نار غم چکور شراره گور نجه دیلیمده قارداش #عباسیه_سیفی_اردبیلی

زبانحال امام حسین (ع) بر بالین برادر
..
..
..
..
سیفی اردبیلی
..
..
..
..
نار غم چکور شراره گور نجه دیلیمده قارداش
گلمیشم دوتام الوندن اللریم بئلیمده قارداش
..
..
..
..
آچ گوزون ایشقلی ماهیم ایله بیر منه نظاره
گوز یاشیملا قوی دوزوم من سینون اوستونه ستاره
سن کیمی وفالی قارداش گلمیوبدی روزگاره
لنگر امانیدون سن غصّه ساحلمده قارداش
..
..
..
..
همّت عرصه سینده بیرده سنکیمی هما تاپولماز
زهد و طاعت عالمینده عبد بی ریا تاپولماز
مین وفالی قارداش اولسا سنده که وفا تاپولماز
محور صداقتیدون عشق محفلیمده قارداش
..
..
..
..
جوهر وقاریدون سن نابیدی گوزل نهادون
معنویّت عاشقیدون وصل حقّیدی مُرادون
دیللرون شیرین سوزیدی هم شجاعتون هم آدون
بین حلقه ی حرمده گونده منزلیمده قارداش
..
..
..
..
یول گیدنده سن باخاردیم سرو قدّیوه دمادم
مثلیوى آخا دیردیم گورمیوبدی گورمز عالم
پنجه ی عدو شکارون سینمه سپردی محکم
همدمیم یوخیدی سن تک بیر نفر ائلیمده قارداش
..
..
..
..
شیر حقّیدون سالوبلار اوچیلار سنی کمنده
نه باشون قالوبدی سالم نه الون قالوب بدنده
سنسیز ای امید عترت غم نوا سالار چمنده
رنگ و بوی و جلوه قالماز غنچه و گلومده قارداش
..
..
..
..
سن محاق ظلمه دوشموش قاندا ماه منجلى سن
کوی حقده جان نثار پیر عشقسن ولی سن
هر باخاندا سویلرم آخ گوئیا آتام علی سن
باش یارالی جان ویرورسن ، سن مقابلیمده قارداش
..
..
..
..
گورمدیم اوتوز بش ایلده ذرّه ای خلل سوزونده
آلمیشام باشون دیز اوسته آغلارام یوزوم یوزونده
حیف اولا گوزون آچلمور یاره واردی صاق گوزونده
حقلی ام یانام ئولونجه من بو نسگلیمده قارداش
..
..
..
..
العطش دیور دمادم گللرون یانان دوداقی
خیمووه دوزوبدی زینب بیر سوری ملر اوشاقی
قیزلارا نجه دیوم من سو داغیلدى ئولدى ساقی
قالمیشام ئوزومده حیران حلّ مشکلمده قارداش
..
..
..
..
#عباسیه #سیفی_اردبیلی #عباسیه_شهادت #ترکی #زبدةالاشعار