نجه که اخگر سوزان خواصّ آب دوتانماز #سعدی_زمان

وداع سلطان کربلا
.
زبدة الاشعار

?: @nohe_torki
.
مرحوم حسینی سعدی زمان
.
نجه که اخگر سوزان خواصّ آب دوتانماز
اونون کیمی کج اولان دل، رهِ صواب دوتانماز
.
ره صواب او یولدور حسین او یولدا ویروب جان
مقام شامِخ قرآنی هر کتاب دوتانماز
.
بولود کیمی گوزوم آغلار آدی گَلنده حسینون
بهار فصلی بو خاصیّتی سحاب دوتانماز
.
نقدر ساقی محنت می غم ایلیه تقطیر
منیم گوزوم یاشی تک صاف بیر شراب دوتانماز
.
حسینه، زینبه چوخلار یازوب رثا و مدیحه
ولیک شیخ دوتان طرزی فکر شباب دوتانماز
.
یازار چوخ اهل قلم سرگذشت دخت بتولی
گونون مقامینی امّا گلوب رَباب دوتانماز
.
بولار نه سوزدی که یازولّار شمر زینبی سویدی
شغال بی هنر عالمده شیر غاب دوتانماز
.
دیولّه زلفینی سالدی یوزه علی قیزی زینب
علی قیزی یوزینه زلفینی نقاب دوتانماز
.
او هانسی گوزدی که ناموس حق جمالینه باخسون
جمال زینبه آئینه ی آفتاب دوتانماز
.
دیمه اوزین ایتوروب سربرهنه مقتله گیتدی
اَسَنده یِل جبلِ راسخ، اضطراب دوتانماز
.
فقط علی قیزی بیر دفعه باشینی اوزی آچدی
بلی قرار اود اوستونده کی کباب دوتانماز
.
او ساعتی که گوروردی گیدور قتاله حسینی
گوروب باش آچماسا دل سینه سینده تاب دوتانماز
.
بُلوردی قارداشی صاقدور هنوز دور خیامی
خیال معجریله قوم بی حجاب دوتانماز
.
خیام عصمته نامحرمان کوفه گَلَنمز
لیوث بیشه ی هیجا یِرین کِلاب دوتانماز
.
گوتوردی معجرینی زلف مشکبارینی آچدی
اوزین نظیر او زلفه عبیر ناب دوتانماز
.
حجاز شاهی باخور گوردی صاق صولا متحیّر
اورکده کی سوزه دل کلمه ی خطاب دوتانماز
.
آت ایستَماقدی خیالی ولی دینَمّوری واضح
مخاطب عترت اطهاری اول جناب دوتانماز
.
نه اوغلی وار گَتوره مرکبین، نه قارداشی عبّاس
قرار گوردی داخی دخت برتُراب دوتانماز
.
اوزی گیدوبدی خانم مرکب امامی گَتوردی
ولی رکابین او خورشید احتجاب دوتانماز
.
اگر سوار اولا قارداش اُلوم آتینا عیاندور
دیزینده طاقتی اولماز، باجی رکاب دوتانماز
.
امین وحی رکابین دوتوب که خادم اولاندا
رکاب شاهی خانم ایلیوب شتاب دوتانماز
.
خیاله گَلسه خطر رسمدور بو، ختم دوتالّار
برینده اولسا ولی حال انقلاب دوتانماز
.
دیلین، دوداقین ایله سوزش عطش قورودوبدور
دالینجا ختم فتحنا قیزی رباب دوتانماز
.
سکینه سپدی سرشکیله بیر گلاب دالینجا
جهان گَل اولسا فلک ایله بیر گلاب دوتانماز
.
رقیّه چشمه ی چشمیله رهگذاره سو سپدی
فرات او چشمه یانندا اوزین سراب دوتانماز
.
هلال زینب آچوب چتر آه شبه باشی اوسته
او چتری بیر شهه بیرده بو نُه قُباب دوتانماز
.
گوزینده گوز یاشی دریا کیمی گَلوب ایله موجه
که نُه فلک اوزین اول بحریده حباب دوتانماز
.
مخدّرات حجازین نواسی دشت عراقی
ایله دوتوب که اونی نغمه ی رباب دوتانماز
.
نه اَل چکور بالا قیزلار، نه داغ دیده خانیملار
اودور شتاب او سلطان مستطاب دوتانماز
.
اَلین اَیاقین اوپور رخت قاره اوغلی اَُلنلر
بُلولّه گیتسه ذَهابه، داخی اَیاب دوتانماز
.
آناسی سسلوری، گُل قیزلاری دیور بابا گیتمه
قویوب آنانی بالا حرفین انتخاب دوتانماز
.
فنون شعره حسینی هنوز دگل مسلّط
اودور که سوزلرینی لولو خوشاب دوتانماز
.

#وداع
#سعدی_زمان
#نجه_که_اخگر_سوزان_خواص_آب_دوتانماز
#لمعات_حسینی ص 262
#ترکی
.
#زبدةالاشعار

?: @nohe_torki