نقدر پیرو جوانی بویادون قانه فلک #راه_شام_عدلی_تبریزی

گلایه از فلک
در مصائب اسرای کربلا
.
.
.
حاج اصغر فرشچی (عدلی تبریزی)
.
.
نقدر پیرو جوانی بویادون قانه فلک
سنی قدرت ایلیوب عرصه ده دیوانه فلک
.
لوح محفوظه یازولموشدی گرک لفظی مگر
بیربیله ظلم اولونا شاه شهیدانه فلک
.
اوکه ترویج دینه آچموشودی مکتب عشق
سن خیانت ایلدون رهرو قرآنه فلک
.
دعوت ایتدون کوفیه امّا بلا دشتینده بس
بویادون قانینه دِ هانسی بیرعنوانه فلک
.
خلق وخوی و منطقی طاهایه بنزراکبرین
سن نیه ویردون دم شمشیر و پیکانه فلک
.
سن بو فعله شاه دینون قدینی ایتدون کمان
صبرینی آلدون توانی گیتدی تالانه فلک
.
گوردی اکبرتک جوانی قانینه غلطان دور
دوندی گوزیاشی یوزنده ابرنیسانه فلک
.
باغلادون بند قماطه الینی صود امرین
صودی اولمازدی آناتاسالاپستانه فلک
.
حُجّتین ایتدی تمام ایستدی سو ویرمدیلر
سویا قیمت دئدولرجاندی نه بُرهانه فلک
.
نیه قویدون آتا بی شرم وحیا حرمله اوخ
بیچه اصغر بوغازین قانی قاتا قانه فلک
.
راضی اولدون دگه اوخ مشک ابوالفضله سویی
قویمادون تا یتوره اصغر عطشانه فلک
.
قول بویون اولماقا قول قویمادون عباسه قالا
قدینی اگدون حسینون دونه چوگانه فلک
.
یخدون آتدان سن ابوالفضلی نه حالتده یره
گوردی قارداشی حسین گلدی اودم جانه فلک
.
باشنی آلدی دیزاوسته گوزونون سیلدی قانین
آغلادی گون آیونا شمعینه پروانه فلک
.
اونداکی عرصه ده تک قالدی پیمبر نوه سی
ایتمدون بیرجه کمک وارث عمرانه فلک
.
کشمکش ایلمقا شمرستم پروریلن
شیرزن زینبی چکدون گله میدانه فلک
.
شمرنامحرمیدی آتدی الین خنجرینه
ایلیوب حفظ حجاب اورگده نسوانه فلک
.
آلمادین شمرین الیندن ایتیلن خنجرینی
رهبردین باشنی کسمیه خصمانه فلک
.
ایله بیرظلم ایلدون باعث اولوب گون دوتولا
آغلیه ارض و سما یم گله طغیانه فلک
.
اود ویروب خیمه لره غارت اولاندا بالالار
دئدی زینب قاچالارکوه و بیابانه فلک
.
دیمدون اود دا یانارنسل امامت کسولر
حُجّت روی زمین رهبر فرزانه فلک
.
اودی زینب اوزونی ویردی اودا ویردی نجات
دئدی جانیم اولا قربان بیله سلطانه فلک
.
تالانوب غارت اولوب هرنه وار اموال ولی
ویرمدی معجرینی کیمسه او عدوانه فلک
.
مو به مو امر یزید ایستدون اجرا اولونا
خدمت ایتدون نیه بس تابع شیطانه فلک
.
آیا بنز باشی خولی قویا مطبخده کوله
آناسی گوز یاشنی دوندره عمانه فلک
.
یتدی اتمامه گونوزگلدی گجه حسرت وآه
بیر یانوق چادر ایچی اولدی عزا خانه فلک
.
ساخلانوب شام غریبان یاری اولدی او گجه
اولمادی بیرجه گلن شام غریبانه فلک
.
نقدرگوزیاشی توکدی اوگجه خردوکبار
بیرفقط معلوم اولارخالق منّانه فلک
.
یاتمادی اصغرآناسی گجه نی ایتدی نوا
آغلادی آغلادیلار اول گل خندانه فلک
.
دئدی ای پرپر اولان غنچه گلوم سینمه گل
داخی گلمز داغیلان گل که گلستانه فلک
.
دئدی سینمده صودوم موجه گلوب گل بالا اَم
ولی یوخ یوسفی گلسین گینه کنعانه فلک
.
سحرین فکری خانم زینبی قویمازدی یاتا
کاش دئیردی بوگجه چاتمیه پایانه فلک
.
صبح آچولدی بالا لار قول قولا باغلاندی تمام
باخمادون اولدوز آیا خیل اسیرانه فلک
.
بی جهاز ناقه لر اوسته ویرولوب یراولارا
مین میین مجبورودی باش اگه فرمانه فلک
.
شهدانون باشنی ویردولا سرنیزه لره
هتک حرمت اولونوب تابع فرقانه فلک
.
باخمیوب لر اُسَرا ایچره باجی هم آنا وار
داغی داغ اوسته چکوبلردل سوزانه فلک
.
کاروان سالدی یولون قتلگهه محشراولوب
هره بیرگل بدن اوسته گلوب افغانه فلک
.
گوردی زینبده گلون خارجفادن یارالی
آخوری قان دولوری قانیله گلخانه فلک
.
یوزدوتوب جانب یزدانه دئدی ایله قبول
بو حسینوندی ویرن جانینی جانانه فلک
.
بیرنظرسالدی گوروب الده کی انگشتری یوخ
دئیدی بجدل نجه ال تاپدی بو احسانه فلک
.
او کرامت الینی مکه ده گورموشدی ندن
کسوب ال غارت انگشت سلیمانه فلک
.
صبری تالانه گیدوب باسدی بیرآغوشه دئدی
زینبون جانی فدا سنکیمی قربانه فلک
.
دفن ایدنمزدی ولی یاره سینه مرهم اولا
اشگیله ایستدی اقدام ایده درمانه فلک
.
موج ایدوب دجلۀ غم یم کیمی طغیانه گلوب
خون دل توکدی گوزوندن دُر ومرجانه فلک
.
ترک ایدوب قتلگهی کوفیه یولاندی قطار
یولی بیراه گیده لعن اولا دورانه فلک
.
ملحق اولدی کاروانه بیرگیجه مهمان گیدن
گلدی تا لطفون یتورسون حد شایانه فلک
.
بوهمان باشدورکه ایتدی مطبخی وادی طور
نور نوریلن اولوب اول یرده همخانه فلک
.
کوفه ده ایتدی تلاوت آیۀ کهفی بو باش
گستره اعجاز اوزوندن حقی خواهانه فلک
.
بی نهایت دردوغم چکدی اسیران کوفه ده
رحم ایدن اولمازدی کیمسه اول یتیمانه فلک
.
گچورم کوفه نین احوالنی شام اهلنی گور
نجه ظلم ایله دیلر عابد نالانه فلک
.
القرض وارد شام اولدی اسیران بلا
صبحدن آخشاما تک تاپمادی کاشانه فلک
.
داش آتان دیلده شماتت ایلیین آلدی توان
غصه دن اشک بصرتوکدوله دامانه فلک
.
غُرفه دن ویردون اجازه آتا اعجوزه داشی
ویرا بیر باشه که بنزر مه تابانه فلک
.
داش ویرولدی بیر باشا زهراآناسی او باشی
گل لراوستونده قویاردی یاتا شاهانه فلک
.
صوت قرآنی کسیلدی نطقیدن دوشدی اوباش
زینبه بیر تازه غم اود ویردی ظلمانه فلک
.
اولدی شام شامیده آخر یورولان کاروانا
سقف سیز یرویرولوب گوشۀ ویرانه فلک
.
قوری توپراقلاری ایتدون اولارا بسترخواب
معاویه اوغلی یاتوب کاخیده مستانه فلک
.
اسرا ایچره صغیره آتاسیز قیز واریدی
او قدر آغلادی جان ویردی او جانانه فلک
.
آلدی کامه او خرابه یری بیردُرّ وگهر
ایندی گیت قبرینه باخ بنزوری رضوانه فلک
.
زایریاولسا بیری کامه چاتارحاجت آلار
اولاگر اهل صفایا اولا بیگانه فلک
.
یوخ عقیدن نیه بس خالق منانه سنون
ایندیده پیر و جوانی بویوسان قانه فلک
.
بوشلیوب خلق ایدنی عاقل و فرزانه لری
باش اگوب تابع اولوبسان نیه نادانه فلک
.
بوجفادور قاتاسان ملت و دولت آراسین
سالاسان اودیانا هر ملک مسلمانه فلک
.
نیه فکرین غلط ایشلور نیه سوریه عراق
اودی اسرائیله سال سالما او لبنانه فلک
.
برهم ایت عیشنی امریکانی قویما یاشا سین
اونی شیطان ایلیوب دنیادا دیوانه فلک
.
امضا لورجنگ وجدل حکمونی هرال شل اولا
آللهون لعنتی گلسون بیله انسانه فلک
.
دئیدیم انسان نه غلط واژه دی گلدی دیلیمه
دیماق اولماز اونا انسان بیله حیوانه فلک
.
آچولور هاردا که بمب جانویروری معصوم اوشاق
دوت او بمب لار قویانی سال دوشه زندانه فلک
.
سلب آسایش ایدور قویموری انسان یاشاسین
دوزه بولمور داخی مردم بیله دورانه فلک
.
او که رحم ایلموری دنیادا بمب پاتلادوری
اونی یاندور او جهنّم ده کی نیرانه فلک
.
یغ بساط ظلمی آچ مهرومحبت سفره سین
هر مسلمان ملکونه خاصه بو ایرانه فلک
.
«عدلی»ایستوراولاسان تابع فرمانده کل
یریوزون دوندرسن باغ وگلستانه فلک
.

#کوچ_کربلا
#کوفه
#راه_شام
#ورود_شام
#خرابه_شام
#نقدر_پیر_و_جوانی_بویادون_قانه_فلک
#عدلی_تبریزی
#ترکی
#زبدةالاشعار