تنور خولی
.
✍️ #زبدةالاشعار ✍️
.
🆔: @nohe_torki
.
مرحوم حاج رسول امینی خویی
.
من آنان فاطمه یم ای شه خوبان یارالی
گلمیشم خولی ایوینده سنه مهمان یارالی
باشون اوستونده دوتام شام غریبان یارالی
بسلمیشدیم بو باشی گللربن اوستونده حسین
یاتموسان ایندی نیه کوللرین اوستونده حسین
.
.
وای منه کرب و بلاده قالوب عریان بدنون
نیزه اوخ یاره لریندن که ورور قان بدنون
گوردوم اولموش قانا باشدان باشا غلطان بدنون
بینوا زینب مظلومه چکور آه یانور
اود وروب قوم کفر خیمه و خرگاه یانور
.
.
اوچ گئجه گوندوز اولور باشیمه دنیا دولانور
گوز آچوب باخموری گوز یاشیمه دنیا دولانور
دور اولاد بنی هاشمه دنیا دولانور
باغلانیب قول قولا اطفال پریشان یارالی
دور آنان فاطمه اولسون سنه قربان یارالی
.
.
دشمنین تحت لواسینده قالوب اهل حرم
باغلیوب دیللری باشدان ایاقا درد و ورم
منده اوز باشیمه معناده حسین کول الرم
آچ گوزون بیر من بیچاره نی دیندیر یارالی
بیر دانش بو دل ویرانی سویندیر یارالی
.
.
گلمیشم من سنه معناده اولام همدم اوغول
گتدیم اوّل سنه بیر جرعه ورم زمزم اوغول
درد و غمدن گوروسن قدّیم اولوبدور خم اوغول
اگدی غم غصه بو زهرا ننوین قامتنی
بیرده گوز گورمز اوغول دهرده بوندان چتینی
.
.
بوشلیوب جنتی حوائیله آدمده گلوب
حضرت نوح گلوب عیسی مریم ده گلوب
انبیا فوجینه پیغمبر خاتم ده گلوب
همصدا اولموش او مولایه هامی حور و ملک
حضرت ختم رسالت گلوب اما که نه تک
.
.
زینبین قلبنی غم تیری بولوب ایتدی یارا
گوندوزین چرخ زمانه گئجه تک ایتدی قارا
ایلسین دردینه بیچاره لرین بس نه چارا
بیر یانان خیمه ده قول باغلی اورک یاره لیلر
آغلاشیلار گئجه نین مثلی گونی قاره لیلر
.
.
سن یانورسان بو قدر غصه و درد و کدره
قیل توسل سن «امینی» شه خونین جگره
سعی قیل یازدیقین اشعاریوی ورمه هدره
اجر و پاداشیوی سلطان شهیدان وره جاق
بیرده زهرا خانم اول سرمد نسوان وره جاق
.
.
#تنورخولی_امینی_خویی
#من_آنان_فاطمه_یم_ای_شه_خوبان_یارالی
#ترکی
.
✍️ #زبدةالاشعار ✍️
.
🆔: @nohe_torki
نظر دهید