تجلی الهی مولا حسین (ع)
در میدان مبارزه
..
..
..
..
شاهی اردبیلی
..
..
..
..
منزل قرآنی عوام ئولدورور
مات ایلیوب شاهی غلام ئولدورور
..
..
..
..
بیر متظاهر یتیشوب منصبه
مذهب و ایمانی ایدوب ملعبه
ضربه ویرور مکتبلن مکتبه
یر یوزینی تنگ ایلیوب زینبه
حقی پوزان مرتبه دور مرتبه
شاهد ایمانی مقام ئولدورور
..
..
..
..
بیر اوجا زنداندی بو دین الست
کیم بو اوجا یردن آشا اولدی پست
«مرد به زندان شرف آرد به دست
یوسف از این روی بزندان نشست »
نفسوی زندانه ایله پای پست
ورنه او بد نامیدی نام ئولدورور
..
..
..
..
باده ایچنلر ، قدح نوردن
نفسی یخوب سالدی اونی زوریدن
باده سلیمان ایلیر موردن ،
باده ی آختارمیون ، انگوریدن
باده مبرّادی ، شر و شوریدن
ما و منی باده و جام ئولدورور
..
..
..
..
داغلادی پیشانی لری پینه لر
تاپمادی جامیله صفا سینه لر
ذکرلری ایتدی تهی کینه لر
سن بیلوسن ئولدی الهی نه لر
گوردی سینان وقتده آیینه لر
وای که جان صبحنی شام ئولدورور
..
..
..
..
آدلاری اسلامده آگه روان
عرصۀ دعویده بوتون ، پهلوان
نفس پرستی ده ، قوی قهرمان !
سجده لریندن اوتانان نهروان
حفظدن آیات اوخیان رهروان
پوزموش الف حکمنی لام ئولدورور
..
..
..
..
جنگ جهالتده بوتون جیب لر
دین یخیلوب ئورتوب توزین زیب لر
ترسنه ترسیم اولونور شیبلر
مذهب لن پرده لنوب عیب لر
مرد لرون مایه لری ریب لر ! !
رنگ و ریا صدق و سلام ئولدورور
..
..
..
..
ظاهری قرآنی دوتانلار عزیز
باطنی قرآندان اوزاق ناتمیز
حجت یزدانه چکوب تیغ تیز
زینبی، زهرانی ایدوب اشکریز
ئوزلریده معتقد رستخیز
وه که نماز اهلی امام ئولدورور
..
..
..
..
سئل کیمی اعراب سراسر دغل
بی سر و پالیقدا بوتون بی مثل
وحشی جنگل کیمی بَل هُم اَضل
الده قلیج باشدا هوای جدل
قصدلری قتل شه لم یزل
حلقه ویروب نوره ضلام ئولدورور
..
..
..
..
تک دایانوب عرصه ده بیر پادشاه
کپریگینون هر بیری یوز مین سپاه
عرش پناهنده گوزی بی پناه
«جامه درد ماه از این دستگاه»
«پای فلک بسته تر از دست ماه»
نیم رخی بدر تمام ئولدورور
..
..
..
..
صورتینه نوردن ایتمیش نقاب
سایه سینه سجده ایدر آفتاب
اصلده دریا بودی ، دریا حباب
چشمه نی داشدان چیخادار بو جناب
لب لرین اما عطش ایلر کباب
قلبی یانور روح صیام ئولدورور
..
..
..
..
عدنده حسنین ایشیدوب خوب لر
بیخود اولوب ایلین آشوب لر
طالب اولان عشقنه مطلوب لر
لبلرینه توبه ویرن چوب لر
رشک آپاران صبرینه ایوب لر
غمدن آلوب غمزه سی کام ئولدورور
..
..
..
..
نعل سمندیندن اوپن کهکشان
قتلگهی قبلۀ لاهوتیان
عشقی ایدن طبعیمی آتشدهان
من دیمورم حضرتنه لامکان
سن ئوزون انصاف ایله گل ایت بیان
کیمدی بومولا که عوام ئولدورور
..
..
..
..
چکدی زمان گل لره رخسارینی
اوخشامادی زار گوروب کارینی
ایتدی نهان غنچه ده آثارینی
ایستسون ار جنت دیدارینی
اشکدن ایت تجرى الانهارینی
ورنه مه دینی غمام ئولدورور
..
..
..
..
الحق او شهدن ایلسون پیروی
«مست شوی و شه مستان شوی »
هر نفس عشقنده اولار عیسوی ،
ایستسه «شاهی» دن ایدر «یحیوی»
ایستمسه عاجز اولاندور قوی
اوندا کلام اهلی کلام ئولدورور
..
..
..
..
حسنی اولوب آئینه رخسارینه
آئینه ده یار باخور یارینه
واله اولوبدور اوزی دیدارینه
گهده گورور جان آسیلوب تارینه
شمر چیخوب سینۀ تبدارینه !
چکمه سی آلتندا عظام ئولدورور
..
..
..
..
سوسن ایدر خطبه ادا حلقنه
شیوه سانار نوک جدا حلقنه
پایه فلک رتبه خدا حلقنه
رتبه خدا کعبه گدا حلقنه
کعبه گدا منده فدا حلقنه
گرچه منى طعنۀ عام ئولدورور
..
..
..
..
زیر قدومینده زمین آسمان
گون باشی اوستینده آچان ساییان
جسمنه حسرت آپاران جان جان
گوگده ایاقلارین اوپن قدسیان
یرده کسن اللرینی ساربان
غملری دنیانی مدام ئولدورور
..
..
..
..
جوهر معنادی بو والا تبار !
پردۀ صورنده تاپوپ استتار
من دیمورم بنده دی یا کردگار
سرّینی اؤز حُسنی ایدور آشکار
هر باخیشی خطبه دی هر حرفی یار
هر قاشی مین پخته نی خام ئولدورور
..
..
..
..
یعنی منم عابد معبود جاه !
«زلف خطا برزده زیر کلاه »
روح الامین حلقین اوپن گاه گاه
زینبی حسرتله چکن آه آه
قیزلاری قول باغلی اوزی پادشاه
خیر انامم که انام ئولدورور
..
..
..
..
من او شهم تشنه دی کوثر منه
اودلار آچار سوسن صد پر منه
خنده ویرار نیزه و خنجر منه
شمرده مغلوبیدی آخر منه
ذرّده بیر جام ویرویلر منه
تک منی ئولدورسه او جام ئولدورور
..
..
..
..
گرچه دو لوب دشمنیلن چار سو
نعره چکوب جمله ایدرهای و هو
بسدى منه بیر سود امر رزمجو
یارسادا ظلمیله بوغازین عدو
جدی ایدر جان ایپگیندن رفو
سانما جنان مرغنی دام ئولدورور
..
..
..
..
حشرده ذموز اولا حاشا بری
یاد ایلیون بیر فزع اکبری
ابجدیم ابقا ایلیوب منبری
کیمدی گورون فاطمه نون دلبری
فکر ایلیون زادۀ پیغمبری !
هانسی مرام هانسی نظام ئولدورور
..
..
..
..
عشقیله که تاپدی اورک کاروبار
بیردی اونا بوی گل و زخم خار
سینمون اوستونده که آت چاپدیلار
یاره لریمدن اوجالار یار یار
ئولدوره حاشا منی یوز مین سوار
لیک یانان لحظه خیام ئولدورور
..
..
..
..
بیر یره تا چاندی زمان وای وای
گوردیله شه نیزه اوجین ایتدی جای
لبلری ترپندی دوشوب های های
لب دیمیون گوهر یاقوت زای
غنچه در و در شکن و لعل سای
حیف اولا عطشاندی دوام ئولدورور
..
..
..
..
کیمدی بو سر نیزه نشین عبد پیر
کج مژه سی راست ویرار قلبه تیر
نیزه بوغازیندن اوپر سیر سیر
زینبینه وعده ویرر دیر دیر
ویرمسه گر وعده ئولو بواسیر
ئولمه سه ده فتنۀ شام ئولدورور
..
..
..
..
سیره جدا اوسته چیخور هر زمان
گوزلری عاشق لره ویرمور امان
کیپریگینی زینبی گورجک همان
قدّینی ابرو کیمین ایلور کمان
میمنه و میسره نی توأمان
بیر مژه سی ایتسه قیام ئولدورور
..
..
..
..
چوخدان آچوب خوان کرم مقتله
قسمتى حتى یتیشوب بجدله
لا دیمیوب اوخ گله یا داش گله
خیزران آدلو بیر آقاج وار هله
آلسا یزید بن زنا گر اله !
عالم امکانی تمام ئولدورور
..
..
..
..
اولدی که اورتوکدن عیان طشت زر
لاله قیزیل پیرهنین پاره لر !
زینبی زلفیندن آلون سیز خبر
خورداجا قیزلاری سوروشسوز اگر
بسدی بو مقدار دوروب ایلشر
ورنه سخن تیغی کرام ئولدورور
..
..
..
..
بیر ایپه باغلیدی بیلکدن کبار
بسته بویوندان او ایپه خوردالار
قاخدی که اللر گوگه بی اختیار
چیخمادی سس سنده دیمه آشکار
ایپ چکیلوب تاپدی بوغازلار فشار
اهلنی پوشیده پیام ئولدورور
..
..
..
..
ایتدی باخیشنان ولی گوزلر ادا
سن هارا ای شاه بو مجلس هارا
لبلروه خرج ایلیورلر جفا !
یا بیزی قول باغلی گوروبلر بابا
یا عموم عباس دوشوب تپراقا
سیزلری بوقوم لئام ئولدورور
..
..
..
..
نظر دهید