مقام و مسند و ملکت سنون دی یا مهدی #مهدیه_علیوی

مدد یا صاحب زمان
..
..
عُلیوی
..
..
مقام و مسند و ملکت سنون دی یا مهدی
جلال و عزت و شوکت سنون دی یا مهدی
..
..
زمانه طی اولا مین یول دولانسا دورانلار
حکومت ایلسه مین ایل مجازی سلطانلار
عدالتین گئنه رنگین گورنمز انسانلار
که علم و حلم و عدالت سنون دی یا مهدی
..
..
بشر معاشینه ایشلور معادیلن ایشی یوخ
دانشدیراندا دیوللر زمانه ده کیشی یوخ
مین ایل جهان بِله گتسه توکیجن ارزشی یوخ
که عدل و رحم و مروّت سنون دی یا مهدی
..
..
بو دنیا فرض ائلسک سربه سر گلستاندی
تمام ائو لری ایوان لاری قزیلداندی
سن اولماسون گئنه اهل یقینه زنداندی
صفا و صلح و صلابت سنون دی یا مهدی
..
..
یتیش هرایه که اهل جهان سنی سسلور
فقیر و بیکس و بی خانمان سنی سسلور
دوشوب فشاره زمین و زمان سنی سسلور
دیار و دولت و ملّت سنون دی یا مهدی
..
..
قالوبلا دهریده پرونده لر بلاتکلیف
پولیلا پارتی اولان،حکمی ایلیور تحریف
جهان دوزلمیجک سن گتیرمسون تشریف
اصول حکم قضاوت سنون دی یا مهدی
..
..
اولوب اراذله میدان موبایل و ماهواره
فرشته یرده دی، شیطان مینوبدی طیّاره
نه دین قالوبدی نه غیرت ئوزون گل ائت چاره
کمال عصمت و غیرت سنون دی یا مهدی
..
..
رسولین عطری گلور رازیلن نیازونده
که گیزلنوب نچه مین سجده دستمازونده
بیزیده یاد ائله مولا گئجه نمازونده
صلات و ذکر و عبادت سنون دی یا مهدی
..
..
اگر بیرین دئسه لر اهل علم و عرفان دی
ویا که صاحبِ جاه و سِمت دی سلطان دی
سنون امامتیوه منکر اولسا نادان دی
علوم و حکم امامت سنون دی یا مهدی
..
..
سنه رسول مقدس شعار فخر ائلیر
علی و فاطمه ی با وقار فخر ائلیر
سنون وجودیوه پروردگار فخر ائلیر
جلال و جاه و فضیلت سنون دی یا مهدی
..
..
دوشنده مشکله شیعه دِینده یاعباس
منیم عقیده مه سسلور سنی او فخرالناس
زمانه صاحبی سن سن امیرِ کلّ اُناس
امیر سن بو امارت سنون دی یا مهدی
..
..
بو دنیا خلق اولونانّان خزان دی مولاجان
ضعیف و ظالمه، ظلم و زیان دی مولاجان
صفالی گونلری آخر زمان دی مولا جان
بهار موسم خلقت سنون دی یا مهدی
..
..
خوشام او گونلره که حیدری صلابتیلن
جهانی دولدوراسان عدلیلن، عدالتیلن
یتیشه هر کسن ئوز حقینه کرامتیلن
کرم سنون دی کرامت سنون دی یا مهدی
..
..
قالوبدی بوش بیرینون الّی باغ و ویلاسی
بیرینون الّی مِتیر ائو اولوبدی رؤیاسی
گرئولسه قبره پولی یوخدی خوار اولار یاسی
امام سن بو مصیبت سنون دی یا مهدی
..
..
اگرچه سنده بو میدانه لشگر آختاریسان
واروندی الده محک ناب گوهر آختاریسان
نه اوچ یوز(علیوی)اوچ یوز ابوذر آختاریسان
الهی حکم و حکومت سنون دی یا مهدی
..
..
..
#مهدیه #علیوی #ترکی #زبدةالاشعار