موحّد اولمیان انسانیده روح وقار اولماز #فاطمیه_انور_اردبیلی

حالات حضرت زهرا (س)
.
.
.
مرحوم #انور_اردبیلی
.
#پندیات
.
موحّد اولمیان انسانیده روح وقار اولماز
یولیندان منحرف اولسا بشرده افتخار اولماز
.
بو دنیایه گلوب گئتمک فقط سیر تکاملدور
حقیقت دور سوزوم روشندی مطلب استتار اولماز
.
ز آدم تا الیٰ خاتم ائدوبلر بو سوزی تأکید
بو دنیا عاقبت فانیدی فانی پایدار اولماز
.
سعادت آختارورسان مکتب توحیددن درس آل
گئده کیم مکتب توحیده دوز یولدان کنار اولماز
.
حریم امن قرآنی قویوب ناامندن گئتمه
کتاب اللهدن آیری دوشن لر رستگار اولماز
.
او کسکه بنده ی معبودیدور آزاده انساندور
گئدوب ظالملرون سر سفره سینده ریزه خوار اولماز
.
بش اون گون خوش گونه خاطر حمایت ائتمه ظالمدن
شرافت لی بشر ظلامه هرگز دستیار اولماز
.
ئولوم واردور قیامت وار قیامتده قضاوت وار
قضاوت ایلین عادلدی حکمیندن فرار اولماز
.
او گونکه کوه محکم لر آچیلمیش پنبیه بنذر
سلاطین جهانگیرون الینده اقتدار اولماز
.
جهنم سسلنر نعره چکر ئوز طعمه سین ایستر
موجّه اولماسا عذرون قبول اعتذار اولماز
.
او کسلر که ارادتمندیدور تابعدی مولایه
اولار آزاده انساندور مسلّم اهل نار اولماز
.
علینون شیعه سینده غیرت و ناموس اولار طبعاً
محیط مذهبین ترک ایلیوب بی بند و بار اولماز
.
علینون شیعه سی حق اوسته ئولمکدن هراس ائتمز
علینون شیعه سی بی همت اولماز بی بخار اولماز
.
علینون شیعه سی دیناره ساتماز گوهر دینین
نه گجه باده لر مستی نه گوندوزلر خمار اولماز
.
پیاده اولسا مولانون گوزل برنامه سی مطلق
مجلّل کاخ لرده مجلس عیش و قمار اولماز
.
لباس کهنه گئیمیشدی بیری عرض ائتدی یامولا
گوتورسون پرده بو سوزدن غلامون دلفکار اولماز
.
مگر جائز دگول شرعاً لباس تازه گیمورسن
امیر امّتون آخر لباسی وصله دار اولماز
.
بویوردی قادرم تازه لباسی گیمگه اما
عدالت که اونون مشتاقیم من سازگار اولماز
.
تاپولسا بیر نفر عریان علی فرمان وئرن یرده
منم مسئولی شخصاً آیری بیر کس عهده دار اولماز
.
بلی رهبر گرکده ملتون هر فکرینه قالسین
و الّا فکر ملت ائتمیندن شهریار اولماز
.
او سلطان که ئوزی عاجزدی اجرای عدالتدن
اگر انصافی اولسا کرسی حقه سوار اولماز
.
#فاطمیه_شهادت
.
هزار افسوس اولا ثانی او مرد سامری سیرت
مرور ائتسون اگر تاریخه ایله فتنه کار اولماز
.
پیمبردن صورا مابین امت بیر شکاف آچدی
دوئیّت تاپدی قرآن اهلی وحدت برقرار اولماز
.
علی مسندنشین مصطفی عزلت نشین اولدی
نه چکدی بیر اولان اللهی بیلدی آشکار اولماز
.
مسلّم حقّی غصب اولدی فدکده اوسته لیک گئتدی
جهاندا بیر کسون حقی علی تک تار و مار اولماز
.
فدکدن دوشدی سوز یابن الحسن نظمینده مبهوتم
اشاریله سوزی شرح ایلسم محنت عیار اولماز
.
گرک بی پرده شرح اولسون فدک عنوانی مجلسده
مفصّل شرح اولا لازمدی نیلوم اختصار اولماز
.
او ملکی که بابون طاها آنون زهرایه وئرمیشدی
آتا وئرسه عطیّه هر قیزا بی اعتبار اولماز
.
حکیمیدی پیمبر امته هر فعلی حکمتدور
نه ایش گورسه خلافی امتیندن انتظار اولماز
.
خلاف امر پیغمبر ائدوب بوبکریلن ثانی
بو سوز روشندی هرکیم پرده چکسه کامکار اولماز
.
بتولین ملکی غصب اولدی غرض جعلی حدیثیلن
الیندن ملکی گئتسه هرکیمون گور اشگبار اولماز
.
گئدوب غاصبلره مسجدده تأمین دلیل ائتدی
بنی هاشمده آری خفت اولماز ضعف کار اولماز
.
گواه اولدی علی هم امّ ایمن صدق زهرایه
مگر حجت ایکی شاهدله شرعاً استوار اولماز
.
ایکی عادل گواهون منطقی ردّ اولدی ظلمیله
ابوبکره نجه دنیا بویی گور انزجار اولماز
.
بتولین شهپری سیندی چخوب مأیوس مسجددن
او حالدا زندگی زهرایه آیا ناگوار اولماز
.
ذَوی القربایه مصداق اهل بیتی سالدیلار تنگه
معاشی سخت اولا هر خانواده بُردبار اولماز
.
اودور شکوه ائدوب بیرگون دئدی صدیقهٔ کبریٰ
عم اوغلی تنگه گلدوم من بو نوعی روزگار اولماز
.
قاپیم یاندی قابورقام سیندی الدن محسنوم گئتدی
نه من تک سینه سی خسته نه قلبی داغدار اولماز
.
وریلدیم تازیانیله یخیلدوم صحن خانَمده
جهاندا بیرکسه زهرا کیمی زجر و فشار اولماز
.
در و دیوار و مسمار هر اوچی شاهددی مظلومم
دوگولمکده هئچ عورت فاطمیله هم قطار اولماز
.
منه ایندی بو دنیاده قالان سرمایه دورت گلدور
اولاردا گون بگون سولسا رضا پروردگار اولماز
.
اجازه وئر گئدیم شخصاً ابوبکری ائدیم قانع
فدک حکمین آلوم یوخسا خزانیم نوبهار اولماز
.
علی رخصت وئروب زهرا هما تک بال وپر آچدی
دئدی گر ملکیمی آلسام بو ائوده اضطرار اولماز
.
قضا سالدی یولا اما قدر فریاد ائدوب گئتمه
ئولینجه رفع محنت سندن ای والاتبار اولماز
.
ابوبکریله القصه ائوینده روبرو اولدی
بویوردی هئچ کیمون دائم الینده اقتدار اولماز
.
منیم حقّیمده پیغمبر بویورموش بضعةُ منّی
رسول اللهه مندن غیری بیرکس یادگار اولماز
.
سینوب قلبیم بیلورسن ملکیمون حکمین وئر اینجیتمه
مسلمانسان مسلمان حقی دانماز نابکار اولماز
.
ابوبکره بو اظهار تظلّم ایلدی تأثیر
بودور مشهور اولان مطلب خلافی اشتهار اولماز
.
سند تنظیم ائدوب فوری فدک زهرایه ردّ اولسون
بلی کیم ملکه دارا دور دسیسیله ندار اولماز
.
ابوبکرون ائوین ترک ایلدی صدیقه ی کبرا
دئدی یارب ائویمده بیرده حال انکسار اولماز
.
گلن سائللری درگاهیمه خشنود قیترّم
عم اوغلوم مستحقدن چاره سیزدن شرمسار اولماز
.
قباله الده دل مسروریدی شهبانوی اسلام
فلک سینسون مدارون سنده آیا خوش مدار اولماز
.
دچار ثانی اولدی فاطمه ئوز خط سیرینده
ائله بیر رحمسیز نامرده بیر کیمسه دچار اولماز
.
طویلُ القدّیدی هیکلده ثانی رهگذر باریک
ائله صیّاد آهن دل نه زهرا تک شکار اولماز
.
او ظالم قوللارین آچدی یولون صاق و صولون دوتدی
کیشی یول کسسه حتما عورته راه فرار اولماز
.
گوزل پیغمبرون سالدی گوزل آهوسینی دامه
اورکلر عقده سینده گور بو یرده انفجار اولماز
.
سؤال ائتدی هایاندیدون سوزی روشن دئدی زهرا
بلی صدیقه دن بیر واهی مطلب انتشار اولماز
.
ابوبکرون ائویندیدوم بویوردی ای فرومایه
گئدن املاکیمه آلدوم سند جای نقار اولماز
.
قبالون وئر دئدی منده چکوم ذیلینده بیر امضا
بویوردی وئرمرم خامون سنون زهرایه یار اولماز
.
اگر قلبون یانور زهرایه قطّاع الطریق اولما
شرف هر شخصده وار خار راه رهگذر اولماز
.
گوروب ثانی قباله آلماقی زهراده نامقدور
او ظالم بیر جنایت ایلدی مثلی دوبار اولماز
.
دگل انصاف گیزلتسم اگر بی پرده شرح ائتسم
ائشیتسه شیعه لر آیا نجه دیوانه وار اولماز
.
الین قالخیزدی غیظیله بتوله ویردی بیر سیلی
هر انساندا مروّت اولماسا وجدان و عار اولماز
.
علینون دلبری دلدن دوشوب دوشدی یوزی اوسته
دئدی الله یوزوم یاندی بئله سوز و شرار اولماز
.
مریضه بنده ام پهلو شکسته قوللاریم نیلی
غریب اولدوم مدینمده بئله غملی دیار اولماز
.
خلاف شرعیدور گل شاخه سیله عورتی ویرماق
گناهی اولمیان مظلومیه سیلی نثار اولماز
.
قبالم پارچالاندی کوچه ده اولدی پراکنده
بونوعی بیر کسون حقینده ظلم بیشمار اولماز
.
اگر قارداشیم اولسیدی منی ثانی ویرانمازدی
آتامون اولمادی اوغلی منه خوش روزگار اولماز
.
ایاقه دوردی زحمتلن عباسین باشینه چکدی
دئدی زهرا الهی خوش گونه امّیدوار اولماز
.
گلوب آهسته آهسته اولوبدور منزله داخل
ائله غملی ائو اولماز نه ائله غملی نگار اولماز
.
قاپی آغزیندا اگلشدی یوزون گیزلتدی زینبدن
آنا پوزقون ائوه گلسه قیزی گور اشگبار اولماز
.
شجاعتلن دئدی گئتدون وریلمیش قوش کیمی گلدون
نه گلدی باشوه گزلتسون ای مام کُبار اولماز
.
یول اوستونده یخیلمیشدون لباسون تپراقا باتمیش
سلامت یول گئده هرکیم لباسینده غبار اولماز
.
حسین قارداشیمه خاطر نقابون ردّ ائله یوزدن
جمالون پرده ده قالسا ملالون آشکار اولماز
.
نشان وئردی یوزین زهرا گوروندی سیلینون ردّی
دئدی بیرکس آنا سن تک مصیباته حصار اولماز
.
قباله آلماقا گئتدون آنا ایکاش گئتمیدون
بیلوردون بی مروت ثانی ده حقه چخار اولماز
.
یوزون نیلی قبالون یوخ گئدوب بیر گوشوارونده
سنه باخدوقجا زینب گوندوزی گور لیل تار اولماز
.
پیمبر جان وئرن وقتن سنه تأمین جان یوخدور
پیمبر بسلین گل دستگیر نیش خار اولماز
.
گوزوم چیخسون آنا زهرا گوزونده لکه قان واردی
خدا بین گوزده سیلی ضربتیندن لکّه وار اولماز
.
قصاص فاطمه #انور ظهور قائمه قالدی
بو مُهلک درده بیر چاره بغیر از ذوالفقار اولماز
.
.
#موحد_اولمیان_انسانیده_روح_وقار_اولماز
#قیام_زینب_انور
#ترکی
.
#زبدةالاشعار
.
: @nohe_torki