن دولمیش جراحتله
لجام مرکبیندن بیر نفر دوتمیش شقاوتله
عمودی اندیرور عبّاسی یخسون زین بالادن
.
.
ایکیمجی نقشه ده بیر اوخ قوتاردی دست نقاشدان
یزیدون قلبینه دگدی اگر چه سختدی داشدان
دوروبدور تلّیده زینب اوجالدوب اللرین باشدان
دولوب لشگر خیامه باجی ایستر چاره قارداشدان
حسین نیم خیز اولوب گلسون هرایه قانلی دریادن
.
.
اویاندا سهمگین وسعتلی طولانی بیاباندور
آلو قالخور هوایه خیمه لردن آتش افشاندور
خانم عورتدی شهزاده بالا قزلار گریزاندور
قاچا قاچدور آچوخ باشدور قووان چوخ گور نه طوفاندور
اوشاقلار نقش باغلار تپراق اوسته ضرب اعدادن
.
.
خلاصه نقشه نی نقّاش مصری چون تمام ائتدی
على اولادینی محزون یزیدی شادکام ائتدی
بزندی مجلس سفیان أذن بار عام ائتدی
حیاط و بارگاهه شامون اهلى ازدحام ائتدی
دایاندی گردش چرخ فلک آواز و غوغادن
.
.
یزید امر ایلدی تا مجلسه آل عبا گلسون
رباب و زینب و کلثوم و هم زین العبا گلسون
کئچوب یدّی اطاقدان اهل بیت مصطفی گلسون
یاراسی تازه لنسون قلب زینبدن نوا گلسون
بلای روز عاشورا ظهور ائتسون او مأوان
.
.
او ظلم آبادون آل الله اطاق اوّلین کئچدی
اطاق دومین و سومیندن دل غمین کئچدی
اطاق چارم و پنجمدن آه آتشین کئچدی
اطاق ششمین وصفی هاموسیندان چتین کئچدی
اطاق هفتمین دولدی صدای واحسینادن
.
.
بلالی کاروانی ساخلادی مأمور همان یئرده
گوتوردیلر به فوری نقشه ی دیواردن پرده
حسینون قتلگاهین درک ائدوب زینب برابرده
أوتورمیش شمر حسینون سینه سینده خنجر حنجرده
اوزین گوردی قاچور شمره طرف وحشتلی صحرادن
.
.
اویاندا گوردیلر عبّاسی قولسوز خاک میداندا
بویاندا اکبر شهزاده آلوده قزل قاندا
قالوب آتلار ایاقی آلتدا قاسم بیر بیاباندا
کسوک باشلار جداده گورسنورلر دست عدواندا
آخار قان نیزه دن تپراقه زلف عنبر آسادن
.
.
هامی سسلندی بیردن یا محمد یا رسول الله
نه اندازه بیزه ظلم ایلیور گور امت گمراه
دیدی زینب حسینیم وای یخلدی غش أئدوب ناگاه
یزیدون مجلس جشنی دولاندی اولدی ماتمگاه
غبار غم الندی دللره بو درد عظمادن
.
.
مبدّل اولدی نظم اهل مجلس های و جنجاله
حرم لر زینبی آلدى ارایه چکدیلر ناله
او بانوی ادب علیا جنابی گتدیلر حاله
کئچنده مجلسه الله بیلور دوشدی نه احواله
ائشیتدی طعن و استهزا یهود و گبر و ترسادن
.
.
واریدی بیر نئچه غرفه او بزمه پرده سی دیبا
یزیدون قزلاری عورتلری اوردا أئدوب سکنا
حسینون هنده آدلی بیر کنیزی شیعه ی مولا
یزیدون عورتیدی ظاهریندن باطنی زیبا
باخوردی مجلسه پرده دالیندا گنج اخفادن
.
.
أو دم که خیزرانی اندیروب سلطان لامذهب
حسین باشی الینده مثل اینکه ماه در عقرب
دئدی یا بنت زهرا کَلّمینى نطقه گل زینب
پوزولدی خارجی آدی اوخوندی صحّت مطلب
ائشیتدی زینب آدین هنده دیسگیندی او معنادن
.
.
کنار پرده دن فوج اسیرانه ائدوب دقت
نه گوردی قول قولا باغلی دایانمیش عترت عصمت
قاباقدا حضرت زینب او خاتون فلک حشمت
توکوب معجر یئرینه گیسوانین گیزلنوب صورت
قرانلوق اولدی گوندوز هندیه ظلمات یلدادن
.
.
حجاب غرفه نی آچدی اوزین دیوانه وار آتدی
دایاندی بزمده ال صورتینه زلفینه قاتدی
ووروب لطمه یوزینه زلفی رخسارى قانا باتدی
یزیده قهریله بیر سؤز دئدی حضّاری آغلاتدی
دئدی ظالم اوتانمورسان مگر معصومه زهرادن
.
.
دییردون بس بولاره خارجی ملّتدور ای کافر
منه یاغی اولوبلار قتلینه اقدام ائدوب لشگر
حسینون باشینی گورّم الونده قانیلن احمر
بولاردور سیّده م زینب یانیندا آل پیغمبر
سن استقلالیوه تیشه اوزون ووردون بو سودادن
.
.
روادور من نقاب آلتدا قالام اغیاردن پنهان
کنیزون قزلارون پرده دالیندا اگلشه خندان
دایانسون باش آچوخ مجلسده زینب صدره ی نسوان
قباقونده پیمبر قزلاری بی معجر و گریان
گورونسون دیده ی نامحرمانه هر زوایادن
.
.
بو خوردا قزلاری محکوم قیلدون سن نه تقصیره
آتا قارداشلارین حکم ایلدون چکدیله شمشیره
بیابان گزدیروب باغلاتدیروبسان رشته زنجیره
ندور حقه جوابون حشرده ای عاقبت تیره
بوراخ بو بینوا اطفالی خوف ائت حی و یکتادن
.
.
یزیدون مجلسینده حقه پرده چکمدی هنده
او بزم جهلده ائتدی حسینون حقّینی زنده
یخلدی خاکپای زینبه تختون قباقینده
ایاقینده امام عابدینون تیتردی کُنده
حسین وای ناله سی گلدی غل و زنجیر ثقلادن
.
.
دئدی أولسون گوزوم کور ای رشیده بانوی محبوب
سنون درگاهوین فرشین ائوینده ائتمیشم جاروب
حسینون ریزه خوار سفره سیدیم ای وفا اسلوب
بو نه احوالدور زینب سنی دوران ائدوب مغلوب
لباسون قاره دور گورّم نقابون زلف بیضادن
.
.
یاراشماز سن جلالتده خانم محنت قرین اولسون
کنیزون هنده اما قصرده پرده نشین اولسون
حسین لیلانی گورسون اکبریلن دلغمین اولسون
منی قوی باش آچوخ گورسون یزید اندوهگین اولسون
بو حالیله قصاص آللام او شاه پست و ادنادن
.
.
بو وضعیله گورنده هنده نی اول ظالم و غدّار
اگرچه مستیدی ائتدی بو احساسات اونی هشیار
آتیلدی تختدن قهریله چون نیران آتشبار
عباسین هنده نون باشینه سالدی گورمسون اغیار
حرمگاهه آپاردی بارگاه ظلم افشادن
.
.
سنیچون یا یزید عصرونده بیر نقاش ماهر وار
نئجه فرعونیدن جنگ کلیم اللهه ساحر وار
کلیم الله الینده سحر باطل چوب طاهر وار
حسینه «یحیوی» تک مین لریله آدلی شاعر وار
بولرون خامه سی معجز نمادور چوب موسادن
.
.
.
#مجلس_یزید #یحیوی_اردبیلی #ترکی #زبدةالاشعار #هنده