دیر راهب
.
.
کامران اسدی حقایق
.
بو باشی گر چه وار یوخی وئریب امانت آلمیشام
ولی دَیَر که وار یوخی وئریب شرافت آلمیشام
.
.
عدودن آلمیشام بو گون عزیز کبریانی من
او بی صفادن آلمیشام بو معدن صفانی من
اوجوز تیکاندان آلمیشام گل گرانبهانی من
چتین اله گلن گولی غریبه راحت آلمیشام
.
.
خدا عدونی گور نئجه اسیر غفلت ایلدی
بو غفلتی خدا منه بیوک غنیمت ایلدی
منه عدو جهالتی غریبه خدمت ایلدی
الیندن اهل غفلتین غریبه نعمت آلمیشام
.
.
قارا گونوم چاتیب باشا، بو باش گلنده ناگهان
آچیلدی بختیمین گوزی بو باشه گوز دوشن زمان
دگیلدی اؤز ایشیم بو ایش خدا ایشیدی بی گمان
بو گوهری خدا منه ائدیب عنایت آلمیشام
.
.
بو دلبری اوزون زمان گوزومدن ایلیب نهان
بو بارہ دن ووروب منه زمانه چوخ آغیر زیان
یوخ ایمدی ذرّه جه ولی آغیر زیانیدن نشان
مقابلینده چون بو گون آغیر غرامت آلمیشام
.
.
بو قیسّا اللری عجب اوجا یره یئتیرمیشم
بیری اله گتیرمییب اونی که من گتیرمیشم
عجب دگیل بو قدر اگر اؤزومی من ایتیرمیشم
اؤزوم کیمی فقیره گور نقدر مکنت آلمیشام
.
.
فقیریدیم بو وقته جا ائدیب بو باش غنی منی
بو سرعتیله اولمییب جهاندا هئچ گدا غنی
جواهری ساتان عدو، آلیبدی مندن آهنی
دلیل زحمتی وئریب، دلیل رحمت آلمیشام
.
.
الیمده هر نه وار وئریب اله بو باشی سالمیشام
عجب معاملیدی گور نه وئرمیشم نه آلمیشام
دوزون دییم بو ایشده من أؤزومده مات قالمیشام
أؤزوم کیمی حقیره چون بیوک سعادت آلمیشام
.
.
قوجالیقیمدا چاتمیشام وصال مه لقایه من
نواسیز اولمالی زمان یئتیشمیشم نوایه من
امیری ائتمیشم قوناق بو کلبۀ گدایه من
شکسته نفس امیریدن ذلیله عزّت آلمیشام
.
او لذته یتیشمیشم که لذت حیاتیدی
او آبرویه چاتمیشام که تشنه سی فراتیدی
اونا یتیشمیشم که او سفینۀ نجاتیدی
سفینه دن نجاتیمه بو گون ضمانت آلمیشام
.
.
بو پرده ایستدیم اولام فقط بو باشیلن اوزوم
اونا تیکیلسین ایستدیم فقط منیم ایکی گوزوم
دییلسین ایسترم اونا بو آز زماندا چوخ سوزوم
که هر مه واردی وئرمیشم بیر آز فراغت آلمیشام
.
.
ایکی جهاندا هر توکی بو باشین آبرو وئرر
دم مسیحه بیر دمی مین آیری خلق و خو وئرر
بورا که سهلیدی بو باش بهشته عطر و بو وئرر
روادی گر دئسم بو گون بهشته زینت آلمیشام
.
.
گئچن کی گونلرین گوروم بنالری خراب اولا
نگارسیز حیاتیمه ئولوم گرک خطاب اولا
گئچن کی عمر حیفدی که عمریدن حساب اولا
مسیح دم حسینیدن تازا ولادت آلمیشام
.
.
تشهّدی دئدیم داخی بیر آیری دینه صاحبم
مسیحیدن گوزل اولان رسول حقّه راغبم
داخی نه دیریدی بو یر نه من بو یرده راهبم
او کهنه دینی وئرمیشم تازا دیانت آلمیشام
.
.
سالیب چیخاندا بو گئجم بوتون گونوزلره دگر
گوزوم گوتورموری گورم بئله گئجه اولوب سحر
ستارۀ سحر گوروم که اولمیبدی جلوه گر
سحر اولونجا چون فقط وصاله مهلت آلمیشام
.
.
بو باش گلیب باشیم کیمی اؤرکده روسفید اولا
گلیب یوزی قارالیقیم بو گئجه ناپدید اولا
بهشت بابین آچماقا گلیب منه کلید اولا
بو باشی من آلان زمان کلید جنّت آلمیشام
.
.
بو باش باشی بلالیدی هارا گئدیب گوروب بلا
نقدر خسته لیق چکیب بونی فقط بولور خدا
میسّر اولمادی آلام بیر آیری زاد بو یورقونا
بیر آز زمان فقط بونا من استراحت آلمیشام
.
.
توتوبدی قرمزی بولوت جمال ماه دلبری
بولوتدان ایلییم رها گرک بو ماه منظری
خسوفیدن چیخاردارام بو چهرۀ منوّری
خدادن التماسیلن بو امره طاقت آلمیشام
.
.
بو باشه شستشو وئرن نه تک گلاب ناب اولار
گلابیلن شریک اولان گوزومده کی سحاب اولار
بئله گل اوسته گوز یاشیم توکولسه گر گلاب اولار
سووی گلابه دؤُندرن گل کرامت آلمیشام
.
.
قونوب چولون توزی کیمی بو گون یوزه کدر توزی
چولون توزی گئدر ولى قالاندی غصّه لر توزی
بو توز نئجه گئده بولر، دگیل بو توز سفر توزی
زمانه دن بیر آیری توز بیر آیری صورت آلمیشام
.
.
بو گرد و بو غباریدن بو رأس خون نگاریدن
اوخوموشام نلر چکیب بو باش بو روزگاریدن
فقط بو باشی آلمادیم عدوی کین شعاریدن
اونون یانیندا دفتر غم و مصیبت آلمیشام
.
.
گَزیر مدام گوزلری، کیمی بو سرور آختاریر
یقین که نور چشمینی بئله مکرّر آختاریر
رقیه، گل هایانداسان سنی بو گوهر آختاریر
سنونکیدی بو درّی من فقط امانت آلمیشام
.
.
اگر بو یرده آختاریب قیزین بو مهربان بابا
رقیّه ده خرابه ده دییب که هارداسان بابا
وصالیلن دییب منی گل ایله «کامران» بابا
که نئچه لحظه هجریدن وصاله فرصت آلمیشام
.
.
#دیر_راهب #کامران_اسدی #ترکی #زبدةالاشعار
نظر دهید